გავრცელებული ინფორმაციით, ეს არის მეორადი ტანსაცმელი, ე. წ. “ძონძები”, რომელიც გამიზნულია წინასაარჩევნოდ მოსახლეობისთვის დასარიგებლად. სხვათა შორის, ზემოთ აღნიშნული გარაჟი, გასულ წელს, მოსახლეობისთვის დასარიგებელი ჰიბრიდული სიმინდის შესანახად იყო გამოყენებული.
ჩვენი წყაროს ინფორმაციით, 15 დღის წინ, ბავშვთა ცენტრ “ცისკრის ვარსკვლავის” მენეჯერმა ხათუნა ცერცვაძემ, ამ ტვირთის გარკვეული რაოდენობა, ერთი მიკროავტობუსით წაიღო.
“გურია ნიუსი” სახანძრო სამსახურში მივიდა და ერთ-ერთ თანამშრომელს თხოვა, გაეღო გარაჟი “N.01”, სადაც ეს ტვირთი ინახებოდა. როგორც სახანძრო სამსახურში განგვიმარტეს, გარაჟის გასაღები მათ არ ჰქონდათ. მათი თქმით, ასევე არ ფლობდნენ ინფორმაციას იმასთან დაკავშირებით, თუ რა იყო ამ “ერთ გარაჟში”.
“გურია ნიუსი” დაუკავშირდა მხარის გუბერნატორს ვალერი ჩიტაიშვილს (საგანგებოდ აღვნიშნავთ, რომ ბატონ ვალერისთან დაკავშირება ბოლო დროს, რატომღაც, ვერ ხერხდება _ ალბათ, მისთვის არასასურველ კითხვებს ერიდება). მას შემდეგ, რაც მესიჯი მივწერეთ, რომ სტატიას მისი კომენტარის გარეშე გავუშვებდით, გვიპასუხა, თუმცა კითხვის დასმაც არ გვაცალა, ისე გაგვითიშა ტელეფონი:
_ არ ვიცი, რა ხდება სახანძრო სამსახურში, _ ასეთი იყო მისი მოკლე პასუხი.
ჩვენ ასევე დავუკავშირდით მუნიციპალიტეტის გამგებელს ილია ვაშაყმაძეს, რომელიც ასეთი პასუხით შემოიფარგლა:
_ აზრზე არ ვარ, რაზე მეკითხებით. ვიკითხავ და გეტყვით, _ გვითხრა ვაშაყმაძემ.
“გურია ნიუსის” ინფორმაციით, რამდენიმე დღის წინ, ოზურგეთის მუნიციპალიტეტის გამგეობის სამსახურის უფროსების თათბირზე ბატონ ვაშაყმაძეს მართლაც უკითხავს სახანძრო სამსახურის უფროსისთვის, რა არის შენს გარაჟში შენახულიო, რაზეც პასუხად, _ არ ვიციო, _ მიუღია.
რამდენიმე დღეა, არ პასუხობს ჩვენს ზარს ოზურგეთის მუნიციპალიტეტის საკრებულოს თავმჯდომარე ბატონი მამეშვილი, რომელსაც ასეთი დუმილი უკვე ჩვევად ექცა.
“გურია ნიუსი” “ცისკრის ვარსკვლავის” მენეჯერს ხათუნა ცერცვაძეს დაუკავშირდა:
_ ქალბატონო ხათუნა, ინფორმაცია გვაქვს, რომ სახანძრო სამსახურში ერთ-ერთ გარაჟში ინახება მეორადი ტანსაცმელი, რომელსაც თქვენ ანაწილებთ გაჭირვებულებზე…
_ არ გაქვთ სწორი ინფორმაცია, ჩემო კარგო. მე არ ვანაწილებ, მე, უბრალოდ, ბავშვებისთვის ავიღე. არაფერს არ ვანაწილებ და არ ვარ მე ის, რომ მე მაქვს ბავშვთა სახლები, დღის ცენტრი და გაჭირვებული ბავშვები. ანუ, მე არაფერს არ ვანაწილებ. მე თუ რამე მიმაქვს ჩემი ბავშვებისთვის, ეს არ არის განაწილება. არასწორად მოხვდით, ჩემო საყვარელო, დარეკეთ სხვასთან, მე არ ვარ კომპეტენტური ამ საქმეში (სტილი დაცულია).
_ ჩვენ გვაქვს ინფორმაცია, რომ უშუალოდ თქვენ წაიღეთ ტვირთის გარკვეული რაოდენობა სახანძრო სამსახურის გარაჟიდან და ამ საქმეში, ასე ვთქვათ, ერთ-ერთი მთავარი პირი ბრძანდებით.
_ არანაირი მთავარი არ ვარ მე, საიდან ვარ მთავარი? მე მაჩუქეს რაღაც ჩემი ბავშვებისთვის, რატომ ვარ მთავარი?
_ იქნებ, გვითხრათ, ვინ გაჩუქათ?
_ ძალიან ბევრი ადამიანია, რომელიც შემოწირულობას აკეთებს.
_ მაშინ რატომ არის კონფიდენციალური ეს შემოწირულობა და რატომ ინახება სახანძრო სამსახურის გარაჟში?
_ რატომ ინახება სახანძრო სამსახურში, აი, ეგ მე არ ვიცი. თქვენ მოიძიეთ, მოიკითხეთ და გაიგეთ, მე არ ვიცი, _ გვითხრა ცერცვაძემ.
