და არჩევანი ერთ-ერთ კანდიდატზე _ გოჩა ჭანტურიაზე გააკეთა, რამაც ხალხის უკმაყოფილება გამოიწვია. ვინ არის და საიდან მოვიდა გოჩა ჭანტურია, აბაშელებისთვის უცნობია. როგორც ისინი ამბობენ, ჭანტურია მეუფე პეტრეს რეკომენდაციით მოდის და საკმაოდ დაახლოებული პირია ახალაიების კლანთან.
აღსანიშნავია, რომ აბაშელებმა კანდიდატების განმხილველი კომისიის მიმართ პროტესტი ჯერ კიდევ კომისიის წევრების დასახელების დროს გამოხატა. საკრებულოს თავმჯდომარის სახელზე განცხადება და მიმართვაც გააკეთა, მაგრამ უშედეგოდ _ მათ არანაირი პასუხი არ მიუღიათ.
კომისიის სხდომაზე კოალიცია “ქართულმა ოცნებამ” ერთ-ერთი კანდიდატის, ირაკლი რუხაძის სარეკომენდაციო წერილი გამოაგზავნა, რომელიც არც კი წაუკითხავთ. კომისიის თავმჯდომარემ, დავით კაჭარავამ სიცილით მოისროლა ეს წერილი. უფრო მეტიც, კაჭარავამ სხდომაზე მყოფ პირებს უთხრა, რომ “ეს მაკულატურა არაფერში სჭირდებოდა”.
_ ბიძინა სკაიპში დამელაპარაკოს და ისე მითხრას, რა უნდა, _ დასძინა კაჭარავამ, რამაც იქ შეკრებილების აღშფოთება გამოიწვია.
მიუხედავად იმისა, რომ სხდომა ექსცესების გარეშე მომდინარეობდა, საკრებულომ პოლიცია გამოიძახა.
_ ადგილზე მოსულმა პოლიციის უფროსმა გაკვირვებით იკითხა კიდეც: აქ ხმაური არაა, ვერც კანონდარღვევას ვხედავთ და რატომ გამოგვიძახეთო, _ აღნიშნა ჩვენთან საუბრისას სხდომაზე მყოფმა ერთ-ერთმა პიროვნებამ _ ნაირა ბენიძემ.
თუმცა, საწინააღმდეგო განცხადება გააკეთა ლივეპრესს.გე-სთან საკრებულოს აპარატის უფროსმა და კომისიის თავმჯდომარემ: “საკონკურსო კომისიაზე დილიდან ხორციელდებოდა შემოტევები. კომისიის სხდომის მიმდინარეობისას, კანდიდატების მხარდამჭერებმა ატეხეს ხმაური და იძულებულები გავხდით სამართალდამცავები გამოგვეძახებინა. პოლიციელებმა მათ კომისიის სხდომის ოთახი დაატოვებინეს და ფოიეში გადაინაცვლეს,“ _ აცხადებს გოჩა ხურცილავა.
“ზეწოლის მიუხედავად, კომისიამ კანდიდატის შერჩევა მოახერხა”, _ აღნიშნა კომისიის თავმჯდომარემ, დავით კაჭარავამ.
“ამდენი ტყუილი და ცინიზმი უკვე აუტანელია. ჩვენ დღესვე მოვითხოვთ საკრებულოში ფინანსური პოლიციის შესვლას და სათანადო ორგანოებს ვაცნობებთ აქ შექმნილ მდგომარეობას. არ დავიშლებით მანამდე, სანამ სიმართლეს ყველას არ დავანახებთ,” _ განაცხადეს აქციის მონაწილეებმა და საკრებულოს მესამე სართულზე პროტესტის ნიშნად დასხდნენ, თუმცა, მათთან არავინ მისულა. საპროტესტო აქცია ამ დილითაც გაგრძელდა, მაგრამ არც საკრებულოს თავმჯდომარე და არც მისი მოადგილე, რომელიც კომისიის თავმჯდომარეა, სამსახურში არ მისულან.
წუხელვე აქციის მონაწილეებზე ზეწოლა გახორციელდა: “მთელი ღამე მირეკავდნენ მეც და ჩემს ახლობლებსაც, აშინებდნენ, გვეუბნებოდნენ, რომ სულ მალე ისევ ნაციონალები მოვლენ ხელისუფლებაში და მაშინ ჩვენი საქმე წასული იქნება, ჩემს ახლობლებს ეუბნებოდნენ, რომ მე დამეტოვებინა აქცია და გამოვთრეულიყავი საკრებულოდან,” _ აღნიშნა “გურია ნიუსთან” საუბრისას მარინა ქუნთელიამ.
აბაშელები გაჩერებას არ აპირებენ და აქციას აგრძელებენ. მათ ხალხი სხვადასხვა სოფლებიდან უერთდება და როგორც ამბობენ, უფრო მასშტაბურ აქციებს გეგმავენ როგორც აბაშაში, ასევე, თბილისსა და ქუთაისში.
