“გურია ნიუსის” ინფორმაციით, ღვინიაშვილის წინადადება ასეთი იყო: უნდა გადადგეს ოზურგეთის მუნიციპალიტეტის საკრებულოს თავმჯდომარე ალეკო მამეშვილი, მისი ადგილი კი დროებით, მოადგილე ავთანდილ მექვაბიშვილმა უნდა დაიკავოს.
ბესო ღვინიაშვილის სტუმრობა ოზურგეთში “გურია ნიუსთან” ავთანდილ მექვაბიშვილმაც დაადასტურა, მართალია უარყო ინფორმაცია იმის შესახებ, რომ ღვინიშვილის მხრიდან რაიმე ზეწოლის ფაქტებს ჰქონდა ადგილი, თუმცა შეხვედრის დეტალებზე ისაუბრა. ხოლო ბესო ღვინიაშვილმა “გურია ნიუსთან” ყველანაირი ოფიციალური შეხვედრა უარყო და თქვა, რომ ის გურიაში მეგობრების სანახავად იყო ჩამოსული.
_ ნამდვილად იყო ღვინიაშვილი? ამ ინფორმაციას საიდან ფლობთ?_ გვკითხა მექვაბიშვილმა
_ ნამდვილად ბრძანდებოდა და თქვენ შეგხვდათ, ბატონო ავთო. ჩვენი ინფორმაციით, საკრებულოს თავმჯდომარის გადადგომის შესახებაც იმსჯელეთ, მართალია ეს ამბავი?
_ ჩემთან როგორ შეიძლება ეს საკითხი განიხილებოდეს? ეს თემა სამართლებრივად უნდა გადაწყდეს. ჯერ ერთი, ეს საკითხი ასე არ დგას, რაც შეეხება ბატონ ბესო ღვინიაშვილს, ის ნამდვილად არის იმ საკოორდინაციო საბჭოს წევრი, რომელიც რეგიონალური მართვისა და თვითმმართველობების საკითხებს სწავლობს და განიხილავს. მე მას გავეცანი, ამ დღეებში ნამდვილად იყო ჩამოსული, ეს იყო შაბათი დღე და შევხვდით ადმინისტრაციულ შენობაში, მე ვიყავი სამსახურში, მობრძანდა ბატონი ბესო, გვქონდა საუბარი რაღაც თემებზე.
_ რა თემებზე გქონდათ საუბარი?
_ საერთოდ თვითმმართველობებზე, თვითმმართველობის რეფორმაზე, როგორც გავიგეთ ძალიან სერიოზულ რეფორმებს აპირებენ, შეიძლება შევიდეს თვითმმართველობის კანონში რაღაც ცვლილებები და მე როგორც თვითმმართველობის ძალიან გამოცდილი კადრი… ამ შემთხვევაში, გავიარეთ ეს საკითხები. აი ამ თემებზე იყო საუბარი. ის რომ ვინმეს მისამართით ზეწოლა ხდება, ის რომ უნდა გადადგეს საკრებულოს თავმჯდომარე ალეკო მამეშვილი და მისი ადგილი უნდა დაიკავოს სხვამ, ამაზე საუბარი ნამდვილად არ ყოფილა. ჩვენ მთელი საათი გვქონდა საუბარი სწორედ რეფორმის საკითხებზე.
ღვინიაშვილმა განაცხადა, რომ მას სურს შეხვდეს საკრებულოს რამდენიმე წევრს, იმიტომ, რომ ჩამოუყალიბდეს აზრი ოზურგეთის საკრებულოზე და შემდეგ ექნება მას დიდი შეხვედრა იმასთან დაკავშირებით, რა ფორმით განხორცილდება რეფორმები.
_რა კუთხით უნდა განხორციელდეს რეფორმები? კონკრეტულად რაიმე მონახაზი არის?
_ ჯერჯერობით, ინფორმაცია გროვდება იმის შესახებ, რა და როგორ შეიძლება. ბუნებრივია, აქ გათვალისწინებული იქნება დასავლური ქვეყნების გამოცდილებაც. პირადად მე, ვერ ვხედავ თვითმმართველობებში განსაკუთრებული ცვლილებების შეტანის აუცილებლობას, ამის შესახებ ღვინიაშვილსაც ვესაუბრე, თუმცა უფრო უნდა დაიხვეწოს და ქმედითუნარიანი გახდეს.
_ ბატონო ავთო, ინფორმაცია გვაქვს, რომ დეპუტატებზე ზეწოლა ხორცილდება…
_ რა ფორმით გამოიხატება?
_ თუ ისინი არ დატოვებდნენ ნაც.მოძრაობას, ემუქრებიან პოლიციაში და პროკურატურაში დაბარებით, შეახსენებენ ძველ ამბებს და ა.შ.
_ წარმოუდგენელია, ასეთი რამ მოხდეს.
_ თუმცა ხდება… შეგახსენებთ გამგებლის, ილია ვაშაყმაძის ფაქტს…
_მე შემიძლია გითხრათ ერთი რამ: არცერთი დეპუტატის მიმართ არ განხორციელებულა არანაირი ზეწოლა. დარწმუნებული ვარ, არცერთი ძალოვანი სტრუქტურა არ ჩაერევა თვითმართველობის საკითხებში. ამდენი ხანია აქ ვარ, თვითმმართველობაში ვმუშაობ დიდი ხანია და არცერთ ძალოვან სტრუქტურაში არ ვყოფილვარ დაბარებული, ვარ აბსოლიტურად დამოუკიდებელი, მე ჩემს აზრს ყოველთვის გამოვთქვამ.
“გურია ნიუსი” ამ ვიზიტის მიზნობრიობის გასარკვევად ბესო ღვინიაშვილსაც დაუკავშირდა, რომელიც პარტია “კონსერვატორების” წევრი გახლავთ.
_ ბატონო ბესო, როგორც ინფორმაცია გვაქვს, თქვენ გურიაში ბრძანდებოდით
_ დიახ, მეგობრები მოვინახულე.
_ ჩვენი ინფორმაციით, ოზურგეთში, შეხვდით საკრებულოს თავმჯდომარის მოადგილეს ავთანდილ მექვაბიშვილს და კიდევ რამდენიმე დეპუტატს, იქნებ გვითხრათ, რა შეხვდრა გქონდათ?
_ არანაირი შეხვედრა არ გვქონია, უბრალოდ მეგობრებს შევხვდი…
_ როგორც ამბობენ, თქვენ უშუალოდ დააყენეთ საკითხი, საკრებულოს თავმჯდომარის გადადგომასთან დაკავშირებით და ითქვა ისიც, რომ დროებით მის მოვალეობას შეასრულებს მისი მოადგილე მექვაბიშვილი.
_არ ვიცი ვის შევხვდი რა, არ ვარ საქმის კურსში, ვერ ვხვდები რაზე მესაუბრებით, ვისგან გაქვთ ეს ინფორმაცია, რომ მე ვიღაცას შევხვდი ოზურგეთში? ან ვიღაცას რაღაცა მოვთხოვე? არაფერი მასეთი…
_ არც თვითმმართველობის საკითხებზე გქონიათ საუბარი? ან რეფორმების გახორციელებასთან დაკავშირებით?
_არა, არა, არა… მცდარი ინფორმაცია გაქვთ.
_ კარგით ბატონო ბესო, თუ საიდუმლო არ არის, იქნებ გვითხრათ, ვინ არის თქვენი მეგობრები აქ, ვის შეხვდით ოზურგეთის საკრებულოში?
_ჩემი მეგობარი არის… თქვენ ოზურგეთიდან მირეკავთ? და გაინტერესებთ ოზურგეთის თემა? კი ბატონო. ნუ ახლა როგორ გითხრათ, რა, მეგობრებს შევხვდი და…
_ ბატონო ბესო, თქვენ ოზურგეთის მუნიციპალიტეტის საკრებულოს წევრებთან რაიმე ოფიციალური შეხვედრა არ გქონიათ?
_არავითარი. კარგით რა! დააზუსტეთ ინფორმაციები და შემდეგ დამიკავშირდით რა!
_ინფორმაციაც დაზუსტებული გვაქვს და დადასტურებულიც, თუმცა თქვენ უარყოფთ.
_დიახ, გვითხრა ღვინიაშვილმა.
როგორც აღვნიშნეთ, ბესო ღვინიაშვილი პარტია “კონსერვატორების” წევრია. ჩვენ ვცადეთ დავკავშირებოდით პარტიის ლიდერს ზვიად ძიძიგურს, რომელთანაც სატელეფონო საუბარი არ შედგა. მის კუთვნილ ტელეფონზე გვიპასუხა თანაშემწემ, თეონა ჯახუტაშვილმა, რომელმაც გავიცხადა, რომ ზვიადი ტელეფონთან მოსვლას ვერ ახერხებდა და თუ რაიმე საკითხის გარკვევა გვჭირდებოდა, პრესსამსახურს გრეტა წიწავას დავკავშირებოდით.
გრეტა წიწავა:
_ დიახ, ბესო ღვინიაშვილი ჩვენი პარტიის წევრია.
_როგორც ვიცით, რეგიონული თვითმმართველობის საკითხებში საკოორდინაციო წევრიც არის. .
_დიახ, დიახ, საკოორდინაციო საბჭოს წევრია, რა ხდება? რაიმე კონკრეტული თემა თუ გაინტერესებთ, გიპასუხებთ.
_ ქალბატონო გრეტა, რამდენად აქვს უფლება ბატონ ბესო ღვინიაშვილს ჩაერიოს სხვა რეგიონში ადგილობრივი თვითმმართველობის წევრებთან რაღაც თემების განხილვაში, მოაწყოს შეხვედრები და ა.შ?
_ ეს შეიძლება იყო რაღაც პირადი შეხვედრა, პირად კონტაქტებს არავინ არავის არ უკრძალავს, კანონი რაღაც შეხვედრებს არ კრძალავს, თქვენ ფიქრობთ, რომ ამ შეხვედრაში რამე კანონდარღვევა იყო? თქვენ საიდან გაქვთ ეს ინფორმაცია? თუ ვინმემ დაგიდასტურათ, იმათ ჰკითხეთ, გეტყვის რასთან დაკავშირებით, ვინ ვის შეხვდა. და თუ ვინმე, ვინმეს შეხვდა საქართველოში, ეს არ არის დიდი პრობლემა, _ გვითხრა ზვიად ძიძიგურის პრესსამსახურმა.
