თათბირს მუნიციპალიტეტის ყოფილი გამგებელი და ნაცმოძრაობის ადგილობრივი ლიდერი გიორგი გოგუაძეც ესწრებოდა. საკრებულოს წევრი ამირან გიგინეიშვილი, ჩვენს კითხვას _ რა ხდება საკრებულის თავმჯდომარის კაბინეტში და რასთან დაკავშირებით თათბირობს გოგუაძე უმრავლესობასთან, კითხვითვე პასუხობს: _ დაგავიწყდათ ვინ არის გია გოგუაძე?
_ არ დაგვვიწყებია და ვიცით, რომ “ნაციონალური მოძრაობის” ლიდერია, მაგრამ ის ხომ აღარაა საჯარო პირი და შესაბამისად, აღარც მუნიციპალურ შენობაში აღარ აქვს ასეთი შეხვედრების გამართვის უფლება?
_ აქ რა ხდება, იცით? დღეს არის ჩვენი მეგობრის დედის დაკრძალვა და ყველამ მოვიყარეთ თავი დაკრძალვაზე წასასვლელად, _ გამოსავალი სწრაფად იპოვა ამირან გიგინეიშვილმა.
ეტყობა, მისი პასუხი გაიგონა და მოიწონა საკრებულოს კიდევ ერთმა წევრმა გოჩა ჯანაშიამ _ მანაც ანალოგიური პასუხი გასცა ჩვენს შეკითხვას.
_ ყოველთვის ასე ხდება, ერთად იკრიბებით, საკრებულოს შენობაში თათბირობთ და პარტიის ლიდერთან ერთად კოლექტიურად დადიხართ გასვენებებში?
_ ძალიან ხშირად! _ მოკლედ გვიპასუხა ჯანაშიამ.
ბოლოს საკრებულოს თავმჯდომარის კაბინეტიდან თავად გიორგი გოგუაძეც გამოვიდა. მან დაადასტურა, რომ უმრავლესობის წევრებთან ჰქონდა შეხვედრა და ლანჩხუთში დღეს არსებულ სიტუაციაზე იმსჯელეს. გიორგი გოგუაძემ განაცხადა, რომ ისევ გამგებლობას არ აპირებს, მაგრამ ქალაქში განვითარებული მოვლენები ძალზე აწუხებს:
_ მაწუხებს ის, რომ ჩემი სახელი ადმინისტრაციული შენობის წინ გამართულ აქციაზე სხვადასხვა კონტექსტშია მოხსენებული. მაწუხებს ის, რომ ადგილობრივი მედიის წარმომადგენელი ფინანსთა სამინისტროში მასალების გაგზავნით მემუქრება… არაფრის არ მეშინია. შემოვიდეს ფინანსთა სამინისტრო ლანჩხუთის გამგეობაში და ნახეთ, რა დარღვევებს აღმოაჩენს ჩემი გამგებლობის პერიოდის დოკუმენტაციაში.
_ გავრცელდა ხმები, რომ თქვენ სურვილი გამოთქვით იმ კომისიის მუშაობაში მიგეღოთ მონაწილეობა, გამგებლობის კანდიდატის შესარჩევად რომ შეიქმნა…
_ სწორედ ამაზე ვსაუბრობდი ორი წუთის წინ. ამ კომისიის წევრობის არანაირი სურვილი არ მაქვს. ზოგიც ამბობს, რომ თუ მე შემიყვანენ, კომისიას დატოვებს. ისე ვითარდება მოვლენები, რომ ცდილობენ ყველა სიბინძურე ჩემს სახელს დაუკავშირონ. ამიტომ, იძულებული გავხდი გავაქტიურდე და სისტემატურად გავმართო შეხვერდები საკრებულოს უმრავლესობასთან.
გიორგი გოგუაძემ უარყო ისიც, რომ საკუთარი კანდიდატი ჰყავს გამგებლის თანამდებობის დასაკავებლად შერჩეული:
_ მალე პრეზენტაციას მოვაწყობ და ყველასთვის, მათ შორის პრესისთვისაც გავხდი ნათელს, რა პროექტები გავაკეთე ლანჩხუთში ჩემ გუნდთან ერთად, _ განაცხადა ყოფილმა გამგებელმა.
