ფინანსთა სამინისტროს თანამშრომლები აცხადებენ, რომ უგულავა მოწმის სახით არის დაბარებული. უგულავას უწყებას, სავარაუდოდ, სახლში მიუტანენ.
მთავარი პროკურორი არჩილ კბილაშვილი აცხადებდა, რომ “თბილსერვის-ჯგუფის” საქმესთან დაკავშირებით, თბილისის მერი გიგი უგულავა დაიკითხებოდა.
ფინანსთა სამინისტროს საგამოძიებო სამსახურმა, ცოტა ხნის წინ, შპს “თეატრალურის კვარტეტის” დირექტორის ლაშა კერვალიძის ჩვენება გამოაქვეყნა. კერვალიძე ჩვენებაში ადასტურებს, რომ წლების განმავლობაში ხელფასს იღებდა დაწესებულებიდან, სადაც არც ერთი დღე არ უმუშავია.
ლაშა კერვალიძის განცხადებით, 2009 წლიდან დღემდე, მონაწილეობა აქვს მიღებული თბილისის მერიის მიერ ორგანიზებულ დაახლოებით 20 კონცერტში , საიდანაც მხოლოდ 10 მათგანი ანაზღაურდა 300-ლარიანი ჰონორარით. დანარჩენი კონცერტები კი, მისი განცხადებით, საქველმოქმედო იყო.
“კვარტეტის” დირექტორის თქმით, ამ პერიოდში, კვარტეტის წევრები იყვნენ დაუსაქმებლები, რის შესახებაც ხშირად საუბრობდნენ მეგობართა წრეში და ეძებდნენ სამსახურს, სადაც სტაბილური შემოსავალი ექნებოდათ.
2010 წელს, კერვალიძეს “თბილსერვის-ჯგუფის” ისანი-სამგორის განყოფილების უფროსი იაგო მამალაძე დაუკავშირდა, რომელმაც “თეატრალური კვარტეტის” წევრები “თბილსერვის ჯგუფის” ოფისში დაიბარა და გადასცა შრომითი ხელშეკრულებები. ხელშეკრულების მიხედვით, კვარტეტის წევრებს უნდა ემუშავათ ალპინისტ დამგველებად და მათი თვიური ხელფასი განისაზღვრა 500 ლარით . 2011 წლის ბოლოს, კვარტეტის წევრებს ხელფასი 50 ლარით გაეზარდათ, გარდა ამისა, ისინი დააზღვიეს “ტაოს” სადაზღვევო კომპანიაში.
კერვალიძემ ჩვენებაში განაცხადა, რომ პრემია მხოლოდ ერთხელ ჩაერიცხათ 100 ლარის ოდენობით. უკანასკნელი ხელფასი კი, გასული წლის ნოემბრის თვეში ჩაერიცხათ 373 ლარის ოდენობით. კვარტეტის დირექტორი ადასტურებს, რომ “თბილსერვის -ჯგუფში” არც ერთი დღე არ უმუშავიათ.
