ამ უზრდელმა ადამიანმა ჩემი პირადი ცხოვრება ასე შემიფასა: კაცად არ ვარგიხარ და ცოლი იმიტომ გაგშორდაო. მეც დავუბრუნე პასუხი _ თქვენი პრეზიდენტიანად ხართ მასეთები,-მეთქი. აბა, რა მექნა? შეურაცხმყოფს ყველანაირად. მე ამ სისტემამ, ასეთმა ყოფამ ოჯახი დამინგრია, უმუშევრობის გამო. ვის მივმართო ამ ხელისუფლებაში? რა აზრი აქვს, ვინ დაიცავს ჩვენს უფლებებს? მას შემდეგ არანაირი რეაგირება არ ყოფილა არავის მხრიდან, _ ამბობს “გურია ნიუსთან” სოფელ ბახვის მკვიდრი ნუკრი ბაჯელიძე.
მისი ნაამბობის მიხედვით, სანამ ბიძინა ივანიშვილი ოზურგეთში ჩამოვიდოდა, მანამდე აქტივისტების შეხვედრა შედგა ბახვში, სადაც იმყოფებოდნენ ქეთი დოლიძე, ნინელი ჭანკვეტაძე და კახი კალაძე.
_ წინა დღეს დამირეკა ბახვის რწმუნებულმა გოჩა შარაშენიძემ. ვიმყოფებოდი მეზობელთან. წამიყენა ულტიმატუმი: დაანებე თავი, “ქართულ ოცნებაში” ნუ ხარო. მე უარი ვუთხარი, იმიტომ, რომ ამ სისტემამ დამინგრია ოჯახი, მეუღლე საბერძნეთში წავიდა იძულებით სამუშაოდ, იმის გამო, რომ ჩვენთვის პურის ფული გამოეგზავნა. ამის გამო, გოჩამ მომაყენა სიტყვიერი შეურაცხყოფა ტელეფონში, უკადრისი და უშვერი სიტყვებით, შენ კაცად არ ვარგიხარო. მე ვუპასუხე, მასეთი თქვენ _ ნაციონალები ხართ, თქვენი პრეზიდენტიანად,-მეთქი. ხომ ეკუთვნოდა ასეთი პასუხი მისი ნათქვამის შემდეგ? მერე მთელი დღის განმავლობაში მირეკავდა და აღარ ვპასუხობდი, _ ამბობს ბაჯელიძე.
ამის შემდეგ, მისივე თქმით, სოფელ ბახვის ცენტრში იმყოფებოდა სოფლის ექიმი ილია ფორჩხიძე, რომელიც ამჟამად სოფლის მაჟორიტარია. ბაჯელიძე ფორჩხიძის მანქანაში ჩაჯდა, რა დროსაც იგი გოჩა შარაშენიძემ დაინახა:
_ ჩაგვიხტა მანქანაში. მოხდა ჩვენს შორის სიტყვიერი შელაპარაკება, დამიწყო ჩხუბიც, დამარტყა, მცემა, შემომახია პერანგი, ილია ფორჩხიძემ გაგვაშველა, _ გვიამბობს ბატონი ნუკრი.
_ ვის დაუკავშირდით, როცა ეს ფაქტი მოხდა?
_ ამ ინციდენტის შემდეგ, მივედი “ქართული ოცნების” ოფისში და განვაცხადე ამის შესახებ.
_ ვის განუცხადეთ?
_ დავით დარჩიას, კოტე შარაშენიძეს და თემურ სალუქვაძეს.
_ მათ რა მოიმოქმედეს საპასუხოდ?
_ გამოიძახეს “მე-9 არხის” ოპერატორი და ჟურნალისტი, და ასევე “ინფო-9”-ის ჟურნალისტი და ოპერატორი. მათ წამიყვანეს სოფელ ბახვში, ჩაწერეს ჩემთან ინტერვიუ და სურათიც გადამიღეს, როცა პერანგი შემოხეული მქონდა.
_ იმის გარდა, რომ მათ გამოიძახეს ჟურნალისტები, კიდევ რა რეაგირება მოახდინეს?
_ მეტი არაფერი, დაუკავშირდნენ ჟურნალისტებს და მათ თხოვეს, რომ ყურადღება მიექციათ ამ ფაქტისთვის. როცა პირველად მოხდა შეხლა-შემოხლა ტელეფონით, მაშინაც დავუკავშირდი მათ. მაშინაც მითხრეს, რომ ტელევიზიას გამოვიძახებთ, ჟურნალისტების ამოვლენ შენთან და ამ ინციდენტს მთელი საქართველო ნახავსო. გოჩა შარაშენიძე, როგორც ჩვევიათ ხოლმე ამ ხელისუფლების წარმომადგენლებს, უტიფრად, უზრდელად, თავხედურად მომექცა. რამდენიმე ხნის წინ, მან ჩემთან საუბარში განაცხადა: “შენ რომ იცოდე, ირაკლი ალასანია არის ჩემი ახლობელი, მე მასთან არანაირი პრობლემა არ მაქვს”. რას ნიშნავდა, ეს არ ვიცი, იქნებ, მუქარა იყო?
“გურია ნიუსი” ამ ინფორმაციის გადასამოწმებლად ოზურგეთის მუნიციპალიტეტის სოფელ ბახვის რწმუნებულს გოჩა შარაშენიძეს დაუკავშირდა, რომელმაც კითხვის დასმაც კი არ გვაცალა, ისე მოგვახალა:
_ უკომენტაროდ, ჩემო კარგო, იცით, რატომ? იმიტომ, რომ სიცრუეს ბეჭდავთ! _ ამ “ზრდილობიანი” ჟესტის შემდეგ, შარაშენიძემ ტელეფონი გაგვითიშა.
“გურია ნიუსი” კოალიცია “ქართული ოცნების” ოზურგეთის შტაბის აქტივის კოორდინატორს დავით დარჩიას დაუკავშირდა, რომელმაც აქეთ გვკითხა, ეგ ამბავი არ დამთავრდაო?
_ ბატონო დავით, შტაბის ხელმძღვანელმა კოტე შარაშენიძემ გვითხრა, რომ ამ ფაქტის შესახებ არაფერი იცოდა. თქვენ, როგორც აქტივის კოორდინატორი, რა კომენტარს გააკეთებთ?
_ ფაქტი ძალიან ცუდია, მე არ შევსწრებივარ და არ ვიცი, რის საფუძველზე მოხდა ინციდენტი. მე, უბრალოდ, ვიცი ამ ადამიანის მონაყოლი.
_ ბატონო დავით, მაინტერესებს არის თუ არა თქვენთვის ცნობილი რაიმე სხვა მსგავსი ფაქტების შესახებ ოზურგეთში?
_ მე არ გამიგია მსგავსი ინციდენტის შესახებ, სიმართლეს გეუბნებით. ხელით შეხება და ასეთი რამ ნამდვილად არ ყოფილა. სიტყვიერი რაღაცეები ჩვეულებრივი მოვლენაა და ამისთვის ამხელა განგაშის ატეხვა არ ღირს. თუ ფიზიკურ შეურაცხყოფაზე მიდგება საქმე, ეს ნამდვილად არ არის კარგი. რა თქმა უნდა, ჩვენ ვგმობთ ამ ფაქტს და არ უნდა მოხდეს მსგავსი რამ.
