მან, დღეს ჟურნალისტებთან, ოზურგეთის დემოკრატიული ჩართულობის ცენტრში ახალი ინიციატივის თაობაზე ისაუბრა. მისი თქმით, დამოუკიდებლად შექმნა ოფისი, სადაც იქნებიან სამოქალაქო საზოგადოების და პოლიტიკური პარტიების წარმომადგენლები (ეს ის პოლიტიკური პარტიებია, რომლებიც არჩევნებში არ იღებენ მონაწილეობას), რომლებიც მხარს დაუჭერენ “ქართულ ოცნებას” და მის კანდიდატს, ზვიად კვაჭანტირაძეს.
_ იმისთვის, რომ მხარი დავუჭირო “ქართულ ოცნებას” და მის კანდიდატს, სავალდებულო არ არის იყო მის საარჩევნო შტაბში, ამის გაკეთება სხვაგვარადაც შეიძლება. ამიტომ არიან ადამიანები, რომლებიც მხარს უჭერენ მათ, _ გვითხრა ლელა ნაცვალაძემ.
მისივე თქმით, არჩევნების წელს, ხელისუფლება ცდილობს, რომ ყველანაირი რესურსი გამოიყენოს არჩევნების გასაყაბლებლად.
_ ოზურგეთის მუნიციპალიტეტის ბიუჯეტი 9 მილიონიდან 17 მილიონამდე გაიზარდა. ეს არის კატასტროფული ზრდა იმ მუნიციპალიტეტისთვის, სადაც ერთი სამუშაო ადგილიც კი არ შეუქმნია ამ ხელისუფლებას თუ არ ჩავთვლით საბიუჯეტო ორგანიზაციების საშტატო ზრდას. საკრებულოს თავმჯდომარე კი ამის თავს იწონებს და მეუბნება, რომ მე, თითქოს ბიუჯეტის ზრდა არ მიხარია.
არამიზნობრივად რომ იხარჯება ოზურგეთის მუნიციპალიტეტის ბიუჯეტი, ამის ერთ პატარა მაგალითს მოვიყვან: 21-ე საუკუნეში, საცხოვრებელი ადგილის კაპიროვკით დაწერილი ცნობა მიეწოდება ქალაქის რწმუნებულის აპარატიდან, რომ არაფერი ვთქვა იქ შექმნილ სამუშაო გარემოზე. ოზურგეთის კულტურის ცენტრს კი ვაკანსიების ადგილი უნდა ერქვას, იმდენი თანამშრომელი ჰყავს, აღარაფერს ვამბობ იმაზე, რომ აქ თავმოყრილია ჩინოვნიკების მეუღლეები, ნათესავები და უახლოესი მეგობრები. _ თქვა ლელა ნაცვალაძემ.
ჩვენს კითხვაზე თუ ვინ დააფინანსებს ოფისს, სადაც ისინი იქნებიან, მან გვიპასუხა:
_ მთავარი არ არის ფული, მთავარია, რომ იყოს მონდომება და მხარდაჭერა, მაგრამ ამ ოფისთვის მუშაობისთვის, გამოვიყენებ ჩემს 160 ლარს, რომელიც სადეპუტატო ხარჯის სახით მეძლევა ოზურგეთის მუნიციპალიტეტის საკრებულოდან.
შეხვედრას ესწრებოდნენ კოალიცია “ქართული ოცნების” ლიდერები ზვიად კვაჭანტირაძე და თემურ სალუქვაძე. პრესკონფერენციის დასასრულს ზვიად კვაჭანტირაძემ ჟურნალისტებთან ამ ფაქტთან დაკავშირებით კომენტარი გააკეთა:
_ ძალიან მნიშვნელოვანია პოლიტიკური აქტივობა, მათი აქტიურობა მეტად მნიშვნელოვანია, რომ საქართველოში სამართლიანი არჩევნები ჩატარდეს. თუ კი ასეთი ადამიანების გუნდი შეიკრება, მისასალმებელია. ლელა ნაცვალაძის პოლიტიკურ მოღვაწეობას კარგად ვიცნობ და ვიცი მისი აქტიურობა ოზურგეთის მუნიციპალიტეტის საკრებულოში, იქ მხოლოდ ორი ოპოზიციონერი, თემურ სალუქვაძე და ლელა ნაცვალაძე აქტიურობენ. კარგი იქნება, თუ ისინი იმ დარღვევებს დააფიქსირებენ, რაც ამ საარჩევნო წელს ხდება ოზურგეთში, _ თქვა ზვიად კვაჭანტირაძემ.
