გამონაკლისი არც ჩოხატაურია, სადაც საჯარო მოხელეებს ჯერ კიდევ აპრილში მოსთხოვეს, მინიმუმ, 10 მხარდამჭერის სიის შედგენა და ხელისუფლებისთვის ჩაბარება.
ჩოხატაურის მუნიციპალიტეტის გამგებელთან, ლელა იმედაშვილთან ინტერვიუ ჩვენ სწორედ საარჩევნო საკითხებზე საუბრით დავიწყეთ.
_ ქალბატონო ლელა, დაიწყო თუ არა ხელისუფლებამ წინასაარჩევნო კამპანია?
_ წინასაარჩევნო კამპანიას ჩვენთვის საქმის კეთება ჰქვია და საქმის კეთება ჩვენი ყოველდღიურობაა…
_ რა პროცენტით გეგმავთ არჩევნების მოგებას?
_ წიწილებს შემოდგომაზე ითვლიან.
_ მიიღებთ თუ არა მონაწილეობას საარჩევნოდ ადგილობრივ ოპოზიციასთან დებატებში?
_ რა პრობლემაა, თუ მათ არ ექნებათ დისკომფორტი(?!)…
_ გამგებლობის პარალელურად, თქვენ ხართ ნაციონალური მოძრაობის ჩოხატაურის ორგანიზაციის თავმჯდომარის მოვალეობის შემსრულებელი. ეს ნიშნავს თუ არა იმას, რომ თქვენი მხრიდან გამოყენებული იქნება ადმინისტრაციული რესურსი?
_ ეს ნიშნავს იმას, რომ ჩვენ სამართლებრივი ჩარჩოებიდან არც ერთ შემთხვევაში არ გავალთ.
_ დაზუსტებით ვიცით, რომ საჯარო მოხელეებს ნაციონალებისთვის 10 გარანტირებული ხმის შეგროვება დაევალათ… ერთ-ერთი სოფლის რწმუნებულმა, რომლის ვინაობას ჩვენ მისივე უსაფრთხოებიდან გამომდინარე არ ვასახელებთ, დაგვიდასტურა, რომ თქვენს მიერ დარიგებული ბლანკები უკვე შეავსო და ჩაგაბარათ. რატომ ავალდებულებთ ადამიანებს ხმების შეგროვებას?
_ ეს ინფორმაცია სიმართლეს არ შეესაბამება(?!).
_ თქვენ არჩევნებში საკმაოდ გამოცდილი კადრი ხართ… ჯერ იყო შევარდნაძის პერიოდი და აქტიური “მოქალაქეთა კავშირელობა”, ახლა “ნაციონალები” და ისევ აქტიურობა… ეს უხერხულობას ხომ არ გიქმნით? მით უმეტეს, რომ ხელისუფლება ოპოზიციას ხშირად აყვედრის შევარდნაძის დროინდელი კადრების შემოკრებას. თქვენც ხომ შევარდნაძის დროიდან მოდიხართ და რატომ არის თქვენთვის, თქვენი ხელისუფლებისთვის შევარდნაძის დროინდელი ჩინოვნიკობა ოპოზიციის კომპრომატი?
_ დღევანდელი ხელისუფლების მთავარი ღირსება ის არის, რომ კადრებს კვალიფიციურობის მიხედვით აძლევს მუშაობის შანსს. აქამდე, ყველა პერიოდში, ჩემი საქმიანობა მუდმივად საგანმანათლებლო სფეროს უკავშირდებოდა და ეს სფერო ყოველ დროში აპოლიტიკური იყო და არის (ვერ დავეთანხმებით ქალბატონ ლელას, რომ საგანმანათლებლო სფერო ყველა დროში აპოლიტიკური იყო და არის _ საქართველოში, ყველა ხელისუფლების პერიოდში, საგანმანათლებლო რესურსცენტრები ყოველთვის იყო არსებული ხელისუფლების დასაყრდენი. რედ.)
_ რას გააკეთებთ არჩევნების მოსაგებად და ივანიშვილის ფაქტორი რას ნიშნავს თქვენთვის? ფაქტია, რომ მას საკმაოდ ბევრი მხარდამჭერი ჰყავს, რაც 27 მაისს, თბილისში გამართულმა აქციამაც დაადასტურა…
_ ჩვენი მთავარი მიზანია, ვაკეთოთ ბევრი საქმე ჩოხატაურის და ჩოხატაურელების სასიკეთოდ _ ვფიქრობ, ადამიანები ამ კონკრეტული საქმეების მიხედვით გააკეთებენ არჩევანს. მადლობა ღმერთს, რომ ჩოხატაურის მოსახლეობას სწორი შეფასების და დაფასების უნარი აქვს.
_ ათასობით უმუშევარი ჩოხატაურელი, ავარიული გზები, მოუწესრიგებელი ინფრასტრუქტურა _ ეს დღევანდელი ჩოხატაურის რეალობაა. ასე იყო თქვენს მოსვლამდე და ასეა ახლაც… თუმცა, გვახსოვს თქვენი გამგებლად არჩევა და დაპირებები, რომლებიც შეუსრულებელია. რამდენიმეთვიანი გამგებლობის პერიოდში ჩოხატაურისთვის რაიმე ღირებული გააკეთეთ?
_ ჩემი ჩოხატაურში მოსვლიდან სულ რამდენიმე დღეში მოხდა ის, რასაც ალბათ ბევრი გამგებელი ინატრებდა _ საქართველოს პრეზიდენტი, ინფრასტრუქტურისა და რეგიონული განვითარების მინისტრთან, გურულების დიდ გულშემატკივართან, ბატონ რამაზ ნიკოლაიშვილთან და ეკონომიკის მინისტრთან ქალბატონ ვერა ქობალიასთან ერთად ესტუმრა კურორტ ბახმაროს და ბევრი გურულის სურვილი ახდა _ ბახმარო განსაკუთრებული ყურადღების ცენტრში მოექცა. აქ დაგეგმილი ინფრასტრუქტურული პროექტები, ტურისტული მიმართულების გააქტიურების გარდა, ჩვენთვის დამატებით სამუშაო ადგილებს ნიშნავს.
გარდა ამისა, გურიის გუბერნატორის, ბატონი ვალერი ჩიტაიშვილის თანადგომითა და მხარდაჭერით, ინფრასტრუქტურული პროექტებისათვის წელს ჩოხატაურში, საქართველოს მთავრობის დადგენილებებით გამოყოფილია 1 240 000 ლარი, რომელიც დაიხარჯება შემდეგი მიმართულებებით: თანხის ძირითადი ნაწილი მოხმარდება დაბის ყველა ქუჩასა და სოფლებში, გადაუდებლად რთულ უბნებზე, გზებისა და ხიდების რეაბილიტაციას; რეაბილიტაცია ჩაუტარდება დაბის საბავშვო ბაღებს; ახალი ასფალტის საფარი დაიგება დაბის სასაფლაოსთან მისასვლელ გზაზე; დაბის ყველა ქუჩაზე დასრულდება გარე განათების მოწყობა; მუნიციპალიტეტისა და დაბის შემოსასვლელებში მოეწყობა ახალი, თანამედროვე ტიპის ნიშნულები; სრულად განახლდება დაბის ცენტრში არსებული ნოდარ დუმბაძის სახელობის სკვერი და ის თანამედროვე იერსახეს შეიძენს, იქვე მოეწყობა ანა კალანდაძის სახელობის ხეივანი; განახლდება დაბის ცენტრში, გამგეობის გვერდით არსებული ღია სპორტული მოედანი; მუნიციპალიტეტის ახალგაზრდებს ექნებათ სრულად რეაბილიტირებული სპორტული დარბაზი, სადაც 300-ზე მეტი მოსწავლე დღეს გაუსაძლის პირობებში ვარჯიშობს; მუნიციპალური განვითარების ფონდის დაფინანსებით ახალი ასფალტის საფარი დაიგება დაბის ცენტრალურ, დუმბაძის ქუჩაზე; დაბაში დასრულდება დღეს სერიოზულ პრობლემად ქცეული გაზიფიცირების პროცესი და ყველა ქუჩა იქნება გაზიფიცირებული. ამას ეტაპობრივად უკვე მოჰყვება სოფლების გაზიფიცირება; საგზაო დეპარტამენტი უკვე სამუშაოებს ახორციელებს ჩოხატაური-ბახმაროს საავტომობილო გზის ჩაისუბანი _ ხიდისთავი და ქვაბღა-ჩხაკაურას მონაკვეთებზე; უკვე აშენდა და გაიხსნა ახალი სკოლა სოფელ ქვაბღაში. მთავრობის დადგენილებით ჩოხატაურში წელს კიდევ ორი ახალი სკოლა აშენდება _ სოფელ ზოტსა და სოფელ წიფნარში; მიმდინარე წლის ბოლომდე ჩოხატაურის 13 სოფელში დასრულდება ინდივიდუალური გამრიცხველიანება; წელს სოფლის პროექტების დაფინანსებისათვის მთავრობის დადგენილებით ჩოხატაურში გამოყოფილია 540 000 ლარი. ჩვენ სოფლის მოსახლეობასთან შეხვედრებით, მოსახლეობის სრული უმრავლესობის გადაწყვეტილებით დავგეგმეთ ყველა პროექტი, რომელიც ახლა ექსპერტიზას გადის და მალე დაიწყება კიდეც. სოფლის პროექტების თანხის 80%, მოსახლეობის გადაწყვეტილებით, ადგილობრივი გზების შეკეთებაზე დაიხარჯება.
სამუშაოების ხარისხიანად შესრულების მიზნით, ინფრასტრუქტურისა და სოფლის ყველა პროექტის ხარჯთაღრიცხვა ექსპერტიზას გადის სამხარაულის ექსპერტიზის ეროვნულ ბიუროში და აღნიშნული ბიუროს ექსპერტებთან ერთად ჩავიბარებთ შესრულებულ სამუშაოებს. სამუშაოები ეტაპობრივად, ამ დღეებში დაიწყება.
ამას ემატება ადგილობრივი ბიუჯეტიდან დაფინანსებული სხვადასხვა სოციალური პროგრამები. მათ შორის: ახალი საბავშვო ბაღის გახსნა სოფელ გოგოლესუბანში, მალე უკვე საჭამიასერში და შუა ამაღლებაში; ახალი ინვენტარის შეძენა საბავშვო ბაღებისათვის, რომელსაც ეტაპობრივად უკვე შევიტანთ; სკოლამდელი დაწესებულების ყველა თანამშრომლის ჯანდაცვის სადაზღვევო პოლისების დაფინანსება; რთულ სოციალურ გარემოში მცხოვრები 110 ოჯახისათვის სათბობი შეშით უზრუნველყოფა, გადაუდებელი ოპერაციებისა და სხვადასხვა სამედიცინო მომსახურება, მედიკამენტების შეძენა, ონკოლოგიური ავადმყოფების სამედიცინო მომსახურეობა, მშობიარეთა თანადაფინანსება, დიალეზზე მყოფი ავადმყოფებისა თუ მძიმე ეკონომიკურ პირობებში მყოფი ოჯახებისათვის დახმარება დღემდე გაწეულია სულ 700 ზე მეტი ოჯახისთვის (ვერაფერს ვიტყვით, მეტად შთამბეჭდავი ჩამონათვალია, თუმცა, საინტერესოა, თუკი ამდენი საქმეები წლის ბოლომდე, ანუ სულ რაღაც 6 თვე გაკეთდება, რას ელოდებოდა აქამდე ხელისუფლება? არჩევნებს ხომ არა?! რედ.).
ჩვენ ვფიქრობთ, რომ ეს საკმარისი არ არის და გასაკეთებელი ჯერ კიდევ ბევრია, მაგრამ დამეთანხმეთ, რომ არც ისე ცოტაა. მთავარია, რომ ეს ჩოხატაურის სიყვარულით და საქმის უკეთ კეთების სურვილით ხდება.
_ ბახმარო ახსენეთ… ნაციონალური არხების მტკიცებით, იქ სამუშაოები დაწყებულია, თუმცა, რამდენიმე დღის წინ პირადად ვიყავით იქ და ვნახეთ, რომ არც გაკეთებულია რამე და არც დაწყებული… საქართველოს პრეზიდენტის დაპირებით, დამსვენებელი ამ სეზონზე განახლებულ ბახმაროს ნახავდა, სეზონი კი ამ თვის ბოლოს იხსნება. როგორ აპირებთ ამ მცირე დროში იმ პროექტების გაკეთებას _ ვგულისხმობ სასტუმროს, სუპერმარკეტს, კინოთეატრს, წყალსა და ინფრასტრუქტურის მოწესრიგებას?
_ ბახმაროს მკაცრი კლიმატური პირობები არავისთვის უცხო არ არის და სულ რაღაც 10-15 დღის წინ იქაურობა თოვლით იყო დაფარული… ამ სეზონზე, საქართველოს პრეზიდენტის გადაწყვეტილებით, ინფრასტრუქურისა და რეგიონული განვითარებისა და ეკონომიკის სამინისტროების მიერ გახორციელდება ყველა ის პროექტი, რომელიც ჩვენი საზოგადოებისთვის კარგა ხანია საჯაროა.
_ პრეზიდენტის ნაჩუქარ ვაუჩერებზე აუცილებლად გექნებათ ინფორმაცია. მართალია, თქვენ მაშინ გამგებელი არ იყავით, მაგრამ, გეცოდინებათ, როგორ წაართვეს ადამიანებს საკუთარი სახსრებით მოჭრილი სამასალე თუ საშეშე მორები… მერე იყო დაპირება, რომ ის ადამიანები, რომლებსაც საბუთები წესრიგში ჰქონდათ, აუცილებლად მიიღებდნენ კუთვნილ მასალას. მიუხედავად იმისა, რომ ამ ადამიანებმა ყველა დოკუმენტაცია წარმოადგინეს, მასალა არავინ მისცა _ ხელისუფლებამ კიდევ ერთი დანაპირები არ შეასრულა. სამაგიეროდ, სახერხი ქარხნების ეზოებში დღესაც აწყვია დამპალი მორები… ამ საკითხზე როგორია თქვენი კომენტარი და როგორც გამგებელი, რას ეტყვით იმ ადამიანებს, რომლებმაც ყოველგვარი კანონის დაცვით მოჭრეს მასალა, ჩამოიტანეს, თუმცა, შემდეგ წაართვეს და მხოლოდ დაპირებების ამარა დატოვეს ცივ ზამთარში?
_ ამ საკითხებზე სწორედ ახლა ვმუშაობთ(?!) და დამატებით ყველა დაინტერესებულ პირი მიიღებს ინფორმაცია.
_ აუცილებლად უნდა გკითხოთ საკრებულოს თავმჯდომარის მიერ გამოცემულ 55-ე ბრძანებაზე, რომელიც ჩოხატაურის ადმინისტრაციაში მოქალაქეთა მიღების წესს არეგულირებს. ამ ბრძანებამ ჟურნალისტებს სერიოზული პრობლემები შეუქმნა… ვიცით, იტყვით როდის შეგეშალათ ხელიო, მაგრამ გაგახსენებთ 2012 წლის 13 მარტს, როდესაც კონტროლის პალატამ არათუ შენობაში შემოგვიშვა, არამედ განცხადების დატოვების საშუალებაც არ მოგვცა (ამის დამადასტურებელი კადრებიც არსებობს). ამ ბრძანებას ჩვენ ახლა სასამართლოში ვასაჩივრებთ, თუმცა, მანამდე მაინტერესებს თქვენი აზრი _ როდესაც ადმინისტრაციულ შენობაში არ გვიშვებენ განცხადების დასატოვებლადაც კი, ეს დემოკრატიას ნიშნავს?
_ 2012 წლის 13 მარტს ჩოხატაურის მუნიციპალიტეტის გამგეობაში დარეგსიტრირებულია 5 განცხადება, რაც იმას ნიშნავს, რომ ამ ადამიანებს განცხადებების შემოტანისას არანაირი პრობლემა არ შექმნიათ (რატომღაც, გამგებელს არა აქვს კითხვაზე პასუხი, რატომ არ მოხდა იმ დღეს ჩვენი განცხადების დატოვება და რა პრინციპით შეირჩა ზემოთ აღნიშნული 5 პიროვნება. ავტ).
_ ჟურნალისტებისთვის, მინიმუმ, აკრედიტაციები მაინც არ უნდა გაკეთდეს? თუ საჯარო მოხელეების კეთილი ნების იმედად ვიყოთ საშვების მოლოდინში, რომ ჩვენი პროფესიული საქმიანობა დროულად შევასრულოთ?
_ საშვების სისტემას თქვენი საქმიანობის გახორციელებისათვის ხელი ნამდვილად არ შეუშლია და ვერ დამისახელებთ ამის დამადასტურებელ ვერც ერთ ფაქტს (გამგებელს არ უნახავს, ან არ უნდა ნახოს ამის დამადასტურებელი რამდენიმე ვიდეოკადრი, რომელიც ჩვენი გაზეთის ვებგვერდზე _ www.gurianews.com-ზეა განთავსებული და რომელიც მტკიცებულებაა იმისა, როგორ გვეშლება ე.წ. “საშვთა სისტემის” გამო ხელი მუშაობაში და არა მარტო ჩვენ, არამედ ჩვეულებრივ, დასახმარებლად მისულ მოქალაქეებსაც, რომელთა მიღება, საჯარო მოხელეებს, ხშირად “მოუცლელობის” მიზეზით არ შეუძლიათ. ავტ.).
_ უახლესი დაპირებები როგორია?
_ კონკრეტულ გეგმებზე უკვე მოგახსენეთ, ისე კი, ჩვენი გეგმაა მუდმივი ზრუნვა და ფიქრი უკეთესი ჩოხატაურისთვის და ამ მიმართულებით თავდაუზოგავი შრომა, მოქალაქეების პატივისცემასა და ღირსებაზე აგებული ადამიანური ურთიერთობები, რომელსაც ვფიქრობ, ალტერნატივა არ აქვს.
