დეპუტატის ქონებრივ დეკლარაციაში მითითებულია, რომ მიუხედავად რამდენიმე კომპანიის პარტნიორობისა, ბოლო სამი წლის განმავლობაში სარგებელი არ მიუღია. გოგუაძის შემოსავალი ხელფასის სახით 47 190.0 ლარი იყო.
გოგუაძეს, რომელსაც დეკლარაციის შევსების დროს, ხელზე, ფულის სახით 200 000 დოლარი ჰქონდა, 2012 წელს სესხი აქვს აღებული. ჩვენს კითხვაზე, თუკი ამდენი თანხა ჰქონდა, რა საჭირო იყო სესხის აღება, გვითხრა, რომ ამას მაშინ გვეტყვის, როცა გვნახავს. მისივე თქმით, მას დიდი ფული სახლში ყოველთვის ჰქონდა და ეს არც დაუმალავს.
საინტერესოა ისიც, რომ დეპუტატის 200 000-დოლარიან ლიმიტს, დეკლარაციების თანახმად, ბოლო 3 წელია ერთი დოლარიც არ მოკლებია. ისევე როგორც მისი მეუღლის თAნხას, რომელსაც როგორც 2011 წლის, ასევე 2012 წლის დეკლარაციის თანახმად, ნაღდი ფულის სახით 25 000 დოლარი ჰქონდა.
კიდევ ერთი შემომწირველი შპს „გზამშენი 18“-ის ხელმძღვანელი და ოზურგეთის მუნიციპალიტეტის საკრებულოს წევრი, თემურ ჯახვაა. მან „ნაციონალურ მოძრაობას“ 15 000 ლარი ჩაურიცხა.
თემურ ჯახვა ჩვენთან საუბარში ამბობს, რომ ეს თანხა პირადი ანგარიშიდან გადარიცხა. აღსანიშNავია, რომ ჯახვას კუთვნილ კომპანიას რამდენიმე სოლიდური სესხი აქვს.
შემომწირველთა სიაშია შალვა თოდრია, ჩოხატაურის მუნიციპალიტეტის ყოფილი გამგებელი და მიხო სვიმონიშვილის კუთვნილი კომპანიის „მარნეულის“ დირექტორი, რომელსაც 8000 ლარი აქვს გადარიცხული.
სიმონიშვილის კიდევ ერთი კომპანიის სს „წყალი მარგებლის“ პასუხისმგებელ პირს, ლევან გოგოლაძეს, ასევე 8000 ლარი აქვს გადარიცხული.
შალვა თოდრია „გურია ნიუსთან“ საუბრისას ამბობს, რომ თანხა პირადი ანგარიშიდან გადარიცხა. ჩვენს კითხვაზე, რატომ აქვს იგივე რაოდენობის თანხა გადარიცხული ლევან გოგოლაძეს და არის თუ არა ეს კავშირში კომპანიებთან, რომლებსაც ისინი ხელმძღვანელობენ, გვპასუხობს, რომ არა.
_ ეს ფული არავის მოუცია. ჩემი იყო და გადავრიცხე. რაც შეეხება ლევანს, ნამდვილად არ ვიცი, რა გადარიცხა, _ აღნიშნა თოდრიამ.
ლევან გოგოლაძესთან დაკავშირება ვერ მოვახერხეთ. მან ჩვენ სატელეფონო ზარებს არ უპასუხა.
