_ შუახევის გამგებლის თამაზ დავითაძის ეს სიტყვები “გურია ნიუსმა” დღეს, 14 იანვარს მასთან სატელეფონო საუბრისას ჩაიწერა.
ბედობის დღეს დადებული ეს პირობა იმედს გვაძლევს, რომ ჩვენი ჟურნალისტური საქმიანობით კიდევ ერთ სოციალურად დაუცველ ოჯახს ჭერი, ხოლო ამ ოჯახში მცხოვრებ პატარებს სახელმწიფოსგან მზრუნველობის შეგრძნება გაუჩნდათ.
ამ მუნიციპალიტეტიდან მომზადებულ რეპორტაჟში სათაურით _ “ბავშვების ხათრით მთავრობის ყურამდე მისატანი რეპორტაჟი”, უკიდურეს მდგომარეობაში მყოფი ერთი ოჯახის შესახებ ვწერდით.
შუახევის მუნიციპალიტეტის სოციალურ სახლში, რომელიც შუახევში მცხოვრები სხვადასხვა კატეგორიის 100-მდე ეკომიგრანტი ოჯახისთვისაა განკუთვნილი, შუახევის რაიონის სოფელ ბუთურაულიდან წამოსული ნაზიკო მელაძე ორ შვილიშვილთან ერთად, უნებართვოდ შესახლდა.
სოციალურად დაუცველ, ფსიქიური პრობლემების მქონე მამის გამო, უკიდურესად მძიმე პირობებში მყოფ ბავშვებს სოციალურ სახლში დაკავებული მცირე და მოუწყობელი ფართიდან გასახლებას უპირებდნენ. ჩვენი შუახევში ყოფნისას, სოციალურ სახლში პოლიცია დაგვხვდა. ადგილობრივი ხელისუფლება მაშინ ამბობდა, რომ სახლი ეკომიგრანტებისთვის იყო განკუთვნილი და ბებიასა და შვილიშვილებს ვერაფრით დაეხმარებოდნენ.
“ფსიქიურად არამყარი სიძე მყავს. მძიმე ავადმყოფია _ საკუთარი დედა მოკლა, ხელით დაახრჩო. ფსიქიატრიულში ჩავიყვანთ და ერთი თვის მერე უშვებენ. წამალს კი აძლევს მთავრობა, მაგრამ წამლები აღარ შველის. უკვე 15 წელია ავადმყოფია. შვილიშვილები სად წევყვანო, მკვლელი ყავენ სახლში?! ღამის 12 საათზე თოვლში ყრის გარეთ, ერჩის ბაღნებს და ჩემს გოგოსაც… ახლა მოვდენ და 70 წლის ბებიაი გამაგდონ უნდა! არ წავალ. ხომ უნდა მოუარო შვილისშვილებს?! სადმე არ წავალ მე, აქედან არ გავალ! _ ცხარობს ნაზიკო ბებო, _ პოლიციამ არ გეკუთვნებაო. აბა, ვის ეკუთვნის?! დღეს შემოვედი და დეგვეცენ თავზე უცებ”, _ ამბობდა “გურია ნიუსთან” საუბარში ნაზიკო ბებო.
თვალცრემლიანი ბავშვები, “მათი ხათრით” თანადგომას, თავზე ჭერს და უსაფრთხოებას მთავრობისგან ითხოვდნენ.
“პოლიციაც გვეუბნება, რომ დაგარტყამთ და გაგაგდებთო. რა უნდა დაგვარტყას პოლიციამ?” _ ცრემლიანი თვალებით გვეკითხება გოგონა.
ბინაში ორი ოთახი, სამზარეულო და სველი წერტილისთვის განკუთვნილი დაუმთავრებელი ნიშაა. კედლები შელესილი და გადაღებილია. იატაკზე პარკეტია დაგებული. სამზარეულოს კუთხეში, სახელდახელოდ გაშლილი ლეიბი აგია. გვერდით კი, დიდ, შავ პარკში ტანსაცმელი, პური და სხვა პირადი ნივთები ალაგია.
საუბრისას, ბიჭი ერთ ადგილას არ გაჩერებულა: სიცივისაგან გალურჯებული, დაწითლებული დიდრონი თვალებით, ხელების ფშვნეტითა ოთახიდან ოთახში დადიოდა. ხმა არ მოუღია. უფროსებს უსმენდა.
ნაზიკო ბებო დიდი იმედით მაცილებს და მთხოვს, “მთავრობის ყურამდე” მივიტანო მისი პრობლემა. გოგონაც მეუბნება, რომ მათი _ “ბავშვების ხათრით” ვთხოვო გამგეობას, მისცენ ბინა.
ეს რეპორტაჟი “გურია ნიუსმა” 20 დეკემბერს მოამზადა. ამ ოჯახის ისტორია და სოციალურ სახლზე მომზადებული რეპორტაჟი ბევრ ადამიანმა წაიკითხა.
გუშინ, აჭარის მთავრობის პრესსამსახურიდან შეგვატყობინეს, რომ 14 იანვარს შუახევის სოციალურ სახლში 33 ოჯახის შესახლება იგეგმებოდა. სამწუხაროდ, წასვლა ვერ შევძელით, მაგრამ მივიღეთ ინფორმაცია, რომ სოციალურ სახლში ეკომიგრანტები შეასახლეს. მართალია, სახლში ნაზიკო ბებოს ოჯახს ბინა არ ერგო, თუმცა მუნიციპალიტეტის გამგეობისგან დაპირება მიიღო, რომ მათ ალტერნატიული ფართი აუცილებლად გადაეცემათ.
შუახევის მუნიციპალიტეტის ახალ გამგებელს თამაზ დავითაძეს ამ ინფორმაციის გადასამოწმებლად დავუკავშირდით.
“მე 4-5 დღეა დანიშნული ვარ გამგებლად. ჩვენ არ ჩავთვალეთ საჭიროდ, რომ ზამთრის პერიოდში გამოვასახლოთ ბავშვები; ისიც გავითვალისწინეთ, არის რაღაც ალტერნატიული ფართი და იქ გადავიყვანთ,” _ ამბობს თამაზ დავითაძე.
გამგებელმა აღნიშნა, რომ ოჯახი სოციალურ სახლში თვითნებურად შეჭრილ ბინაში ცხოვრობს ახლაც და ისინი აქ მანამ დარჩებიან, სანამ ალტერნატიული ფართი არ მიეცემათ, თანაც საცხოვრებელი ფართის გადაცემა უახლოეს ხანში მოხდება.
“მე, შუახევის გამგებელი თამაზ დავითაძე გაძლევთ პირობას, რომ ეს ოჯახი, ეს ბავშვები ქუჩაში, სიცივეში არ იქნებიან და მიეცემათ ალტერნატიული ფართი!” _ ამბობს შუახევის მუნიციპალიტეტის გამგებელი თამაზ დავითაძე “გურია ნიუსთან” საუბარში.
