„ ნაციონალური მოძრაობის“ ზუგდიდის მაჟორიტარმა დეპუტატმა, ექიმმა ფრიდონ თოდუამ ირაკლი ჭელიშვილის გათავისუფლების შესახებ ბრძანება 2 კვირის წინ დაწერა.
ამ ინფორმაციას ირაკლი ჭელიშვილი „გურია ნიუსთან“ თავად ადასტურებს. მისივე განმარტებით, ფრიდონ თოდუამ მას თხოვა თავად დაეწერა განცხადება სამსახურიდან წასვლის შესახებ, რაზეც უარი მიიღო.
შეგახსენებთ, რომ ირაკლი ჭელიშვილი „ქართული ოცნების“ წევრია და ის პარტიის დამფუძნებელ ყრილობას ესწრებოდა
_ მითხრა, რომ დამეწერა განცხადება და წავსულიყავი სამსახურიდან საკუთარი ნებით, რაზეც უარი განვუცხადე, პაციენტი მყავდა ჩაწერილი საოპერაციოდ და ნამდვილად ვერ დავაღალატებდი მას. ფრიდონ თოდუას ვუთხარი, რომ თავად დაეწერა ბრძანება თუ სურვილი ჰქონდა და დაახლოებით 2 კვირის წინ დაწერა.
შეგახსენებთ, რომ მამა-შვილი მიხეილ და ირაკლი ჭელიშვილები ცნობილი ექიმები და ამ დარგის წამყვანი სპეციალისტები არიან. ისინი წლების განმავლობაში მუშაობდნენ თოდუას კლინიკაში.
„გურია ნიუსისთვის“ ცნობილი ხდება, რომ შესაძლოა თოდუას კლინიკა ბატონმა მიხეილ ჭელიშვილმაც დატოვოს, რომელიც ამჟამად შვებულებაში იმყოფება. სავარაუდოდ, შვებულების შემდეგ, ის კლინიკაში აღარ დაბრუნდება.
ირაკლი ჭელიშვილს სანამ დავუკავშირდებოდით, „გურია ნიუსი“ ფრიდონ თოდუას ესაუბრა. მან კატეგორიულად უარყო ეს ფაქტი.
„გურია ნიუსი“ მასთან ჩაწერილ ინტერვიუს უცვლელად გთავაზობთ.
_ ბატონო ფრიდონ, თქვენთან მუშაობდნენ ცნობილი ნეიროქირურგები, მამა-შვილი ჭელიშვილები, როგორც „გურია ნიუსისთვის“ გახდა ცნობილი, შვილი, ირაკლი ჭელიშვილი სამსახურიდან გაათავისუფლეთ. მიზეზად სახელდება ის, რომ ბატონი ირაკლი „ქართული ოცნების“ წევრია. ადასტურებთ ამ ინფორმაციას?
_ არა ბატონო, არა, არა! მაგი მე შვილივით მყავს გაზრდილი, 15 წელიწადია ჩემთან მუშაობდა. ჩვენი ინსტიტუტი საერთოდ აპოლიტიკურია და პირველად მესმის თქვენგან ასეთი რაღაც. პოლიტიკაზე ჩვენთან ინსტიტუტში საერთოდ არ ყოფილა ლაპარაკი.
_ ირაკლი ჭელიშვილი ისევ თქვენთან მუშაობს?
_ არა. თვითონ თქვა, _ წავალ, დამოუკიდებლად მინდა მუშაობაო. დასანანია „კანეშნა“ ამდენი ხანი ჩვენს ინსტიტუტში მუშაობდა, კარგი სპეციალისტია.
მაგრამ ყველას აქვს მასეთი რამე… კაცი რომ გაიზრდება… მეც ვიყავი ახალგაზრდა, მერე რომ გავიზარდე, განზე გავედი ჩემი პროფესორებიდან და დავიწყე ახალი საქმის გაკეთება. ყველა ახალგაზრდას უნდა, რომ დამოუკიდებლად იმუშავოს. მაგას ყოველთვის შეუძლია დაბრუნდეს ჩვენთან, ჩვენი ინსტიტუტის შვილად მიმაჩნია და დიდი ღვაწლი მაქვს მაგ პიროვნების მიმართ. ასე, რომ თქვენ ვიღაცამ არასწორი ინფორმაცია მოგაწოდათ.
ჩვენს ინსტიტუტში პოლიტიკაზე საერთოდ არ არის ლაპარაკი. “ოცნება” იქნება, “ნაციონალები”, “ედეპე” თუ “ქრისტიან-დემოკრატები”, საერთოდ არ არის ამაზე ლაპარაკი.
_ მიუხედავად იმისა, რომ პარლამენტარი ბრძანდებით და თანაც ხელისუფლების გუნდის წარმომადგენელი?
_ დიახ, დიახ, მე ვარ მაჟორიტარი დეპუტატი ზუგდიდის რაიონის. მე გავიმარჯვე ზუგდიდში და მიხარია, რომ ბევრი გავაკეთე ამ რიონისთვის.
_ თქვენ „ნაციონალური მოძრაობის“ მაჟორიტარი ბრძანდებით, ასეა ხო?
_ დიახ, დიახ. მე მინდა გითხრათ, რომ საერთოდ ბევრს არ ვლაპარაკობ, მაგრამ თქვენ გეტყვით, რომ ეგ არასწორი ინფორმაციაა. ამ საკითხებს საერთოდ არ ვაქცევ ყურადღებას, მთავარია, იყოს კარგი ექიმი, პროფესიონალი. თუ ექიმი პროფესიონალი არ არის, ჩამთან დიდხანს ვერ გაჩერდება.
_ ირაკლი ჭელიშვილის მშობლები თქვენთან მუშაობენ?
_ მამამისი მუშაობს ჩვენთან, დედამისიც. შვებულებაშია ახლა გასული და ორშაბათს დაბრუნდება.
ირაკლი ჭელიშვილი „გურია ნიუსთან“ საუბარში აცხადებს, რომ ის დირექტორის ბრძანების საფუძველზე წამოვიდა კლინიკიდან და ამის მიზეზად, ბოლო წლებში მასსა და ფრიდონ თოდუას შორის არსებულ უთანხმოებას ასახელებს.
_ ჩემი ამბავი რა მოსატანია, სხვაგან ვიმუშავებ, მაგრამ ფაქტი ესაა, ასე მოხდა. ნამდვილად ფრიდონ თოდუამ დაწერა ჩემი წასვლის შესახებ ბრძანება, მე არანაირი განცხადება არ დამიწერია.
_ ბატონო ირაკლი, „ქართულ ოცნებაში“ როდის გაწევრიანდით?
_ პარტიის დაფუძნება რომ იყო, მაშინ ვიყავი იქ მისული და ავტომატურად გავწევრიანდი. პოლიტიკაში წასვლას არ ვაპირებ, უბრალოდ ჩემი მხარდაჭერა მინდოდა გამომეხატა. შიშით კი არავის მეშინია. სპაციალობას ვერავინ წამართმევს.
_ თქვენი მშობლები ისევ თოდუას კლინიკაში მუშაობენ?
_ კი,დედა იქ მუშაობს, მამა ახლა შვებულებაშია, ვისვენებთ, მაგრამ არა მგონია, შვებულების შემდეგ კლინიკაშიდაბრუნდეს.
