დღესვე დაფიქსირდა ერთადერთი პრეტენდენტი _ ქალაქ რუსთავში რეგისტრირებული ფირმა “ტაო-ტბელი.”
“ტაო-ტბელს “ჯერ კულტურული მემკვიდრეობის დაცვის ეროვნულ სააგენტოდან არ დაკავშირებიან. ფირმის ხელმძღვანელი რამაზ ებრალიძე “გურია ნიუსთან” საუბარში აცხადებს, რომ უახლოეს საათებში ელოდება სააგენტოს პასუხს.
შპს”ტაო-ტბელი “2007 წელს დაარსდა და როგორც მისი მფლობელი აცხადებს, ისტორიულ ძეგლებზე მუშაობის 5 წლიანი გამოცდილება აქვთ.
“ჩემმა ფირმამ რესტავრაცია ჩაუტარა ხობის მონასტერს, ჩვენი რეაბილიტირებულია ბოლნისის სიონი, ასევე, ჯიხეთი გურიაში, დუშეთშიც მაქვს რამდენიმე ტაძარი აღდგენილი. ასე რომ, ფიროსმანის სახლ-მუზეუმსაც ისე აღვადგენთ, რომ მის პირვანდელ სახეს არანაირი საფრთხე არ დაემუქრება,” _ განაცხადა რამაზ ებრალიძემ “გურია ნიუსთან” საუბარში,
ებრალიძე აცხადებს, რომ პირადად იმყოფებოდა მირზაანში, დაათვალიერა მუზეუმის ავარიული შენობა და ვარაუდობს, რომ კულტურული მემკვიდრეობის დაცვის ეროვნული სააგენტოს მიერ შეთავაზებული 34 ათასი ლარი რესტავრაციისთვის საკმარისი იქნება.
საქართველოს კულტურული მემკვიდრეობის დაცვის ეროვნულმა სააგენტოს მირზაანში, ფიროსმანის სახლ-მუზეუმის რეაბილიტაციისათვის 34 ათასი ლარი მას შემდეგ გამოყო, რაც მსოფლიო ბანკმა მუზეუმი დასაფინანსებელი ობიექტების სიიდან ამოიღო.
1 თვის წინ, ფიროსმანის მუზეუმის რებილიტაცია-კონსერვაციის პროექტზე დაახლოებით 4 მილიონი დოლარი უნდა დახარჯულიყო. პროექტი, რომელსაც მსოფლიო ბანკი აფინანსებდა ითვალისწინებდა არა მარტო სახლ-მუზეუმის რესტავრაციას, არამედ მთელი ინფრასტრუქტურის მოწყობა-მოწესრიგებას.
ფიროსმანის მუზეუმის დირექტორი ნელი გობეჯიშვილი “გურია ნიუსთან” საუბარში აცხადებდა, რომ მსოფლიო ბანკისთვის წარდგენილი პროექტი შთამბეჭდავი, საინტერესო, მაგრამ ძვირდაღირებული სიამოვნება იყო: “პროექტი მზად გვქონდა, გაწერილი იყო თითოეული დეტალი, რაც ითვალისწინებდა მუზეუმის მთლიან განაშენიანებას დაახლოებით 6 ჰექტარ ფართობზე; გათვალისწინებული იყო ავტომანქანების სადგომის მოწყობა, აშენდებოდა ვიზიტორთა ცენტრი, გაკეთდებოდა ლამაზი ბილიკები, გაშენდებოდა ეთნოგრაფიული ვენახი, რომელშიც დავრგავდით ყველა ქართული ჯიშის ვაზს, მოწეული ყურძნით კი მუზეუმში არსებულ მარანში დაიწურებოდა ღვინო, რომელსაც ვიზიტორები დააგემოვნებდნენ, სამწუხაროდ, ეს პროექტი არ დაფინანსდა.”
მსოფლიო ბანკის პროექტის დირექტორმა ასმათ აბესაძემ სახლმუზეუმის სარეაბილიტაციო ნუსხიდან ამოღება გაბერილი ხარჯებით ახსნა.
