_ ბახვში ისეთი ამბები ხდება, ეს ყველამ უნდა იცოდეთ, ყველანაირად აუღებელი სოფელია. პოლიცია და ადგილობრივი ხელისუფლება ზეწოლას ახდენენ მოსახლეობაზე. ჯერ ერთი და გურიის რეგიონული სამაშველო სამსახურის უფროსი შალვა ბოლქვაძე ატერორებს ხალხს, _ ვინმემ არ გაბედოს და ივანიშვილის პარტიაში არ გაწევრიანდეს, აქციაზე არ წახვიდეთო. . . ასეთია მათი ულტიმატუმები. მარტო იმდენი პოლიციელი ცხოვრობს ბახვში, ეს კმარა ხალხის დასაშინებლად. ყველაზე შემაშფოთებელი, რაც ორი დღის წინ მოხდა, არის ის, რომ ამ სოფელში მცხოვრები ნუკრი ბაჯელიძე სასტიკად სცემა სოფლის რწმუნებულმა გოჩა შარაშენიძემ სოფელ ბახვის ცენტრში, ამაზე მეტი ტერორი რა გინდათ?_ აცხადებენ “გურია ნიუსთან” საუბარში ბახველები.
ნაცემი ნუკრი ბაჯელიძე “გურია ნიუსთან” ამ ფაქტის შესახებ ჰყვება:
_ ჯერ იყო და სანამ ივანიშვილის მხარდამჭერი აქცია გაიმართებოდა ოზურგეთში, მანამდე დამირეკა გამგებელმა, დამიბარა და მითხრა, დაანებე თავი ივანიშვილს, თორემ შავ დღეში ჩაგაგდებო, ამას მოჰყვა სიტყვიერი შეურაცხყოფა. რა თქმა უნდა, მეც ვუთხარი, რომ შენ ვერ ამიკრძალავ, მე ივანიშვილთან ვიქნები თუ არა, ეს ჩემი ნებაა _ თქო. ამის შემდეგ, ორი დღის წინ, საღამოს 7- ის ნახევარზე ბახვის ცენტრში მოვიდა და კვლავ დამიწყო შეურაცხმყოფელი სიტყვებით საუბარი. მე გაწევრიანებული ვარ “ქართულ ოცნებაში”, ვარ მშვიდობაურის კოორდინატორი. მაიძულებდა, რომ დამენებებინა თავი. ჩამისვა მანქანაში და გამიყვანა ცენტრიდან მოშორებით, ამიტეხა ჩხუბი და დამიწყო ცემა, შემომახია პერანგი, ამ დროს მოვიდნენ და გაგვაშველეს.
“გურია ნიუსი” დაუკავშირდა ოზურგეთის მუნიციპალიტეტის სოფელ ბახვის რწმუნებულს გოჩა შარაშენიძეს, რომლის ტელეფონზეც გვიპასუხა ქალბატონმა, რომელმაც ვინაობის გამხელა არ ისურვა:
_არ ვიცი, გოჩა სად არის, ტელეფონი სამსახურში დარჩა და თვითონ გასულია, არ ვიცი როდის დაბრუნდება.
_რამდენ ხანში იქნება სამსახურში, არ იცით?
_არ ვიცი, ნამდვილად საქმეზეა წასული.
_თქვენ ხომ ხართ მისი თანამშრომელი, სად არის წასული გამგებელი სამუშაო საათებში, არ იცით?
_ არ ვიცი, ქალბატონო და რა გითხრათ, _გვიპასუხა ქალაბატონმა, რომელმაც კითხვის დასმაც არ გვაცალა, ისე გაგვითიშა ტელეფონი. ხელმეორედ დარეკვის შემდეგ კი, გამგებლის ტელეფონი “გასული იყო მომსახურების” ზონიდან.
_”გურია ნიუსი” ასევე დაუკავშირდა ოზურგეთის მუნიციპალიტეტის სოფელ ბახვის მაჟორიტარ დეპუტატს ილია ფორჩხიძეს, რომელიც თვითმხილველი იყო ამ ინციდენტისა. თავდაპირველად ბატონმა ფორჩხიძემ გაიკვირვა და იუარა ამ ფაქტის შესახებ, თუმცა ჩვენს კითხვაზე, რომ ის იყო ერთ-ერთი უშუალოდ თვითმხილველი და გამშველებელი ჩხუბისა, ასე გვიპასუხა:
_ ნუ, მე ვიყავი, მაგრამ შორიახლო ვიდექი. იყო რაღაც სიტყვიერი შეურაცხყოფა, მეტი არ დამინახავს და მალე დაშორდნენ ერთმანეთს. ეგ იყო და ეგ. სხვას ვერ გეტყვით ვერაფერს.
_სად არის რწმუნებული. ხომ არ იცით? ტელეფონზე არ გვპასუხობს.
_თათბირზე იქნება გამგეობაში, რაღაც ეგ ორი დღეა, საქმეებია. . . _გვითხრა ფორჩხიძემ.
“გურია ნიუსი” დაუკავშირდა გურიის სამაშველო სამსახურის უფროსს შალვა ბოლქვაძეს, რომელმაც უარყო ინფორმაცია იმის შესახებ, რომ ის ვინმეზე ზეწოლას ახდენს.
_ძალიან გთხოვთ, არ გინდათ ეგ თითიდან გამოწოვილი ინფორმაციები, ცილს ნუ დამწამებთ, მე ბახვიდან, კარგა ხანია წასული ვარ და არჩევნებზე ხმას ქალაქში ვაძლევ, ეგ ინფორმაციები ტყუილია, _ გვითხრა ბოლქვაძემ.
კოალიცია “ქართული ოცნების” ოზურგეთის შტაბის ხელმძღვანელი თავისი წევრის ცემასთან დაკავშირებით, ასეთ კომენტარს აკეთებს.
_ თბილისში ვიყავი, ორი დღეა, რაც ჩამოვედი, ნუკრი ბაჯელიძე პირადად არ მინახავს, თუმცა აღნიშნულის შესახებ მსმენია.(?)
ოზურგეთის მუნიციპალიტეტის გამგებელი ილია ვაშაყმაძე “გურია ნიუსთან” საუბარში აღნიშნავს, რომ ეს ინფორმაცია სიმართლეს არ შეეფერება.
_რა იცით, რომ სცემა?
_ამ ფაქტს ადასტურებს ბახვის მცხოვრებლები და, რაც მთავარია, თავად დაზარალებული ამბობს .
_კარგით რა, ეტყობა რაიმე ნაცემის? შეამჩნიეთ? არ არის სიმართლე.
