პირველი საკითხის _ “ოზურგეთის მუნიციპალიტეტის 2012 წლის ბიუჯეტის დამტკიცების შესახებ ოზურგეთის მუნიციპალიტეტის საკრებულოს 2011 წლის 9 დეკემბრის # 49 დადგენილებაში ცვლილების შეტანის შესახებ, ოზურგეთის მუნიციპალიტეტის საკრებულოს დადგენილების დამტკიცების თაობაზე, კობა ხაბალაშვილმა ისაუბრა და თქვა, რომ სოფლის მხარდაჭერის პროგრამის ფარგლებში სახელმწიფო ბიუჯეტიდან ოზურგეთის მუნიციპალიტეტს მილიონ 381 415 ლარი გამოეყო. მან თქვა, რომ ოზურგეთში, 2012 წლის 18 ივნისს მომხდარი სტიქიური მოვლენების შედეგად დაზიანებული ინფრასტრუქტურის რეაბილიტაციასთან დაკავშირებული ხარჯების დაფინანსების მიზნით, საქართველოს მთავრობის განკარგულებით, გამოიყო 100 000 ლარი.
საკრებულოს თავმჯდომარემ ალეკო მამეშვილმა განაცხადა, რომ ყველა აქტივობას ძალიან კონკრეტული სახელი უნდა დაერქვას: _ გზების რეაბილიტაციის დროს, მოხრეშვაა? მოხრეშვა დაერქვას. ბეტონის დაგებაა? უნდა დაერქვას ბეტონის დაგება! (აქამდე კარგად ცნობილი გზების “დაკერების” მეთოდი, არავის უხსენებია, რაზეც გურულები ხუმრობენ, დაკერებული შარვალი ეზარებოდა ჩვენს წინაპრებს და ახლა დაკერებული გზა გაგვიხდა სანატრელიო. _ მ.ჩ.).
საკრებულოს თავმჯდომარემ ხაზგასმით აღნიშნა ისიც, რომ 11 სოფელშია შედგენილი 70-მდე პროექტი, რაშიც საჭიროა თითოეული ადამიანის ჩართვა დეპუტატთან და რწმუნებულთან ერთად. ასევე, სამი კილომეტრი სიგრძის არხია გასაწმენდი ურეკში, რომლის დროულად გაკეთებაა საჭირო. მამეშვილს სიტყვა ჩაუჭრა მელექედურის მაჟორიტარმა დეპუტატმა, “ქრისტიან-დემოკრატმა” ავთო ხინთიბიძემ და განუცხადა, რომ მის სოფელში პრიორიტეტი კარგად არ არის გამოკვეთილი _ საბავშვო ბაღისთვის გამოყოფილი 33 000 ლარი ხალხის გამოკითხვის გარეშე ვერ დაიხარჯება და ამისთვის ვადა გაგვიგრძელეთო. მამეშვილმა უპასუხა, რომ ეს გამოკითხვა უკვე ჩატარებულია და ახალი საბავშვო ბაღის აშენებას რატომ ეწინააღმდეგებით, ჭის შემოღობვა და იქ კაფელის დაგება გირჩევნიათო?
ხინთიბიძემ კატეგორიულად მოითხოვა მელექედურში ჟურნალისტების ასვლა და იმის გარკვევა, რომ გამოკითხვა მოხდა ერთი საკითხის ირგვლივ: გინდათ საბავშვო ბაღი?
_ ბაღი ვის არ უნდა? _ თქვა მან, _ მაგრამ იქ უფრო სხვა საქმეებია გასაკეთებელი. პრიორიტეტები მოსახლეობას უბნების მიხედვით აქვს ჩამოთვლილი და ხალხის შეკრება არ მომხდარა, რომ უმთავრესი გამოეყოთ. შარშან შემოუღობავი დარჩა საყანე ფართობი, რომელზეც ხალხი, ფაქტობრივად, საარსებო სარჩოს იწევს. ესაა უმთავრესი, თორემ ბავშვებს რომ მიხედვა უნდა, ეს ვის ესწავლება?
გამოკითხვა ერთჯერადად, ერთი კითხვის ირგვლივ მოხდაო, თქვა დეპუტატმა და სოფელში ჟურნალისტების მისვლა ითხოვა, რაც იმაზე მიუთითებს, რომ სავარაუდოდ, უახლოეს დღეებში, სოფელი მელექედური ვნებათა ღელვის მხრივ, კვლავ ცხელი წერტილი გახდება.
“ოზურგეთის მუნიციპალიტეტის 2012 წლის სახელმწიფო შესყიდვების გეგმაში ცვლილებების და დამატებების შეტანის შესახებ” ამირან გირკელიძემ ისაუბრა. ძირითადად, მან განმარტა და ჩამოთვალა ის სოფლები, სადაც წელს სოფლის მხარდაჭერის პროგრამით შეისყიდიან კერძო სახლს და სექტემბრიდან გაიხსნება საბავშვო ბაღები.
“სოციალური დახმარების გაცემის და მიღების წესის დამტკიცების შესახებ” ირინა საჯაიამ ისაუბრა. მან განმარტა, რომ დასახელებების შეცვლა მოხდა. მაგალითად, ახალშობილთათვის დახმარება შეიცვალა ტერმინით _ “მშობიარეთა 50%-იანი დახმარება.”
ასკანის მაჟორიტარმა დეპუტატმა ლევან ნინიძემ სიტყვა ითხოვა, სოციალურ სფეროზე უნდა ვისაუბროო და ამავე სოფლის მკვიდრის, სოციალურად დაუცველი გივი შევარდნაძის გარდაცვალების შესახებ მწვავე განცხადება გააკეთა (აღსანიშნავია, რომ ამ პიროვნების შესახებ, რომელსაც ორივე ფეხი მოკვეთილი ჰქონდა, სოციალურ დახმარებას ითხოვდა და არ დაუნიშნეს ბიძაშვილის ძროხის გამო, “გურია ნიუსი” არც თუ დიდი ხნის წინ წერდა).
_ სოციალურ აგენტზე უნდა მოგახსენოთ. უკაცრავად პასუხია და ტუალეტში ტუალეტის ქაღალდს რომ მოძებნის და იტყვის, ეს ოჯახი კარგად ცხოვრობსო, არის თუ არა ეს აგენტი უზნეო? გივი შევარდნაძეს, მარტოხელა ფეხებმოკვეთილ კაცს, დახმარება არ დაუნიშნეს იმის გამო, რომ უკიდურესად გაჭირვებულს ბიძაშვილმა ძროხა ათხოვა. ძროხა მარჩენალიაო, უთხრეს. ჯერ ერთი, ძროხა მარჩენალი კი არა, სარჩენია გურიაში, _ აღშფოთება ვერ დამალა ნინიძემ, რომელსაც საკრებულოს თავმჯდომარემ ალეკო მამეშვილმა ყურადღებით მოუსმინა და შესთავაზა, ასეთი საკითხები ფრაქციის სხდომაზე განვიხილოთო.
_ ისე, საინტერესოა, იმ ცალკე სხდომაზე ნინიძეს იქეთ ხომ არ ჩაუტარებენ ზნეობაზე ლექციას? მსუბუქად მაინც დატუქსავენ, _ ჩაილაპარაკეს სხდომათა დარბაზში.
საკრებულოზე გამორჩეული კონკრეტულობით ზემოთ აღნიშნულ საკითხებზეც ისაუბრეს და უყოყმანოდ დაამტკიცეს. დანარჩენი საკითხები, რომლებიც ოზურგეთის სტრატეგიული განვითარების გეგმის დამტკიცებას, მუნიციპალიტეტის საკუთრებაში არსებული ქონების სახელმწიფოს სასარგებლოდ საკუთრების უფლების მიტოვების შესახებ, განკარგულებას და საკურორტო სეზონის დადგომასთან დაკავშირებულ დაბა ურეკის ტერიტორიაზე გასახორციელებელი ღონისძიებების შესახებ განკარგულების დამტკიცებას შეეხებოდა, დეპუტატებმა თანმიმდევრულად და უპრეტენზიოდ უყარეს კენჭი. ალეკო მამეშვილმა ურეკზეც მიმართა კონკრეტული ყურადღება და აღნიშნა, რომ სეზონის დადგომის გამო, დაბა მუდმივი ყურადღების ქვეშ უნდა იყოს.
