ივანიშვილის მიერ ერთი კვირით ადრე დაანონსებული სტატუსი დავით დარჩიას 1 თებერვალს, ოფიციალურად მიანიჭეს.
მისი წინამორბედის, კოტე შარაშენიძის მთავარ ლობისტად და მისთვის გზის “გამკვლევად” “ქართულ ოცნებაში” ბიძინა ივანიშვილის ძმა, ადიკო ივანიშვილი სახელდება. ის დღესაც არ უარყოფს ჩვენთან, რომ შარაშენიძის კანდიდატურა “ქართული ოცნების” ოზურგეთის შტაბის უფროსად სწორედ მან წაახალისა.
ახლა, შარაშენიძე ოზურგეთის გამგებლის მოვალეობის შემსრულებელია. როგორც ჩანს, ივანიშვილებმა ოზურგეთი მათთვის სანდო ადამიანებს ჩააბარეს.
ახალი გამგებელი, დანიშვნიდან ძალიან მალევე, თავის გატეხვის სავარაუდო ფაქტზე პოლიციაში დაკითხვაზე დაიბარეს. ბარიკადების მეორე მხარეს შარაშენიძის თანაგუნდელი და თანამებრძოლი ნესტორ რამიშვილი გახლდათ, რომელიც დღემდე არ ადასტურებს იმ ინფორმაციას, რომელიც “გურია ნიუსს” წყარომ მიაწოდა. რა თქმა უნდა, უარყოფს თავად გამგებელიც და ამ თემაზე საუბრის ნაცვლად, სხვა საკითხებით დაინტერესებას გვირჩევს.
_ მკითხეთ სხვა რამე, რას ვაკეთებთ, როგორ ვაკეთებთ… რაში იხარჯებოდა ფული არ გაინტერესებთ? მკითხეთ აიპი-ებზე, უაზროდ შექმნილ და გაბერილ შტატებზე, რომელსაც ჭირდება ოპტიმიზაცია და თანხების ეკონომია. ეს საქველმოქმედო ფონდი არაა, ეს არის ბიუჯეტის ფული, რომელიც უნდა მოხმარდეს საქმეს.
_ კარგით, მაშინ საქმეზე გკითხავთ. გაზეთში გამოქვეყნებულ ძველ მასალებს ვათვალიერებდი და თქვენი პოლიტიკური თანამებრძოლების კომენტარები ვნახე იმ ადამიანების შესახებ, რომლებთანაც ახლა თქვენ ცალკე თათბირებს ატარებთ ხოლმე. მაგალითად, ლეგალიზაციის კომისიის თავმჯდომარე, ვალია გირკელიძე, რომელსაც არჩევნების დროს ძალიან ერჩოდით, “ნაცმოძრაობის” კოორდინატორად მოიხსენიებდით და რომელთანაც ბევრი პრეტენზია ჰქონდა მოსახლეობასაც. ამ კომისიის მუშაობა თუ შეისწავლეთ?
_ კი, ბატონო, ბევრი კითხვის ნიშანია მაგ პიროვნებაზე და ლეგალიზაციის კომისიაზე.
_ აიპი-ების მსგავსად, აპირებთ თუ არა ამ კომისიის საქმიანობის შესწავლას?
_ იმიტომ არსებობს სამართალდამცველები, იმიტომ არსებობს პროკურატურა, რომ მაგათ შეისწავლონ, თუ რამეა. რა ვიცი ახლა, მე ვარ მენეჯერი. მაგალითად, მივადექით ერთ საკითხს ექადიის მიწებთან დაკავშირებით და ჩვეულებრივად, არც აუქციონზე გავიდა, არც არაფერი, დაბრუნდა ისევ უკან, როგორც იყო…
მე დავინიშნე 10 დეკემბერს და იცით, რომ რაიონს უამრავი პრობლემა ჰქონდა. მე იმაზეც შემიძლია გიპასუხოთ, რა დამხვდა ნაციონალური მოძრაობის ნაბურჯგნი ბიუჯეტიდან და ერთი თეთრი თუ იყო საერთოდ. ერთი ხელის მოსმით, ვერც ვერავის დავშლით და ვერც ვერაფერს ავაწყობთ, ხო? ყველაფერი გამოჩნდება უახლოეს მომავალში, საქმე, შედეგები… საქმემან შენმამ გამოგაჩინოსო, ხომ გაგიგიათ თქვენ?
_ კი გამიგია, ბატონო კოტე, მაგრამ ყველაზე დასამახსოვრებელი და საზოგადოებითვის საინტერესო საქმე, რაც თქვენ გიკავშირდებათ ამ ბოლო დროს, ის ინციდენტია, რომელზეც პოლიციაშია საქმე აღძრული.
_ კარგით რა, ვიღაცამ ორ კაცთან რაღაცა თქვა, გავარდა ხმა, გამოვარდა… ვიღაცამ ხმალი იშიშვლა, აქეთ ბესო მელუა… საქმე, საქმე, სოფლის მეურნეობა, წყალი კანალიზაცია, მილები, არხები, გაჭირვებული ხალხის გვერდით დგომა, ამაზე დამელაპარეკეთ და ნებისმიერ კითხვაზე გაგცემთ პასუხს. ეგ ისეთი ამბავია, “ტაშტი გატყდა, ხმა გავარდაო”… ხომ გაგიგონიათ?
_ მაშინ, მაინც იმ კითხვას დაგისვამთ, რაც მე მაინტერესებს. ბესო მელუა ახსენეთ, კი მაგრამ არჩევნების დროს, თქვენ ბესო მელუა, ნესტორ რამიშვილი, ერთად არ იყავით? ერთ საქმეს არ ემსახურებოდით?
_ ვინ გითხრათ, რაის ნესტორი, რაის მელუა, მაი ხალხი თავიდანვე ჩემგან შორს! მასე ყველას შეუძლია, ვიღაცამ რაღაცა თქვას. მასე, ჯონდი ბაღათურიამ წლის შემაჯამებელ სხდომაზე სააკაშვილი გააქცია პარლამენტიდან, ხომ გახსოვთ? მაგრამ ეს იმას არ ნიშნავს, რომ ბატონ ბიძინას ჯონდი მიეღო თავის პარტიაში. არ მიუღია, ამ კაცს აქვს თავისი ხედვა. მასე ყველა ხმალაობს, იგივე კახა კუკავა, ყველას რაღაც ამბიცია აქვს, მაგრამ კოალიციას ჰყავს მისი ხალხი…
მაგეებისთვის არ მცალია, ათასი საქმე მაქვს საკეთებელი, მაგენს საქმეზე რომ დაელაპარაკო, “პრაფანები” არიან, არაფერი არ იციან. მაგენმა უნდა იყვირონ და გამოჩნდნენ ტელევიზორში…
უამრავი საქმეა, აგერ მილიონიანი ფონდი, რომლის გაწერები დაიწყება, ეს ხალხი დასასაქმებელია და თუ არ გაკეთდა, საქმე წინ ვერ წავა. რა თქმა უნდა, მე კი მივიყვან ამ საქმეს ოზურგეთში წინ ქვეყნის ინტერესებიდან გამომდინარე და ავყვები ბიძინა ივანიშვილის პოლიტიკას ფერხულში, მაგრამ მე ვინც წინ გადამიდგება ამ საკითხების მოგვარებაში და ხელს შემიშლის, ვინც არ უნდა იყოს, მის თავს დააბრალოს! მომეხმაროს ყველა, ხომ გაგიგონიათ, “დავაიწე რებიატა, ჟიც დრუჟნო!” მოდით ერთად, საქმე გავაკეთოთ და ჩასაფრებული პოზიცია ვისაც უნდა, იმას ჰქონდეს. მოხმარება მჭირდება, მართლა გეუბნებით, მოხმარება მჭირდება!
_ ვისი მოხმარება გჭირდებათ?
_ აგერ ტიფო მიქატაძეს (ასევე თანამებრძოლი არჩევნების დროს. ავტ.) შევთავაზე, მოდი აგერ მოადგილედ სოფლის მეურნეობის დარგში-თქო და უარი მითხრა, შოთა გოგიბერიძეს ვუთხარი _ უარი მითხრა და ასე არაა რა! ეს სკამი ერთია და ქი დავჯექი ამ სკამზე ჩემი შრომით და ჩემი ხედვით…
_ ბატონო კოტე, თქვენი საუბრიდან რა გამოდის, რომ ყველა ამ სკამისთვის იბრძოდით? აბა, იდეებიო?
_ მე სკამი მჭირდება საქმის გასაკეთებლად, თორემ კაბინეტი 15 წლის წინ მქონდა მე, გამგებელი ვიყავი ახალგაზრდა ბიჭი და გუბერნატორის მოადგილე. სამი მანქანა “გარაჟში” მიყენია, ერთი “დაჩა” მაქვს ბახმაროში მამაპაპური და მე არაფერი არ მჭირდება. მე მინდა საქმე, საქმე მჭირდება! თავს არ ვიქებ, მაგრამ ეს საქმით ჩანს ასე. მინდა, სწორად იყოს ყველაფერი დანახული. 32 კაციდან 30-მა დამიჭირა მხარი და მეტი რა ვქნა ახლა?! ღმერთმა ყველა კარგად ამყოფოს, არავის არ ებრძვის, მინდა საქმე, საქმე ლაპარაკის ნაცვლად!
_ ეგ ხომ “ნაციონალური მოძრაობის” სლოგანია?! მოგწონთ ეტყობა, ისე ხშირად იმეორებთ.
_ მომწონს, რა თქმა უნდა, კარგია! შეიძლება ჩემს თანაგუნდელებს არ მოსწონდეს, მაგრამ მე პირდაპირ გეუბნებით, ძალიან მაგარი რაღაცაა _ “საქმე ლაპარაკის ნაცვლად!” პირველ რიგში საქმე, პატარა ლაპარაკი, ბევრი საქმე!
