_ ქალბატონო ელისო, როდის აპირებთ პრესკონფერენციას ჩატარებას და იმ ფაქტების გასაჯაროებას, რომელზეც ამ დღეებში საუბრობდით?
_ უფრო მოგვიანებით, სექტემბერში გამოქვეყნდება ეს მასალები, რომელიც ტყიბულიდან გავიტანე და საიმედო ადგილას არის შენახული. ეს განცხადები იმის გამო გავაკეთე, რომ მე მქონდეს აბსოლუტური დაცვის გარანტია
_ ამ განცხადების გაკეთების შემდეგ, ხელისუფლებისგან ხომ არავინ გამოგხმაურებიათ? მაგალითად, პავლე კუბლაშვილი…
_ იცით რა, ესენი სანდრო გირგვლიანის მკვლელობას არ გამოხმაურებიან და მაინცდამაინც ხელი არ აუკანკალდებათ, რამე რომ იყოს. მე გამოვეხმაურებოდი ასეთ ამბავს, მაგრამ ამისთვის სათანადო ზნეობა, მორალი, ადამიანობა და დავამატებდი, კაცობაც უნდა გაგაჩნდეს.
_ ამ განცხადების შემდეგ ჩვეულებრივად აგრძელებთ შეხვედრას მოსახლეობასთან?
_ მთელი დღე დავდივარ, მაქვს შეხვედრები ხალხთან და ყოველდღიურად ვხვდები მათ. ახლა დემონსტრაციულად ფეხით დავდივარ ქუჩაში.
_ კიდევ გითვალთვალებენ და გიღებენ სურათებს?
_ ტყიბულში ძალიან ბევრმა ადამიანმა მითხრა და კონკერეტულად მითხრეს, რა ადგილას გადამიღეს ფოტოები. მე არ გამოვრიცხავ, რომ ეს ყველაფერი კეთდებოდეს ჩემი პოლიტიკური საქმიანობის შესაწყვეტად, დაშინების მიზნით და ა.შ. ამ ადამიანებს უნდათ, რომ შემაშინონ, მაგრამ შიშით ნამდვილად არ მეშინია, უბრალოდ, სიფრთხილეს თავი არ სტკივა და აქედან გამომდინარე, საჭიროა, რომ ადამიანმა სიფრთხილის გარკვეული ზომები მიიღოს.
არც კი ვაპირებდი ამ ამბვის გახმაურებას, შეშინებაზე კი მეცინება, რადგან ამაზე უფრო სერიოზულ მოწინააღმდეგეებთან მქონია საქმე.
ელისო ჩაფიძემ “გურია ნიუსს” ახალი ინფორმაცია მიაწოდა:
_ მე, როგორც მოგეხსენებათ, ბოლო ექვსი თვის განმავლობაში გახლდით კონტრაქტორი ევროკავშირის და ჩამერიცხა ევროკავშირიდან თანხა და ტყიბულში, მთელი დღის განმავლობაში ვერ რიცხავენ ამ თანხას და ბოლომდე არ ვარ დარწმუნებული, რომ გადარიცხავენ. ჩემი პარტიის ანგარიშზე შევიტანო, მინდა ჩემი ხელფასი “შევწირო” ჩემს პოლიტიკურ საქმიანობას, რის საშუალებასაც საბანკო სექტორი არ მაძლევს.
