2011 წლის დეკემბერში საქართველოს პრეზიდენტმა, მიხეილ სააკაშვილმა, საჯარო განცხადება გააკეთა “გურიის აღორძინების ფონდის” შექმნის შესახებ და მის მეთაურად რამაზ ნიკოლაიშვილი დაასახელა. 2012 წელი კი გურიის აღოძინების წლად გამოცხადდა.
აღორძინების რა გითხრათ, მაგრამ გურიაში არჩევნების ტოტალურად წაგების წლის შემდეგ, პრეზიდენტს არც გურიის სიყვარულზე ულაპარაკნია და მითუმეტეს, აღარც მის აღორძინებაზე.
ამ ფონდის საქმიანობის ან მისი წარმომადგენლების შესახებ ინფორმაციას კი მთელი გურია ეძებს და ვერ პოულობს. არადა, წინასაარჩევნო გამოსვლებში ფრაზა “გურიის აღორძინების ფონდი” სულ უფრო ხშირად და ხშირად ისმოდა. რა შედიოდა ამ ფონდის ფუნქციებში და რა პროექტებს ახორციელებდნენ, ეს ინფორმაცია მედიისთვის მკაცრად გასაიდუმლოებული იყო.
ამ კითხვაზე პასუხი არც რამაზ ნიკოლაიშვილს ჰქონდა ჯერ კიდევ ოზურგეთის მაჟორიტარობის პერიოდში. “გურია ნიუსის” კონკრეტულ კითხვაზე მან იმის ახსნა დაგვიწყო, რომ ფონდის შესახებ ინფორმაციის მისაღებად თურმე მტელი რიგი პროცედურები უნდა გაგვევლო.
გურია ნიუსი: “ბატონო რამაზგურიის აღორძინების ფონდზე მინდა გკითხოთ; 2011 წლის დეკემბრის თვეში, საქართველოს პრეზიდენტმა მიხეილ სააკაშვილმა განაცხადა, რომ შეიქმნებოდა “გურიის აღორძინების ფონდი”, რომელსაც თქვენ უხელმძღვანელებდით. რა ხდება ამ ფონდში, რა პროექტებს ახორციელებს და რას საქმიანობს დეკემბრის თვიდან დღემდე?“
რამაზ ნიკოლაიშვილი: “თქვენ სიტყვა ფონდთან დაკავშირებით, გაქვთ საკმაოდ სპეციფიური განწყობა. ფონდი არამარტო ინვესტიციებს გულისხმობს, რომელიც შეიძლება განხორციელდეს რომელიმე მოქალაქისგან, ფონდი თავისთავში გულისხმობს ძალიან ბევრ რამეს, მათ შორის იმასაც, რასაც ჰქვია სახელმწიფო ინვესტიციები. ის ობიექტები, რომლებიც აშენდა, შენდება, და აშენდება შემდგომში, დაფინანსებულია საქართველოს ბიუჯეტიდან. სწორედ ამაზე იყო საუბარი და თქვენ, ეტყობა, კარგად ვერ გაიგეთ. დანარჩენ ტექნიკურ საკითხებზე თუ გნებავთ, უფრო კომპეტენტური პასუხი მიიღოთ და ეს პასუხი გაიაროთ იურისტებთან, უნდა მომწეროთ და მე მზად ვიქნები, რომ… მე კი არა, სამინისტრო მოგცემთ უფრო კომპეტენტურ პასუხს. ეს არის პირობითი ხედვა, რომლითაც თქვენ უყურებთ ამ საკითხს. საუბარია იმაზე, რომ სახელმწიფომ ბიუჯეტიდან დააფინანსა კონკრეტული პროექტები, ეს არის ბახმარო, ურეკი, სტადიონი და ა.შ, ამაზე საუბარი შორს წაგვიყვანს…”
ერთის მხრივ, სააკაშვილი აცხადებდა, რომ ეს საპრეზიდენტო ფონდია, მეორეს მხრივ კი ნიკოლაიშვილი ინფორმაციის გამოსათხოვად სამინისტროსკენ მიგვითითებდა, რაღა თქმა უნდა, მხედველობაში რეგიონული განვითარებისა და ინფრასტრუქტურის სამინისტრო ჰქონდა.
თუ საპრეზიდენტო ფონდი იყო და თანაც გურიას ეხებოდა, ალბათ მის შესახებ რაიმე სახის ინფორმაცია მაინც უნდა ჰქონოდა პრეზიდენტის რწმუნებულს გურიაში, ვალერი ჩიტაიშვილს.
ჩვენ დავუკავშირდით გუბერნატორს, რომელმაც გაგვიცხადა, რომ გუბერნია მსგავსი სახის არანაირ პროექტში არ იყო ჩართული.
რაც შეეხება ინფრასტრუქტურის სამინისტროს, მინისტრი დავით ნარმანია აცხადებს, რომ მსგავის ფონდი არ არსებობს.
_ არსებობს თუ არა რეალურად გურიის განვითარებისა და აღორძინების ფონდი? ამ ფონდის პრეზენტაცია ჯერ პრეზიდენტმა სააკაშვილმა მოახდინა და შემდეგ თქვენი წინამორბედი და ოზურგეთის მაჟორიტარობის კანდიდატი, რამაზ ნიკოლაიშვილი, მუდმივად ახსენებდა გურულებს, რომ ამ ფონდის შექმნა მათზე ზრუნვის კიდევ ერთი გამოხატულება იყო… ჩვენ ამ დრომდე ვერ მოვიძიეთ ოფიციალური ინფორმაცია ასეთი ფონდის შესახებ.
_ არც გურიის და არც სხვა მხარეებთან მიმართებაში განვითარების ფონდები არ არის შექმნილი და არც ჩვენთან დევს რაიმე ინფორმაცია ამ საკითხებთან დაკავშირებით. არის საქართველოს რეგიონებში განსახორციელებელი პროექტების ფონდის, საქართველოს მთავრობის ფონდის სახით. რეგიონებში განსახორციელებელი პროექტებიდან ხდება მუნიციპალიტეტისთვის თანხის გამოყოფა იმის განსახორცილებლად, რისთვისაც მათ საკუთარი თანხები არ ჰყოფნით. სხვა ფონდის შესახებ მე ინფორმაცია არ მაქვს.
თუ ვინმეს აღმოაჩნდება ინფორმაცია ასეთი ფონდის შესახებ, ჩვენ დიდი სიამოვნებით გამოვაქვეყნებთ…
