რაიონულ კონფერენციაზე მხოლოდ დავით დარჩიას კანდიდატურა წარადგინეს. მას სრული მხარდაჭერა გამოუცხადეს _ 89 ადამიანმა დაუჭირა მხარი. ასევე სრული მხარდაჭერა გამოუცხადეს ბიუროს წევრებს: ბექა ფუტკარაიას, მურად ჩხაიძეს, მედეა მახარობლიძეს, ნანა სიხარულიძეს. კონფერენციაზე აირჩიეს “ქართული ოცნება _ დემოკრატიული საქართველოს ყრილობის დელეგატები.
_ დღეს, “ქართული ოცნება – დემოკრატიული საქართველოს” რაიონული ორგანიზაციის კონფერენცია შედგა და, თქვენთან ერთად, ახალშექმნილი “ქართული ოცნება” წარმატებით გაართმევს თავს იმ ამოცანებს, რომელიც მიზნად აქვს დასახული და რასაც “ქართული ოცნების” საარჩევნო პროგრამა ითვალისწინებს. ეს არის ქვეყნის ბიუჯეტი, ასე რომ ვთქვათ, სოციალური ბიუჯეტი, ხალხის კეთილდღეობაზე, ხალხის სოციალური დონის ამაღლებაზე ორიენტირებული ბიუჯეტი. პედაგოგებს გაეზარდათ ხელფასი, სოფლის მეურნეობის კუთხით არის წინსვლა, ქვეყანაში დაწყებულია სამართლიანობის აღდგენის პროცესი, რომელიც, ღრმად ვართ დარწმუნებული, ყველას ადარდებს და აღელვებს, _ განაცხადა “ქართული ოცნების” ახალარჩეულმა თავმჯდომარემ დავით დარჩიამ.
დარჩიამ განცხადება გააკეთა თავის მეგობარზე, ბიძინა ივანიშვილზე: _ ერთ საკითხზე მინდა გავამახვილო ყურადღება _ რაღაც გარკვეულ პასკვილებს მიძღვნიან იმის შესახებ, რომ მე ვარ ჩვენი ხალხის, ჩვენი ქვეყნის მიერ აღიარებული ახალი ლიდერის, ბიძინა ივანიშვილის მეგობარი. დამეთანხმებით, საქართველოში არასდროს დადგება ის დრო, როცა გაუფასურდება მეგობრობა და დასაძრახ სიტყვად იქცევა. ამიტომ, მე ღრმად ვარ დარწმუნებული, რომ ეს ჩემი მისდამი დამოკიდებულება, პირველ რიგში, გამოყენებული იქნება ჩემი რაიონის, ჩემი ხალხის საკეთილდღეოდ.
რაიონულ კონფერენციას ესწრებოდა საქართველოს პარლამენტის წევრი, ზვიად კვაჭანტირაძე და ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე.
ზვიად კვაჭანტირაძის თქმით, კონფერენცია ჩატარდა აკადემიურ და მაღალ დონეზე, რაც მოსალოდნელი იყო ოზურგეთელებისგან.
კოტე შარაშენიძის განცხადებით, დავით დარჩია არის ის კანდიდატი, რომელმაც საპარლამენტო არჩევნების დროს ბევრი საქმე გააკეთა და ის იმსახურებს რაიონული ორგანიზაციის თავმჯდომარეობას.
პარტიის კონფერენციას კოალიციაში შემავალი პოლიტიკური პარტიის წარმომადგენლები არ ესწრებოდნენ.
