აღნიშნული ინფორმაცია “გურია ნიუსს” მაკვანეთის რწმუნებულმა მერაბ ვასაძემ დაუდასტურა, თუმცა აღნიშნა, რომ ის გამგებელს არ გაუთავისუფლებია და სამსახურიდან წასვლის შესახებ განცხადება თავად დაწერა.
_ არავის არ გავუთავისუფლებივარ, სამსახურიდან წასვლის შესახებ განცხადება თავად დავწერე, _ გვითხრა მერაბ ვასაძემ.
_ბატონო მერაბ, რაღაც არადამაჯერებლად ჟღერს, რომ დღეს, სამსახურს საკუთარი სურვილით ტოვებს ვინმე.
_განცხადება დავწერე იმიტომ, რომ დამპირდა გამგებელი სხვაგან დაგასაქმებო და მასე თუ იქნება, რა პრობლემაა? ზედმეტი არაფერი ყოფილა ჩვენს შორის, შევთანხმდით. დამიჯერე, მასე გეტყვიან სხვებიც.
_სხვაში რომელი სოფლის რწმუნებული უნდა ვიგულისხმოთ?
_ნაგომრის, კი გეტყვის ვანო თქვენ, არ დაგიმალავთ, რა და როგორ იყო.
ჩვენ დავუკავშირდით სოფელ ნაგომრის რწმუნებულს ვანო კიღურაძეს, რომელიც მეტად აღელვებული ჩანდა და კითხვებზე პასუხის გაცემის თავის არიდების მიზნით უცნაური პასუხი მოიფიქრა. თურმე, მან არ იცოდა ვინ ურეკავდა ტელეფონზე. არადა, ამ ნომრით, ჩვენ ძალიან ხშირად ვუკავშირდებოდით მას სხვადასხვა საკითხებზე. როგორც ჩანს, რწმუნებულები გაფრთხილებულნი არიან ჟურნალისტებთან ამ საკითხთან დაკავშირებით “კრინტი არ დაძრან”.
_მე არ ვიცი ვინ ხარ შენ, ჟანა ხარ მეგრელიშვილი თუ სხვა ვინმე, რომ მირეკავ, რა ვიცი მე ვინ ხარ, გხედავ სახეზე? _ აი, ასეთი პასუხი გაგვცა ნაგომრის რწმუნებულმა.
“გურია ნიუსი” დაუკავშირდა ოზურგეთის მუნიციპალიტეტის გამგეობის ადმინისტრაციის უფროსს გოჩა შილაკაძეს, თუმცა არც მან უპასუხა ჩვენს კითხვებს. როგორც კი გაიგო “გურია ნიუსიდან” ვართო, არ მცალიაო, გვითხრა და მაშინვე გაგვითიშა ტელეფონი.
ოზურგეთის მუნიციპალიტეტის გამგეობის პრესსამსახურის ხელმძღვანელმა ნინო სალუქვაძემ კი ოფიციალურად მოგვწერა, რომ ჯერ ოზურგეთის ტერიტორიული ერთეულების რწმუნებულების გათავისუფლება არ დაწყებულა. მისი განცხადებით, საკადრო ცვლილებები 1 თებერვლიდან დაიწყება.
