საიტებზე ძირითადად ხელმძღვანელი პირების შესახებ ინფორმაციის განახლება მოხდა, სიახლეების მხრივ კი მხოლოდ მინისტრებისა და მთავრობის თავმჯდომარის შეხვედრების შესახებ ინფორმაციის განახლება ხდება.
აჭარის მთავრობის ოფიციალური ვებგვერდის მისამართი ერთი წლის წინ შეიცვალა. adjara.gov.ge – ajara.gov.ge-ით შეცვალეს. საიტზე ყოველდღიურად ხდება სიახლეების განახლება, თუმცა ეს სიახლეები ძირითადად მთავრობის თავმჯდომარის შეხვედრების ამსახველ ახალ ამბებს და ფოტოებს წარმოადგენს. საიტზე დევს მთავრობის თავმჯდომარის და მინისტრების საგანმანათლებლო-სამუშაო რეზიუმე. მთავრობის სხვა თანამშრომელთა შესახებ ინფორმაციის მოძიება ვებგვერდზე არ ხერხდება.
ვებგვერდზე არ დევს აჭარის ავტონომიური რესპუბლიკის კონსტიტუცია. საქართველოს კონსტიტუციის სანახავად კი საქართველოს პარლამენტის ვებგვერდზე გადამისამართება ხდება. საიტზე მხოლოდ “კანონი მთავრობის შესახებ” დევს. ვებგვერდის ველი მთავრობის რეგლამენტის შესახებ ცარიელია.
ერთადერთი ე.წ. “ფანჯარა” სახელით “აჭარის შესახებ” სრულად მოიცავს ინფორმაციას აჭარის რაიონების შესახებ. თუმცა, ამ გრაფაში ვერ მოხვდა აჭარის ავტონომიური რესპუბლიკის დედაქალაქი ბათუმი.
საიტზე არ დევს აჭარის მიმდინარე წლის ბიუჯეტი. არც მომავალი წლის ბიუჯეტის პროექტი. საიტზე, რომელიც საჯაროობის ერთ-ერთი ინსტრუმენტია, არ მოიპოვება მთავრობის დადგენილებები, გადაწყვეტილებები, ბრძანებები და სხვა სამართლებრივი დოკუმენტაცია.
საიტი მხოლოდ ორ: ქართულ და ინგლისურ ენაზეა. რაც შეეხება აჭარის სამინისტროებს, ავტონომიურ რესპუბლიკას ოთხი სამინისტრო აქვს.
ფიანანსთა და ეკონომიკის სამინისტროს ვებ გვერდზე სამინისტროს სტრუქტურა, თანამშრომლების, სამინისტროს დებულებებისა და სტრატეგიული გეგმის შესახებ ინფორმაცია მეტ-ნაკლებადაა წარმოდგენილი. საიტზე ინფორმაცია ბიუჯეტის შესრულების 3,6,9 თვის ანგარიშები არ დევს. არც მომავალი წლის ბიუჯეტის პროექტია. საიტის აქტიური სიახლის ველზე მიმდინარე წლის 22 მარტის „შერატონის“ შესახებ დევს ინფორმაცია.
თანამშრომელთა შესახებ ინფორმაცია მხოლოდ მისი სამუშაო თანამდებობით შემოიფარგლება და ძირითად შემთხვევაში, მათ შესახებ გრაფა ცარიელია.
საიტს აქვს ამინდის პროგნოზის გაჯეტი, თუმცა ეს უკანასკნელი არ მუშაობს და საიტზეც მუდმივად ერთი ტემპერატურაა. საიტის ველში “დაგვეკონტაქტეთ” მითითებულია ყოფილი მინისტრის, მინისტრის მოადგილეებისა და იმ თანამშრომელთა სახელი და გვარები, რომელთა ნაწილიც სამინისტროში უკვე აღარ მუშაობს ან სამუშაო პოზიცია შეიცვალა.
მიმდინარე წლის ბიუჯეტი 9 თვის ანგარიშის შესახებ ინფორმაცია გამოქვეყნებულია აჭარის ჯანდაცვის სამინისტროს ვებ გვერდზე. თუმცა 2013 წლის ბიუჯეტის პროექტის შესახებ ინფორმაცია არ მოიპოვება. საიტზე სიახლის გახსნის შემდეგ სიახლე საიტის ქვემოთა ნაწილში ქვეყნდება, რაც ერთგავარად ვიზიტორის დაბნეულობას იწვევს, რადგან „დაკლიკების“ შემდეგ ინფორმაცია საიტზე არ ჩნდება.
საიტზე სამინისტროს მაღალი რანგის თანამშრომელთა შესახებ ინფორმაცია შედარებით ვრცლადაა წარმოდგენილი. მაგალითად საიტიდან ირკვევა, რომ თბილისის 03-ის ექიმი, რომელსაც სხვა სამუშაო გამოცდილება არ აქვს, ახლა ჯანდაცვის მინისტრის მოადგილეა, თუმცა საიტზე ბოლოს განახლებული პოსტების უდიდესი ნაწილი 2010-2011 წლებს განეკუთვნება.
აჭარის სოფლის მეურნეობის სამინისტროს ვებ გვერდზე შესვლისას ყურადღებას იქცევს ე.წ. “ქუდში” წარმატებული სოფლის მეურნეობის ფოტოები: ყვითელი მანდარინი, წითელი პომიდორი, ცვარიანი ყურძენი და მწყემსი ქალი.
საიტზე თითოეული დეპარტამენტის თანამშრომელის სახელი და გვარი წერია, თუმცა მათ შესახებ ინფორმაციის წვდომის საშუალებას საიტი არ იძლევა. ინტერნეტ ველში “კანონმდებლობა” 30-მდე სხვადასხვა კანონის ლინკია, თუმცა კანონთა თავში ქვეყნის კონსტიტუცია დევს. საიტიდან ვიგებთ, რომ არსებობს “იაფი კრედიტი”-ს პროგრამა, რომლის ფარგლებშიც 14 პროექტი დაფინანსებულა (ჯამში 5.6 მილიონი ლარით). საიტზე ცალკე გვერდი ეთმობა პუბლიკაციებს, სადაც ინტერნეტმომხმარებელს საშუალება აქვს ხელოვნური დათესვის, ციტრუსოვანი ბაღების განოყიერება და მავნებლებთან ბრძოლის წესები ისწავლოს.
აჭარის განათლების და კულტურის სამინისტროს ვებგვერდზე სხვა სამინისტროებისგან განსხვავებით ინფორმაციის მოპოვება გაცილებით მარტივია. საიტი შედარებით მოქნილი და ინფორმაციულია. მაგრამ თანამშრომელთა შესახებ ინფორმაცია სრულად არ არის წარმოდგენილი.
აჭარის მთავრობისა და სამინისტროების ოფიციალურ ვებგვერდებზე ინფორმაციის განახლებას ძირითადად საზოგადოებასთან ურთიერთობის სამსახურის ხელმძღვანელი პირები ახდენენ. მთავრობას საჯაროობის მაგალითად ხშირად ვებგვერდზე გამოქვეყნებული ინფორმაცია მოჰყავს, თუმცა ხშირ შემთხვევაში, ვებგვერდებზე საჯაროობისათვის აუცილებელი ინფორმაციებიც კი არ დევს. არც ერთ სამინისტროს არ აქვს წარმოდგენილი მთავარი ფინანსური დოკუმენტი, არც მომავალი წლის ბიუჯეტის პროექტი დევს. არ არის გამოქვეყნებული მინისტრების ან სხვა თანამდებობის პირთა გადაწყვეტილებები და ბრძანებები. საიტზე ინფორმაციის ძირითად ნაწილს ოფიციალური შეხვედრები წარმოადგენს, რომელიც მედიის საშუალებით ისედაც ვრცელდება.
