აჭარის საკანონმდებლო ორგანოს ავთანდილ ბერიძე ხელმძღვანელობს. ბერიძე, წლების განმავლობაში, “რესპუბლიკური პარტიის” რიგებში ირიცხებოდა, თუმცა გასულ წელს, მას შემდეგ, რაც რესპუბლიკელებმა მურმან დუმბაძე პარტიული რიგებიდან გარიცხეს, ბერიძემ, მურმან დუმბაძის სხვა თანამოაზრეებთან ერთად, დატოვა “რესპუბლიკური პარტია” და არასამთავრობო ორგანიზაცია “ემსახურე საქართველოს” დამფუძნებელი გახდა. სწორედ ეს ორგანიზაცია იყო, რომელსაც მურმან დუმბაძე ხელმძღვანელობდა და ერთ-ერთი პირველები იყვნენ, რომელთაც ბიძინა ივანიშვილს მხარდაჭერა გამოუცხადეს. ამ ორგანიზაციის რამდენიმე წევრი დღეს აჭარის საკანონმდებლო ორგანოშია დასაქმებული. ორგანიზაციის თავკაცი კი, საქართველო პარლამენტში ბათუმის მაჟორიტარია.
აჭარის უმაღლესი საბჭოს ოფიციალურ ვებგვერდზე ავთანდილ ბერიძის განათლებისა და სამუშაო გამოცდილების შესახებ გრაფა ცარიელია. საიტზე მხოლოდ ის არის მითითებული, რომ ბერიძე 2012 წლის 02 ოქტომბერს დაიბადა. ეს ტექნიკური შეცდომაა თუ პოლიტიკური დაბადების თარიღი, ვებგვერდის რიგითი ვიზიტორის შესაფასებელია.
ავთანდილ ბერიძის მსგავსად საიტზე ინფორმაციის მოძიება ვერ ხდება “ემსახურე საქართველოს” კიდევ ერთი წევრის და დღესდღეობით უმაღლესი საბჭოს წევრის მედეა ვასაძის შესახებ. ვასაძეც ყოფილი რესპუბლიკელია. მთავარი კანონმდებლის მსგავსად, ვასაძის დაბადების თარიღად მიმდინარე წლის 3 ოქტომბერია. ინფორმაციის მოძიება ვერ ხდება რესპუბლიკელ გიორგი მასალკინის, “თავისუფალ-დემოკრატ” სულხან ღლონტის და “ბიძინა ივანიშვილი – ქართული ოცნების” წევრ ალექსანდრე ჩიტიშვილის შესახებ.
რაც შეეხება საკანონმდებლო ორგანოს სხვა დეპუტატებს; ირაკლი (იგივე “მაილო”) ჯაში, რომელმაც უმაღლესი საბჭოს პირველ სხდომაზე ბიძინა ივანიშვილს სამი ლექსი მიუძღვნა, 1942 წელს ბათუმში დაიბადა. დაამთავრა თბილისის სკოლა-ინტერნატი. იყო ფეხბურთში საქართველოს ახალგაზრდული ნაკრების გუნდის კაპიტანი. დამთავრებული აქვს ბათუმის სავაჭრო ტექნიკუმი სასურსათო საქონელთმცოდნეობის განხრით. შემდეგ სწავლა მოსკოვში ინჟინერ-ტექნოლოგის კვალიფიკაციით განაგრძო.
ირაკლი ჯაში, 1961-63 წლებში, ბათუმის მანქანათმშენებელ ქარხანაში მღებავად მუშაობდა. მოგვიანებით იგი დაწინაურდა და სასადილოს საწყობის გამგე, შემდეგ კი სასკოლო კვების კომბინატის დირექტორი გახდა. 1996 წელს უკვე საკუთარი შპს “ოდისეა” დააფუძნა. პოლიტიკაში, ჯაში, 1999 წლიდან “მრეწველობა გადაარჩენს საქართველოს” წევრობით გამოჩნდა. იგი დღემდე ერთგულად ამ პოლიტიკური გაერთიანების წევრია.
მერაბ აბაშიძე განათლებით ფილოსოფოსია, თუმცა მისი პირველი სამუშაო ეკატერინბურგის ქარხნის “სოიუზმეტროსპეცსტროიში” გვირაბგამყვანის მომპირკეთებლად მუშაობდა. 90-იან წლებში კი, ეკატერინბურგში მეგობრებთან ერთად შპს “არგო” დააფუძნა. 2003-2006 წლებში კი შპს “მერკურის” მომმარაგებელად მუშაობდა. პოლიტიკაში 2009 წლიდან ჩაერთო და “ეროვნული ფორუმის” წევრი გახდა. დღეს კი აჭარის უმაღლესი საბჭოს აგრარული და თვითმმართველობის საკითხთა კომისიის თავმჯდომარის მოადგილეა.
უმაღლესი საბჭოს თავმჯდომარის მოადგილე დავით ბაციკაძე პოლიტიკაში წლებია ჩართულია. იგი წინა 2004-08 წლების მოწვევის უმაღლესი საბჭოს წევრი იყო. ბაციკაძეს ღვინისა და სამადუღრე წარმოების სპეციალობა აქვს დამთავრებული (ინჟინერ-ტექნოლოგის სპეციალობა). სხვადასხვა დროს მუშაობდა პედაგოგად, ჟურნალისტად და ფარიკაობის ფედერაციის პრეზიდენტად. 1995 წლიდან არის საქართველოს კონსერვატიული პარტიის წევრი.
ციხისძირის კოლმეურნეობის წევრობით დაიწყო სამუშაო გამოცდილება ანზორ თხილაიშვილმა. იგი განათლებით ეკონომისტია და განათლება თსუ-ში მიიღო. განათლების მიღების შემდეგ, მშობლიურ ციხისძირის ციტრუსების მეურნეობის მთავარ ეკონომისტად განაგრძო მუშაობა. 1991 წელს კი, ქობულეთის პრეფექტი გახდა. იმავე წელს აჭარის უზენაესი საბჭოს დეპუტატი გახდა. იგი, აბაშიძის დროს, 6 წლის განმავლობაში აჭარის გარემოს დაცვის და ბუნებრივი რესურსების მინისტრად მუშაობდა. ასევე იყო ქობულეთის საკრებულოს ბოლო მოწვევის დეპუტატი, თუმცა მიმდინარე წელს საკრებულო დატოვა და უმაღლეს საბჭოს წევრად იყარა კენჭი.
განათლებით გეოგრაფი თემურ კახიძე დღეს უმაღლესი საბჭოს წევრია. იგი თავისივე სოფელში საშუალო სკოლის პედაგოგად მუშაობდა. მოგვიანებით კი, საკალათბურთო კლუბ “ბასკოს” მთავარ მენეჯერად მუშაობდა. ასევე მუშაობდა საზღვაო აკადემიის გუნდის მწვრთნელად. 2010 წლიდან ხელვაჩაურში “თავისუფალ დემოკრატებში” საინიციატივო ჯგუფის ხელმძღვანელი გახდა.
სვეტლანა კუდბა განათლებით იურისტია. კარიერა სამშენებლო მოძრავ-მექანიზირებული კოლონის ინსპექტორობით დაიწყო. იყო ბათუმის ღვინის ქარხანაში საქმეთა მმართველი. ხელმძღვანელობდა აჭარაში მერაბ კოსტავას საზოგადოებას. 19 წლის განმავლობაში კი “წმინდა ნინოს და წმინდა ფრანჩესკოს” საქველმოქმედო ფონდის თავმჯდომარე იყო.
აჭარის უმაღლესი საბჭოს ჯანდაცვისა და სოციალურ საკითხთა კომისიის თავმჯდომარე ჯემალ ფუტკარაძე განათლებით პროვიზორია. მუშაობდა აფთიაქის გამგედ, ლაბორანტად, ფაკულტეტის დეკანად და მიწვეულ პროფესორად. გამოქვეყნებული აქვს 84 სამეცნიერო ნაშრომი, 2 მონოგრაფია; არის 4 პატენტის ავტორი.
აჭარის ავტონომიური რესპუბლიკის უმაღლესი საბჭოს ფრაქციის “ქართული ოცნება” თავმჯდომარე აკაკი ძნელაძე განათლებით ხატვა-ხაზვის მასწავლებელია. მუშაობა აჭარის მხატვართა კავშირში დაიწყო. დღემდე არის საქართველოს მხატვართა კავშირის წევრი. აქვს ტელე გამოცდილებაც. 2009-10 წლებში ტელეპროექტ “სამი სკამის” ავტორი და წამყვანი იყო, ხოლო 2011 წელს ტელეგადაცემის “ჩაკეტილი სივრცე” წამყვანი და ავტორი იყო.
რაც შეეხება უმაღლესი საბჭოს ნაციონალ წევრებს; მურმან ბერიძეს ისტორიის მასწავლებლის კვალიფიკაცია აქვს. სამუშაო გამოცდილებაში წერია, რომ იგი სხვადასხვა კომკავშირულ და პარტიულ თანამდებობებზე მუშაობდა. იყო აჭარის უმაღლესი საბჭოს მე-12 მოწვევის ბათუმის მაჟორიტარი. აბაშიძის დროს მუშაობდა უზენაესი საბჭოს სხვადასხვა თანამდებობებზე. 2004-2006 წლებში ბათუმის მერის მოვალეობის შემსრულებელი იყო, საიდანაც აჭარის სოფლის მეურნეობის მინისტრის პირველ მოადგილედ გადაინაცვლა.
ქედის რაიონის ყოფილი გამგებელი დღეს უმაღლეს საბჭოში საკუთარ რაიონს წარმოადგენს. თუმცა, ირაკლი ბარამიძის შესახებ უმაღლესი საბჭოს ვებგვერდზე ინფორმაცია არ მოიპოვება. მაღალმთიანეთის კიდევ ერთი მაჟორიტარი, ხულოელი თემურ ბოლქვაძე თამბაქოს ქარხანაში მუშად მუშაობდა. შემდეგ სწავლა თბილისის სახელმწიფო უნივერსიტეტში ფიზიკის მიმართულებით გააგრძელა. 1990 წელს უშიშროების სამინისტროს აკადემიაში სამართალმცოდნეობის სპეციალური კურსები გაიარა. მუშაობდა სოფ. კორტოხის საშუალო სკოლის პედაგოგად, ხულოს რაიკომის მდივნად, იყო უმაღლესი საბჭოს წევრი, 2011-12 წლებში კი, ხულოს გამგებლად მუშაობდა. ამჟამად მშობლიური რაიონის მაჟორიტარია აჭარის საკანონმდებლო ორგანოში.
ასმათ დიასამიძე განათლებით დაწყებითი სკოლის პედაგოგია. მუშაობდა ბათუმის #9 სკოლის პედაგოგად, #1 სკოლის დირექტორის მოადგილედ და დირექტორად. იყო წინა მოწვევის უმაღლესი საბჭოს წევრი.
უმაღლესი საბჭოს კიდევ ერთი ქალბატონი წევრი ეკატერინე თარგამაძე საკანონმდებლო ორგანოში ბათუმის საკრებულოდან გადავიდა. თარგამაძე განათლებით ინჟინერ-ეკონომისტია. მუშაობდა ეკონომიკის მინისტრის თანაშემწედ, აჭარის ფინანსთა სამინისტროს ეკონომიკური განვითარების დეპარტამენტის უფროსად, მერიის საფინანსო-ეკონომიკური სამსახურის უფროსად.
ბათუმის ყოფილი მერი, რობერტ ჩხაიძეც განათლებით ინჟინერ-ეკონომისტია. კარიერა აჭარის ა/რ სტატისტიკის დეპარტამენტის გამომთვლელ ცენტრში ოპერატორად დაიწყო. მოგვიანებით იმავე უწყებაში განყოფილების უფროსი გახდა. 2000-2004 წლებში განათლება სამართალმცოდნეობის მიმართულებით გააგრძელა. სწავლის დამთავრების შემდეგ, ბათუმის მერიის სახელმწიფო ადგილობრივი სამსახურის უფროსად დაინიშნა. 2005 წელს ბათუმის მერის მოადგილედ დაინიშნა. 2007 წელს კი ქალაქის მერად იქნა არჩეული. იგი მერის თანამდებობაზე მიმდინარე წლის 29 აგვისტომდე მუშაობდა. უმაღლესი საბჭოს წევრების მიხეილ მჟავანაძის და პეტრე ზამბახიძის შესახებ საკანონმდებლო ორგანოს ოფიციალურ საიტზე ინფორმაცია არ მოიპოვება.
