“გურია ნიუსის” აბაშის ბიუროს ამ ამბების ერთ-ერთი მონაწილე, თორნიკე ქარცივაძე ეწვია და საპასუხო კომენტარი გააკეთა.
თორნიკე ქარცივაძე: “დავით საგანელიძემ ივანიშვილის რეზიდენციასთან მყოფი ადამიანები მოიხსენია “ქართულ ოცნებაში” ჩანერგილ “ნაციონალური მოძრაობის” აგენტებად. ეს ის ჯგუფია, რომელმაც ყველაფერი დადო სასწორზე “ქართული ოცნების” გამარჯვებისთვის, დღეს კი საგანელიძემ იმდენი შეძლო, რომ აბაშაში დაარსდა ფსევდო “ქართული ოცნება” და მისი წევრები, რომლებიც არსად არ ჩანდნენ, დაუპირისპირა ჭეშმარიტ აქტივისტებს. მოვითხოვ, ფაქტებით დაამტკიცოს საგანელიძემ, რომ ჩვენ “ნაციონალურ მოძრაობას” ვემსახურებით, თუ არადა, პასუხი აგოს ცილისწამებისთვის. რაც შეეხება გვილავას, ისიც საგანელიძის მსგავსად ჩირქს სცხებს უდანაშაულო ხალხს. გვილავამ დაამტკიცოს ამ ხალხის კავშირო ნაცმოძრაობასთან და ილაპარაკოს ფაქტებით. მე მრჩება შთაბეჭდილება, რომ საგანელიძე ამ ყველაფერს აკეთებს “ქართულ ოცნებაში” განხეთქილების შესატანად. კაცი, რომელმაც იმ დღეს 15 ადამიანის წინაშე კაცური სიტყვა მითხრა, ხელი ჩამომართვა და შემპირდა, რომ პირადად გამიწევდა რეკომენდაციას პარტიაში გასაწევრიანებლად და “ქართული ოცნების” ოფისში გამიშვა ბლანკის ასაღებად, საღამოს აკეთებს განცხადებას, რომ მე ვარ ნაციონალების აგენტი. მე საქვეყნოდ ვაცხადებ, რომ ეს ადამიანი მატყუარა და ცილისმწამებელია. საგანელიძემ რაიონში გამოაგზავნა თავისი იდეების გამტარებელი და საკმაოდ არაადეკვატური პიროვნება გიორგი გვილავა, თან თქვა, რომ პარტია დაკომპლექტდა საკმაოდ აქტიური და ოცნების მხარდამჭერი ადამიანებით. მაშინ საჯაროდ გამცენ ამ ადამიანებმა პასუხი, სად იყვნენ წინასაარჩევნოდ? რატომ არავინ იცოდა, რომ ისინი ოცნების მომხრეები იყვნენ? რატომ გვიყურებდნენ თავიანთი მაღაზიების და აფთიაქების ფანჯრებიდან და არ იდგნენ ჩვენთან ერთად ქვებს, რომ გვესროდნენ მაშინ? როდის მოასწრეს გაწევრიანება? საგანელიძეს ურჩევნია სიმართლე უთხრას ბატონ ბიძინა ივანიშვილს, კაცს რომელმაც გადაარჩინა საქართველო, რისთვისაც გვერდით ვუდექით და ყოველთვის მის გვერდით ვიქნებით. საგანელიძის და გვილავასნაირი ადამიანები არც უნდა გააკარო პარტიას, მე მზად ვარ შიშველი ხელებით დავიცვა “ქართული ოცნება” ასეთი ხალხისგან. ახლა კი ველოდები მათგან პასუხს და საჯაროდ ბოდიშის მოხდას.”
ჩვენ ვცადეთ დავით საგანელიძესთან დაკავშირება, თუმცა, მისი ტელეფონი მთელი დღეა, გამორთულია. საგანელიძემ არც მესიჯებზე არ გვიპასუხა.
