დაკავების მომენტიდან ისინი თავს უდანაშაულოდ თვლიდნენ და თავს პოლიტპატიმრებს უწოდებდნენ. ალექსანდრე ლასურიას, მიხეილ გარსკიას და ალიას აიბას უკვე უწოდეს “ნიკა რურუას პირადი პატიმრები”.
მიმდინარე წლის ზაფხულში, ოთხი აფხაზი ახალგაზრდა მეტადონის ჩანაცვლებით პროგრამაში მონაწილეობის მისაღებად თბილისში ჩამოვიდა. დაკავებამდე რამდენიმე დღით ადრე, ისინი მაღაზია “მონტე ნაპოლეონეში” შემთხვევით შეხვდნენ კულტურის მინისტრს ნიკა რურუას, რომელმაც ბიჭებს გამომწვევად დაუწყო თვალიერება. ლასურიას, რომელსაც წარმოდგენა არ ჰქონდა, რომ მის წინ მინისტრი იდგა, უცნობისთვის უკითხავს – ჩვენ ერთმანეთს ვიცნობთო? რაზედაც რურუას ჟარგონით უპასუხია „ვოზდუხ ობშიო”. მინისტრსა და ახალგაზრდებს შორის მცირე შეკამათება მოხდა, რის შემდეგაც, რურუამ მაღაზია დატოვა. როგორც ახალგაზრდები ვარაუდობენ, მინისტრის დაცვა ბიჭებს უკან გაჰყვა და მათი საცხოვრებელი ადგილი დააფიქსირა. მას შემდეგ, 2 დღის განმავლობაში, აფხაზების სახლთან დაბურულმინებიანი ავტომანქანები პატრულირებდნენ. 2 ივლისს, ისინი ყაზბეგის გამზირზე დააკავეს და მეთადონის აბები აღმოუჩინეს. გლდანის მერვე დაწესებულებაში გადაყვანის შემდეგ, “ნაციონალური მოძრაობა”, მათი მეშვეობით “ქართული ოცნების” დისკრედიტაციას შეეცადა და აფხაზებს ვიდეო ჩვენების ჩაწერას აიძულებდა.
“პატიმართა წამების ამსახველი ვიდეოკადრების გავრცელების შემდეგ, “ნაციონალური მოძრაობა” აფხაზ ახალგაზრდებს “ქართული ოცნების” დისკრედიტაციას აიძულებდა. კერძოდ, ახალგაზრდებს უნდა ეთქვათ, რომ თითქოს მათ გადმოჰქონდათ ფული და იარაღი ერთ-ერთი მათი ნაცნობისთვის, რომელიც “ქართული ოცნების” წევრი იყო. მათ წამებაში უშუალოდ მონაწილეობდნენ ხუჭუა და ოლეგ ფაცაცია. განსაკუთრებული ზეწოლა გახორციელდა ალექსანდრე ლასურიაზე. არც ერთმა მათგანმა ამ ბინძურ პოლიტიკურ თამაშში მონაწილეობა არ მიიღო, რის გამოც მათ მადლობა მინდა ვუთხრა,” _ ამბობს “გურია ნიუსთან” საუბარში “ქართული ოცნების” ადამიანის უფლებათა დაცვის კომიტეტის წევრი დავით ფაცაცია.
აფხაზი ახალგაზრდების დაცვა ადვოკატ გიორგი ყავლაშვილს მიანდეს, რომელიც დაკავებულების მშობლებს გაჩუმებას და ამ ამბის გახმაურებისგან თავის შეკავებას ურჩევდა.
მიუხედავად იმისა, რომ ბრალდებულებს აღიარებითი ჩვენება არ მიუციათ, დაცვის მხარემ მაინც საპროცესო შეთანხმების გაფორმება მოითხოვა, რასაც პროკურატურა დათანხმდა. რამდენადაც ისინი ბრალს არ აღიარებდნენ, შეთანხმება გაფორმდა არა ბრალზე, არამედ _ სასჯელზე.
ადვოკატი კობა კობახიძე აფხაზი ახალგაზრდების გათავისუფლებას ყოველგვარი თანხის გადახდის გარეშე მოითხოვდა. ის აცხადებდა, რომ სამომავლოდ, ქართულ -აფხაზური ურთიერთობებისათვის სასამართლოს დღევანდელ გადაწყვეტილებას უდიდესი მნიშვნელობა ჰქონდა: “არ მინდა ჩვენმა ძმებმა _ აფხაზებმა იფიქრონ, რომ ეს ბიჭები იყვნენ პოლიტიკური მძევლები და მათ გამოსახსნელად ფული გადაიხადეს. აქ 2 ათასზე არაა საუბარი, მილიონი რომ გვეთქვა, მილიონს ააგროვებდნენ კაპიკ-კაპიკ და ამ ბიჭებს მაინც გაიყვანდნენ აქედან, მაგრამ ჩვენი ქვეყნის პრესტიჟზე და იმ პოლიტიკაზე ვიფიქროთ, რაც ახალ ხელისუფლებას აფხაზ ხალხთან ექნება მომავალში,” _ განაცხადა ადვოკატმა კობახიძემ. მოგვიანებით, მას და მოსამართლეს შორის ვითარება დაიძაბა, ადვოკატი სასამართლოს შეურაცხყოფისთვის 500 ლარით დააჯარიმეს და დარბაზიც დაატოვებინეს. მოსამართლე ქეთევან ჯაჭვაძემ საპროცესო შეთანხმება დაამტკიცა, რომლის მიხედვითაც გარსკიას სასჯელის სახით 1000, ხოლო ლასურიას და აიბა ს კი 2-ათას ლარიანი ჯარიმა შეუფარდა.
“ეს იყო გარიგება პროკურორისა და მოსამართლის მონაწილეობით, მიუხედავად იმისა, რომ ამ პროკურორს ზემდგომებისაგან ჰქონდა მითითება, რომ ამ ადამიანების მიმართ დამდგარიყო სამართლიანი გადაწყვეტილება, მათ თვალთმაქცური გარიგებით მიიწვიეს ოჯახის ერთ-ერთი წარმომადგენელი და გაურიგდნენ. ოჯახებისთვის სულ ერთი იყო რაზე მოაწერდნენ ხელს, ოღონდ შვილები ციხიდან გაეყვანათ,” _ აცხადებს ფაცაცია ჩვენთან საუბარში.
როგორც ცნობილია, გათავისუფლებამდე, სოზარ სუბარმა ციხეში გენერალური ინსპექცია გაგზავნა და წამებასთან დაკავშირებით ახალგაზრდებს ჩვენება ჩამოართვა. დიდი ალბათობით, მათ მიერ დასახელებული ჯალათების საქმეში ახალი ეპიზოდი გაჩნდება.
გათავისუფლებული ახალგაზრდების მშობლებმა მადლობა გადაუხადეს ახალ ხელისუფლებას და აღნიშნეს, რომ არჩევნებში სააკაშვილის გამარჯვების შემთხვევაში, ისინი მკვდარ შვილებს წაიყვანდნენ აქედან.
“დიდი ხნის წინ რომ ყოფილიყო ისეთი ხელისუფლება, როგორიც დღეს ჰყავს საქართველოს, ქართულ -აფხაზური ომი არ მოხდებოდა; მადლობა მინდა გადავუხადო პატრიარქს, მინისტრებს, ჟურნალისტებს, ყველას, ვინც ჩვენი შვილების გათავისუფლების საქმეში წვლილი შეიტანა,” _ აცხადებს “გურია ნიუსთან” საუბარში ეთერ აიბა.
დავით ფაცაციას შეფასებით, აფხაზი ახალგაზრდების დაკავება და ციხეში მათი წამება, სააკაშვილის მორიგი უგუნური ნაბიჯი იყო, რაც ქართულ-აფხაზური ურთიერთობების კიდევ უფრო დაძაბვას ემსახურებოდა.
გათავისუფლებულ ახალგაზრდებს დღესვე გადაეცემათ პასპორტები, ამავე დროს, ხელისუფლება საზღვრამდე მათ უსაფრთხო გადაადგილებასაც უზრუნველყოფს.
