ამ თემით მას შემდეგ დავინტერესდით, რაც სოციალურ ქსელში მასობრივად გავრცელდა ინფორმაცია, მათ შორის მედიასაშუალებების წარმომადგენლების მიერ.
“გურია ნიუსი” გავრცელებული ინფორმაციებიდან, დაახლოებით ერთ საათში დაუკავშირდა სახალხო დამცველის აპარატს და გაავრცელა მისი პირველი კომენტარი აღნიშნულ ფაქტთან დაკავშირებით.
ჩვენს მიერ გაზეთის ვებგვერდზე განთავსებული 8 ინფორმაციიდან, 7-ში სწორედ სახალხო დამცველის აპარატის წარმომადგენლის, ნინო ერემაშვილის კომენტარი გვქონდა გამოყენებული. 8 ინფორმაციიდან ერთი კი სახალხო დამცველის ოფიციალური განცხადება გახლდათ.
ასევე, 3 საათის განმავლობაში სისტემატურად ვცდილობდით დავკავშირებოდით სასჯელაღსრულების სამინისტროს საზოგადოებასთან ურთიერთობის სამსახურის უფროსს, თეა სუხიაშვილს ინფორმაციის გადასამოწმებლად, რომელიც ჩვენ სატელეფონო ზარებს არ პასუხობდა.
გლდანის ციხესთან მისულებს, რათა იქ გაგვერკვია გავრცელებული ინფორმაცია, უკვე დაგხვდნენ უფლებადამცველები, ნანა კაკაბაძე და გელა ნიკოლეიშვილი და სხვა მედიასაშუალებები, მათ შორის ტელევიზიები.
მიუხედავად ამისა, დღეს, ზოგიერთი მედიასაშულების წარმომადგენლის მიერ გავრცელდა მოსაზრება იმის შესახებ, თითქოს “გურია ნიუსის” მიერ გავრცელებულმა მასალებმა ხელი შეუწყო პანიკას პატიმრების მშობლებში.
ვაცხადებთ, რომ “გურია ნიუსი” არ ყოფილა ინფორმაციის გავრცელების პირველწყარო. ჩვენ ვასრულებდით პროფესიულ მოვალეობას და ვცდილობდით, საზოგადოებისთვის მიგვეწოდებინა ობიექტური მასალა გავრცელებულ ინფორმაციასთან დაკავშირებით.
ასევე, განვმარტავთ, რომ სახალხო დამცველის მიერ გავრცელებულ ოფიციალურ განცხადებაში, სადაც წერია: “ომბუდსმენი აღნიშნავს, 6 ივლისს, დაახლოებით 23:35 საათზე, სოციალურ ქსელსა და ცალკეული მედიასაშუალებების მიერ გავრცელდა ინფორმაცია გლდანის #8 სასჯელაღსრულების დაწესებულებაში მომხდარ არეულობასა და დაწესებულებაში სპეციალური დანიშნულების რაზმის შესვლის თაობაზე“, ხსენებულ მედიასაშუალებებში “გურია ნიუსი” არ იგულისხმება.
ამასთან დაკავშირებით, გთავაზობთ სახალხო დამცველია აპარატის წარმომადგენლის, ნინო ერემაშვილის კომენტარს.
ნინო ერემაშვილი: “მე გადავამოწმე გუშინ ჩემს მობილურში შემოსული სატელეფონო ზარები. ზუსტად ვერ გეტყვით, ვისი ზარი იყო პირველად შემოსული, რადგან ძალიან ბევრი ზარი იყო შემოსული. ზუსტად შემიძლია იმის თქმა, რომ “გურია ნიუსისაგან” მე ეს ინფორმაცია არ მიმიღია.
“გურია ნიუსთან” ნამდვილად არანაირი პრეტენზია არ მაქვს. თქვენმა ჟურნალისტმა როდესაც დამირეკა, მას ნამდვილად ვუთხარი, რომ ჩვენ გვქონდა ეს ინფორმაცია მიღებული სხვადასხვა მედიასაშუალებისგან, სოციალური ქსელისგან და ჩვენი თანამშრომლები იქ იყვნენ.
როდესაც მე “გურია ნიუსი” დამიკავშირდა, ჩვენი თანამშრომლები უკვე იმყოფებოდნენ დაწესებულებაში. მანამდე მირეკავდნენ სხვადასხვა მედიასაშუალებები, მოდით, ნუ დავკონკრეტდებით.
კიდევ ერთხელ ვიმეორებ “გურია ნიუსისგან” ეს ინფორმაცია ნამდვილად არ მიმიღია. დიდი მადლობა იმისთვის რომ ასე ოპერატიულად დადეთ ჩვენი ინფორმაცია და ხელმისაწვდომი გახადეთ ყველასთვის.
