” გურია ნიუსის” ინფორმაციით, სწორედ მას ევალებოდა გამგებლების კონტროლი. უფრო მეტიც, მას იმის უფლებაც კი ჰქონდა, რომ გამგებლებს თათბირზე დასწრებოდა.
ამის შესახებ, ”გურია ნიუსი” ჯერ კიდევ 2010 წელს წერდა.
2010 წლის 10 ნოემბერს, როცა ოზურგეთის მუნიციპალიტეტის გამგებელი გიორგი ტაკიძე 2011 წლის ბიუჯეტის დაგეგმვის შესახებ მუშა თათბირს ატარებდა, მის სამუშაო კაბინეტში შსს კონსტიტუციური უსაფრთხოების დეპარტამენტის თანამშრომლები ვანო ბარამიძე და გურამ ჩანტლაძე მოულოდნელად შევიდნენ. (სხვათაშორის, ეს ის ვანო ბარამიძეა, რომელიც გურამ ჩანტლაძის ადგილს დაიკავებს კუდის დეპარტამენტის აჭარა-გურიის სამმართველოს პოსტზე.) ისინი გამგებლის კაბინეტამდე ოზურგეთის მუნიციპალიტეტის საკრებულოს აპარატის უფროსმა პაატა ბურჭულაძემ მიაცილა.
რამდენიმე წუთში ტაკიძის კაბინეტი გამგეობის თანამშრომლებმა უკომენტაროდ დატოვეს, გამგებელი კი კუდის თანამშრომლებთან დარჩა.
სხვათაშორის, ამ ამბიდან რამდენიმე თვეში, გიორგი ტაკიძე დააპატიმრეს. საქართველოს მთავარი პროკურატურის ანტიკორუფციული დეპარტამენტის თანამშრომლებმა საკუთარ სახლში, 4 აგვისტოს, დილის საათებში აიყვანეს. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედებოდა ბრალად. ქრთამის მიღების სანაცვლო, როგორც ამას დასუფთავების სამსახურის ყოფილი ხელმძღვანელი, მერაბ კურდღელაშვილი აღიარებით ჩვენებაში ამბობდა, 1 100 000 ლარის მომსახურების შესყიდვაზე ხელშეკრულების გაფორმების ლობირება იყო. ყოფილი გამგებელი, ციხიდან რამდენიმე დღის წინ, ჩუსტებით გამოუშვეს.
გურამ ჩანტლაძის სახელი უკავშირდება 2009 წლის 23 მაისს ნინო ბურჯანაძის აჭარის ბიუროს ხელმძღვანელის, ზურაბ ავალიანის დაკავება, რომელსაც ბრალად ცეცხლსასროლი იარაღისა და საბრძოლო მასალების უკანონო შეძენა-შენახვა წაუყენეს.
ნინო ბურჯანაძის პარტიის აჭარის ბიუროს ხელმძღვანელი კონსტიტუციური უსაფრთხოების დეპარტამენტმა დააკავა.
მოწმეები ის პოლიციელები იყვნენ, ვინც ზურაბ ავალიანის სახლს უთვალთვალებდნენ ბათუმში, ერთ-ერთი მათგანი სწორედ გურამ ჩანტლაძე გახლდათ. პროკურორის მოთხოვნით, ეს პროცესები დაიხურა, ანუ დაინტერესებულ ადამიანებს მათი მოსმენის უფლება არ ჰქონდათ.
გურამ ჩანტლაძე მოყვა, როგორ მიიღეს ავალიანის თვალთვალის დავალება მან და დათუნა ქურიძემ შინაგან საქმეთა სამინისტროს მთავარ სამმართველოში.
როგორც ჩანს, წინასაარჩევნოდ, გურიაში თვალთვალის, მიყურადებისა და კონტროლის უბადლო სპეციალისტი გაგზავნეს.
