ამის შესახებ “გურია ნიუსს” მანანა კობახიძემ განუცხადა.
მანანა კობახიძე: “მოგეხსენებათ, რომ ყველა იმ კომპანიის მიმართ, რომელსაც რაიმე სახის ბიზნესკონტრაქტი ჰქონდა “ქართულ ოცნებასთან” გაფორმებული, დაიწყო ადმინისტრაციული სამართალწარმოება. ყველა მათგანი დაჯარიმდა კონტროლის პალატის მიერ, რაც ძალაში დარჩა სასამართლო გადაწყვეტილებით. მათ შორის არის შპს “ბურჯიც,” რომელსაც კონტრაქტი ჰქონდა კოალიცია “ქართულ ოცნებასთან” და ასევე პარტია “ქართული ოცნება _ დემოკრატიული საქართველოსთან” სატრანსპორტო მომსახურეობაზე. აი ამ შპს “ბურჯის” კუთვნილი სატრანსპორტო მანქანა მემსახურებოდა მეც, როგორც პარტიის თავმჯდომარეს. ჩვეულებრივ, ეს იყო საკონტრაქტო პირობები. გამომდინარე იქედან, რომ კომპანიას შეუქმნა სააღსრულებლო ბიურომ პრობლემა, დაყადაღდა მისი ანგარიშები და სააღსრულებლო წარმოებაა დაწყებული, გუშინწინ დილით, ჩემს მძღოლს დაურეკეს და უთხრეს, რომ მანქანა მიეყვანა და დაეყენებინა ავტოსადგომში. ცხადია, ამის საწინააღმდეგოდ, ჩვენ ვერაფერს მოვიმოქმედებდით. წაიყვანა მძღოლმა მანქანა და დააყენა “ბურჯის” ავტოსადგომში, რადგან არ ვიცით, რას უპირებს ამ ქონებას სააღმსრულებლო ბიურო.
მარტო ჩემს მანქანაზე არ არის ლაპარაკი, ავტომობილები, რომლებიც ემსახურებოდა “ქართულ ოცნებას” და იყო “ბურჯის” ბალანსზე, ყველას ჩამოართვეს.”
მანანა კობახიძის განცხადებით, სახელმწიფომ გადაწყვიტა, რომ ამ კომპანიების დაყადაღებით “ქართულ ოცნებას” მოუსპოს გადაადგილებისა და საქმიანობის შესაძლებლობა.
“ვისაც კერძო მანქანა ჰყავდა, ისინი დადიან საკუთარი მანქანებით. მე არ მყავდა კერძო მნაქანა და დავრჩი ტრანსპორტის გარეშე, მაგრამ ეგ არ არის პრობლემა. საერთოდ ფეხითაც რომ ვიარო, რაც ჩემთვის სულაც არ არის უცხო, ჩვენ ყველანი ჩვენს საქმეს ბოლომდე მივიყვანთ. ის ადამიანები, რომლებსაც კერძო ავტომობილები ჰყავს, ჩვენს აქტივისტებზე, თანამშრომლებსა და მხარდამჭერებზეა ლაპარაკი, თავიანთი ავტომობილებით გააკეთებენ იმ საქმეს, რაც გასაკეთებელია. ცოტა სასაცილოა, როცა ხელისუფლება ამ ფორმით უპირისპირდება ოპოზიციას, მაგრამ ეს მათვე მოუტრიალდებათ უკან. როგორც ჩანს, ყველაფრის დაყადაღებას აპირებენ, მაგრამ როგორ შეიძლება მერე არჩევნებს დაარქვან თავისუფალი, დემოკრატიული და კონკურენტუნარიანი, ძალიან მაინტერესებს,” _ განაცხადა მანანა კობახიძემ “გურია ნიუსთან” საუბრისას.
