პრესსამსახურის უფროსის ნანა ვასაძის მტკიცებით, ბინები მოსამართლეებს მუდმივ სარგებლობაში არ გადაეცემათ.
“თბილისში ტრენინგებზე ჩამოსულ მოსამართლეებს მუდმივად ვუხდიდით ქირას, რაც ძალიან ძვირი ჯდებოდა. მოსამართლეებს 50 და 100-ლარიან ბინებში ხომ ვერ შევუშვებთ?! მოკლედ, aხლა ქირას აღარ გადაიხდის სახელმწიფო და მოსამართლეები ამ ბინებში იცხოვრებენ, როგორც სკოლის მოსწავლეები, რომლებსაც საცხოვრებელი არ გააჩნიათ თბილისში,” _ აცხადებს ნანა ვასაძე “გურია ნიუსთან” საუბარში.
უზენაესი სასამართლოს ინფორმაციით, საცხოვრებელ კორპუსის გარშემო ინფრასტრუქტურის მოწყობა იგეგმება. შესაძლებელია აქვე აშენდეს დამხმარე ნაგებობაც, რასაც იუსტიციის უმაღლესი სკოლა ტრენინგებისთვის გამოიყენებს.
აღსანიშნავია, რომ მშენებლობის გენერალურ გეგმაში, რომელიც დეტალურ ინფორმაციას იძლევა მომავალი შენობის სტრუქტურის შესახებ, დამხმარე ნაგებობაზე ან სასწავლო აუდიტორიებზე არაფერია ნათქვამი. გეგმის მიხედვით, 9-სართულიანი კორპუსის 1 სართული დაეთმობა სადარბაზოებს, 2-9 სართულები კი 2-ოთახიან, კეთილმოწყობილ ბინებს. თითოეულ სართულზე 6 ბინა განთავსდება, ყველა მათგანს ექნება აივანი, საშხაპე და სამზარეულო. თუ გავითვალისწინებთ იმას, რომ მოსამართლეების მგზავრობას და კვებას კვლავ საერთო სასამართლოების დეპარტამენტი აანაზღაურებს, ცოტა გაურკვეველია ამ მასშტაბის მშენებლობის ეკონომიკურ მომგებიანობაზე საუბარი. ასევე გაურკვეველია სასტუმროს ტიპის ბინაში, სადაც უზენაესი სასამართლოს მტკიცებით, მოსამართლეები სულ 2-3 დღე დარჩებიან, სამზარეულოს განთავსება. ასევე გაურკვეველია, მოკლევადიან ტრენიnგზე ჩამოსული მსმენელის 68 კვმ. ფართობის 2-ოთახიან ბინაში განთავსება.
პროექტის მიხედვით, ბინა დამკვეთს თეთრი კარკასის მდგომარეობაში ბარდება. ეს კი იმას ნიშნავს, რომ თუ 58 ბინას კონკრეტული მესაკუთრე არ ეყოლება იუსტიციის უმაღლესი საბჭო კიდევ რამდენიმე მილიონს გაიღებს ბინების რემონტის, ავეჯის, სამზარეულო მოწყობილობის და კიდევ უამრავი სხვა საყოფაცხოვრებო ნივთებისთვის, რადგან რეგიონებიდან ჩამოსული მოსამართლეები, ალბათ, თან გაზქურებს, საბან-ლეიბს თან ვერ. არადა, უზენაესი სასამართლოს განმარტებით, სახლის აშენების მიზანი თანხების დაზოგვაა.
“ბიუჯეტის სახსრების დაზოგვისა და იუსტიციის უმაღლესი სკოლის საქმიანობის გაუმჯობესების მიზნით, დაიგეგმა სწორედ აღნიშნული მრავალფუნქციური შენობის მშენებლობა,” _ ნათქვამია უზენაესი სასამართლოს მიერ “გურია ნიუსისთვის” გამოგზავნილ წერილში.
_ ქალბატონო ნანა, რამდენად ხშირად ტარდება ტრენინგები მოსამართლეებისთვის?
_ წელიწადში ეწყობა ასეულობით ტრენინგი მოსამართლეებისთვის, თითქმის ყოველ კვირა ტარდება ეს ტრენინგები, ჩამოდის ხალხი რეგიონებიდან და კანონი ავალდებულებს სასამართლოს, რომ მათ ბინა უქირაოს.
_ რამდენი დღე გრძელდება ტრენინგები?
_ როგორც წესი – 2-3 დღე.
_ ანუ ყოველ 2-3 დღეში შეიცვლებიან ამ ბინების მცხოვრებლები?
_ არა, როცა მოსამართლე აღარ იქნება მოსამართლე, ან როცა თბილისში ბინას შეიძენს, ის ჩვეულებრივ აღარ იცხოვრებს ამ ბინაში.
2013 წლიდან მოსამართლეებს მუდმივი ვადით დანიშნავენ. ეს კი შესაძლებელია იმას ნიშნავს, რომ ეს მოსამართლეები მუდმივად ისარგებლებენ ამ ბინებით.
