იხდიდა თუ არა კონკრეტულ მასალაში ხელისუფლება ფულს, ჯერჯერობით უცნობია, მაგრამ “გურია ნიუსს” “კორუფციასთან ბრძოლის საინფორმაციო ცენტრმა” მიაწოდა ოფიციალური დოკუმენტაცია, რითაც უცხოელი ჟურნალისტებისა და სხვა სტუმრების სასტუმროში ცხოვრებისა და რესტორნებში დაპატიჟება დასტურდება.
2011 წლის 1 ივნისიდან 1 ნოემბრამდე აჭარის მთავრობის ბიუჯეტიდან ასი ათას ლარზე მეტი სტუმრების რესტორნებსა და სასტუმროებში დაპატიჟებაში დაიხარჯა. თანხა ძირითადად ბათუმის სხვადასხვა რესტორანშია გადარიცხული. უცხოელი და ქართველი სტუმრების დაპატიჟებისათვის ყველაზე მეტი აგვისტოს თვეში, თითქმის 30 ათასი ლარი გადაიხადეს. ყველაზე ძვირი ბიუჯეტს რესტორანი “რივიერა” დაჯდა, სადაც ხუთ თვეში 600- ზე მეტი სტუმარი “აქეიფეს” და შესაბამისად, ყველაზე მეტიც გადაიხადეს. დიდი თანხების გადახდის სამეულში სასტუმრო “შერატონში” (47 სტუმრის ღამისთევა) და რესტორანი “მეგრულ ლაზური” (345 ადამიანის კვება) შედის.
ჯამში, მთავრობამ ბათუმის 12 რესტორანში 1400-ზე მეტი პიროვნების კვებაში გადაიხადა თანხა, ხოლო 3 სასტუმროში 50-ზე მეტი ადამიანის ცხოვრება დააფინანსა.
აჭარის მთავრობამ დააფინანსა მიუზიკლის “ქეთო და კოტეს” პრემიერის შემდეგ 250 კაციანი ბანკეტი. სტუმრებს შორის საქართველოს პრეზიდენტი, მთავრობის წევრები და შოუ ბიზნესის წარმომადგენლები იყვნენ.
აჭარის ბიუჯეტიდან დაფინანსდა ჟურნალ “მონოკლი”-ს ჟურნალისტების დანიელა პელედის და ანდრია გონსალესის “აჭარულ სახლში”, “ოქროს თევზში” და “ცეროდენაში” დაპატიჯება. მომდევნო დღეს, “მონოკლის” ჟურნალისტები მთავრობამ “სინემაში” და შპს “საქართველოს” კუთვნილ რესტორანში დაპატიჟა.
საბიუჯეტო თანხები დაიხარჯა თურქული ტელეარხ “NTV” “CNBC” ჟურნალისტების 1 ივლისს “მეგრულ ლაზურში”, შ.პ.ს. “საქართველოში” და ” ოქროს თევზში” დაპატიჟებაზე. მომდევნო დღეს, სტუმრები რეტორან “რივიერაში” მიიწვიეს.
აჭარის მთავრობის მიერ დაპატიჟებულ ჟურნალისტებს შორის მოხვდა “Mtv”– ს წარმომადგენელთა ჯგუფი, რომელიც ვარშალომიძის მთავრობამ “ოქროს თევზში” დააპურა.
დაპატიჟებულთა შორის მოხვდნენ “ამერიკის ხმის” წარმომადგენლებიც. ასევე თურქეთის საზოგადოებრივი მაუწყებლის “TRT”-გადამღები ჯგუფი, თურქულ ტელეარხ “NTV” ჟურნალისტი ზეინაბ დერელი და მისი გადამღები ჯგუფი, გაზეთ “ჰურიეთი”-ს ჟურნალისტი მესუდე ერსანი, უკრაინულ ტელეარხ “Inter” -ის გადამღები ჯგუფი. აჭარის მთავრობამ დაფინანსა თურქულ ტელეარხ “TRT”- ხელმძღვანელის იბრაჰიმ შაჰინის და თანაშემწე ომურ ბალთაჯის ცხოვრება სასტუმრო “შერატონში”.
ჯამში, სტუმრების მიღება-გამასპინძლება რეგიონის ბიუჯეტს 105 ათას ლარზე მეტი დაუჯდა. ეს თანხა მხოლოდ 5 თვის ხარჯებს მოიცავს და აჭარის მთავრობის ბიუჯეტიდან არის გადახდილი. სტუმრების დაპატიჟება ბათუმის მერიისა და საქართველოს მთავრობის ბიუჯეტიდანაც ხდებოდა. შესაბამისად ეს თანხა საერთო ხარჯის მხოლოდ მცირე ნაწილია.
