_ ქალბატონო მანანა, რამდენად კარგად იცნობთ ზუგდიდს?
_ ზუგდიდს ვიცნობ ძალიან კარგად, იმიტომ რომ ჩემი დედულეთია. პრაქტიკულად, მთელი ბავშვობა იქ მაქვს გატარებული. ჩემი ბებია, ბაბუა, ბიძები დეიდები, ყველანი აქ ცხოვრობდნენ. ჩემთვის ეს არის მშობლიური ქალაქი. სულ ვამბობ, საქართველოში მე მაქვს სამი მშობლიური ქალაქი: ერთი თბილისი, სადაც დავიბადე და გავიზარდე, მეორე ზუგდიდი, რომელიც ჩემი დედულეთია და პრაქტიკულად მთელს ზაფხულს აქ ვატარებდი და მარტვილი, საიდანაც წარმოშობით ვარ და საიდანაც მოდიან საერთოდ ნაჭყებიები.
ზუგდიდი ჩემთვის არის მშობლიური ქალაქი და ძალიან ბუნებრივია ჩემთვის, რომ მე უნდა ვიბრძოლო ზუგდიდელთა ინტერესებისთვის.
_ რას ჰპირდებით ზუგდიდელებს?
_ რაც შეეხება რას ვპირდები ზუგდიდელებს… მე შემიძლია ერთადერთი დავპირდე ზუგდიდელებს, ყველაფერს გავაკეთებ იმისთვის, რომ მოვიპოვო მათი ნდობა. რამდენად დაიჯერებს ზუგდიდი ჩემი სურვილების გულწრფელობას, ამას არჩევნები გვიჩვენებს. ყოველ შემთხვევაში, მე შემიძლია შევთავაზო თანადგომა, თანაგრძნობა, მათი ინტერესებისთვის ბრძოლა ეხლაც, პარლამეტში და გადაწყვეტილებას ზუგდიდელი ამომრჩეველი მიიღებს.
_ რა პროგრამას შესთავაზებთ ზუგდიდელებს?
_ ჩვენს პარტიას პროგრამა უკვე შემუშავებული აქვს. მე დღეს და გუშინ არ დამიწყია ზოგადად ზუგდიდში მუშაობა. კარგა ხანია ვმუშაობ. თითქმის ყველა სოფელში მქონდა შეხვედრები და პროგრამაც წარდგენილი გვაქვს.
საზოგადოებამ იცის, ჩვენი პროგრამა არის ქართული სოფლის აღორძინება. უფრო სწორად, ჩვენი პროგრამის პრიორიტეტი.
ზუგდიდი არის ძირითადად სოფლის მოსახლეობით დასახლებული რაიონი. 104 უბანია ზუგდიდში. 80-მდე სოფელია. ძალიან მნიშვნელოვანია ის რომ ამ ადამიანის პრობლემები ამ ეტაპზე შევისწავლოთ. შემდეგ როგორც მაჟორიტარი დეპუტატი მე ვიბრძოლებ მათი პრობლემების მოგვარებისთვის და მათი ინტერესების დასაცავად.
_ თქვენ თუ იცით, ამ წუთისთვის რა არის ზუგდიდისთვის ძირითადი პრობლემა?
_ რა თქმა უნდა, ვიცი. ძირითადი პრობლემა არის ის, რომ ადამიანებს არ აქვთ სამუშაო. ძირითადი პრობლემა არის ის, რომ ამხელა მიწებთან ადამიანები არიან შიშველი ხელით დატოვებული და არ აქვთ არც საწვავი, არც ტექნიკა, შხამქიმიკატების შეძენის საშუალება. პრაქტიკულად ვერ მუშაობენ.
