“ამ თემაზე არასამთავრობო ორგანიზაციები და სამოქალაქო სექტორი მუშაობდა. თავისთავად, ის ფაქტი, რომ არჩევნების წინ პარტიებს, რომლებიც არჩევნებში მონაწილეობენ, სჭირდებათ გარკვეული ქცევის კოდექსზე შეთანხმება, არ არის კარგი. ეს არის ნიშანი იმისა, თუ როგორი დემოკრატიაა ამ ქვეყანაში. წესით ასეთი რამ არ უნდა ხდებოდეს საჭირო, მაგრამ არსებული ვითარებიდან გამომდინარე, მისასალმებელია შეიქმნას ასეთი ქეცვის კოდექსი, შეთანხმდნენ პარტიები გარკვეულ წესებზე, შემდეგ ყველამ ყურადღება მიაქციოს იმას, რომ ეს წესები არ დაირღვეს. თუმცა, მიგვაჩნია რომ მსგავსი შეთანხმება უნდა მოხდეს სამოქალაქო სექტორის, საერთაშორისო ორგანიზაციების აქტიური ჩარევით არჩევნებში მონაწილე პარტიებთან ერთად.
მხოლოდ ასე შეგვიძლია მივიღოთ გარანტიები იმისა, რომ არა მხოლოდ არჩევნების დღე იქნება გამჭირვალე და თავისუფალი ყოველგვარი ზეწოლისგან, არამედ აღკვეთილი იქნება ისეთი პროცესები, როგორსაც ადგილი ჰქონდა წინა კვირაში და ყველანი მშვიდობიანად მივაღწევთ არჩევნების დღემდე, _ განაცხადა მაია ფანჯიკიძემ.
მისი თქმით, კოალიცია დაინტერესებული იმით, რომ გაიმართოს პოლიტიკური პროცესი, კონსტიტუციური და სამართლებრივი გზით მოგვარდეს ყველა დისპუტე და საბოლოო ჯამში, შედგეს ისეთი შეთანხმება, რომელიც უზრუნველყოფს არჩევნების დღის შედეგების აღიარებას,
“ხელისუფლება, რომელიც პუნქტებად აყალიბებს იმ დებულებებს, რომელშიც მისი აზრით, საჭიროა შეთანხმება, თავად არღვევს ამ შეთანხმების ყველა პუნქტს. ამიტომ, მისი მხრიდან, ამ ინიციატივით გამოსვლა ბადებს ეჭვს, რომ მას სწორედ ასეთი შეთანხმების ჩაშლა უნდა.
არ იქნება კარგი, თუ ხელისუფლება ორდღიანი პიარისთვის გამოიყენებს ამ აქციას. არ იქნება კარგი, თუ ვინმე სხვა გამოიყენებს ამას მოკლევადიანი დივიდენდების მისაღებად. კარგი იქნება, ყველა სერიოზულად თუ მოეკიდება ამ საქმეს.
სამოქალაქო სექტორისა და საერთაშორისო ორგანიზაციების ჩარევით მოხდება რეალური შეთანხმება იმაზე, თუ როგორ გავიაროთ მშვიდობიანად და თანაბარ პირობებში არჩევნებამდე დარჩენილი დრო.
არჩევნების გამოცხადებამდე სულ რამდენიმე დღეა დარჩენილი. თუ არჩევნები არის 1 ოქტომბერს, ჩვენ მომავალ დღეებში უნდა ველოდეთ ამ არჩევნების გამოცხადებას. აქედან გამომდინარე, საარჩევნო კამპანია დაიწყება ძალიან მალე. შესაბამისად, საჭიროა არსებობდეს პოლიტიკური დიალოგი პარტიებს შორის ამ ქცევის კოდექსის შესახებ.” _ განაცხადა ფანჯიკიძემ.
