ამ დადგენილების შემდეგ, სოციალური მომსახურების სააგენტოს დირექტორის რამაზ სულამანიძის ბრძანების შესაბამისად, რაიონებში მოქალეებს ხელშეკრულებები გაუფორმეს..
სოციალური მომსახურების სააგენტოს გურიის სამსახურის უფროსი ვასილ ხომერიკი “გურია ნიუსთან”აღნიშნავს, რომ მთავრობის დადგენილების შესაბამისად, სოციალური მომსახურების სააგენტოს დირექტორის ბრძანების შემდეგ, ფაქტობრივად, რაიონული განყოფილებები, ბრძანების შესაბამისად, მოცემული სიით უფორმებდა ხელშეკრულებებს, რაც განცხადებებთან ერთად, თბილისში იგზავნებოდა.
_ ბატონო ვასილ, რა მიზნით ხდებოდა ხელშეკრულებების გაფორმება?
_ არ ვიცი.
_ ვის უფორმებდა სოციალური მომსახურების სააგენტო ხელშეკრულებებს?
_ უბრალოდ, მოქალაქეებს.
_ ბატონო ვასილ, როდის მოხდა და რა ვადით ხელშეკრულებების გაფორმება?
_ ერთი თვით გაფორმდა ხელშეკრულებები და ეს ითვალისწინებდა მხოლოდ სექტემბრის თვეს.
_ ანუ წინასაარჩევნო პერიოდს...
_ ეს იყო დასაქმების პროგრამა, რომელსაც, ფაქტობრივად, სააგენტო ახორციელებდა. ჯერ ჩვენი სამსახურში არავის მოსვლია შეტყობინება სამართალდამცავი ორგანოებიდან, არ ვიცით რა ხდება, _ გვითხრა ხომერიკმა.
ოზურგეთის რაიონული პროკურორი კახა კოჩივარი “გურია ნიუსის” ყველა იმ კითხვას პასუხობს, რაც ბოლო დროს გურიაში ხდება. მისი განცხადებით, აღნიშნულ სისხლის სამართლის საქმეზე, რომელიც რამდენიმე დღეა გურიის სამხარეო სამივე რაიონულ სამმართველოში ხდება, სსკ-ს 332 მუხლით მიმდინარეობს გამოძიება, რაც უფლებამოსილების გადამეტებას გულისხმობს.
_ ბატონო კახა, თუ შეიძლება გვითხრათ რაოდენობა იმ მოქალაქეებისა, ვინც დასაკითხთა სიაშია. ჩვენი ინფორმაციით, გურიაში ასეთი 800 ადამინია, მხოლოდ ოზურგეთში _ 300…
_ არა, ზუსტი ციფრი ამ ეტაპზე ნამდვილად არ ვიცი, ყოველი შემთხვევისთვის, რაღაც ნაწილი დაკითხული ჰყავთ რაიონულ სამმართველოებს უკვე. მას დაადგენს გამოძიება, რა გამოიკვეთება გამოძიების პროცესში, რა ახალი ნიუანსები გამოჩნდება, ანუ სადღაც ერთ კვირაში ჩვენ გვეცოდინება სავარაუდოდ ზუსტი პასუხი ამ კითხვაზე.
_ ეს არის “დასაქმების პროგრამა“ რომელსად სოციალური მომსახურების სააგენტო ახორცილებდა, როგორც გურიის სამსახურის უფროსმა განგვიცხადა, ხელშეკრულებების გაფორმება რაიონულ განყოფილებებში ხდებოდა. . .
_ კი ბატონო.
_ ხელშეკრულებები 1 სექტემბერს გაფორმდა და ითვალისწინებდა ერთთვიან პერიოდს. ანუ წინასაარჩვენოდ დასაქმებას ისახავდა მიზნად?
_ დიახ, ასე გამოდის.
_ წინასაარჩევნოდ დასაქმებულ მოქალაქეთა სახელფასო ანაზღაურება ბიუჯეტის თანხებით ხდებოდა?
_ სწორედ მაგაზე მიდის გამოძიება.
_ ანუ მოქალაქეების ხელოვნური დასაქმება ხდებოდა, სინამდვილეში კი მათი შტატები არც კი არსებობდა ასეა?
_ ზუსტად მაგ ნიუანსებს ვარკვევთ გამოძიებით. ამ პიროვნებების დაკითხვით გამოვლინდება დეტალები. ჯერ დეტალურად დაკონკრეტება რაიმესი არ შეიძლება. როცა დასრულდება დაკითხვები და ხელთ გვექნება ამომწურავი ინფორმაცია, იმიტომ რომ შეიძლება დაკითხვის დროს ისეთი ნიუანსი ამოვარდეს, რომელიც გამოძიებისთვის საინტერესო იქნება, ერთი კვირის შემდეგ შემდეგ შეგვეძლება დაკონკრეტება ამ საქმის.
_ ჯერჯერობით, ამ ეტაპზე მხოლოდ მოქალაქეების დაკითხვა მიმდინარეობს? დადგება თუ არა კონკრეტული მაღალჩინოსნის დაკითხვის საკითხი?
_ ეტაპობრივად აუცილებლად მოხდება, ვისაც შეხება ექნება საქმესთან, ყველა ჩინოვნიკი დაიკითხება. სწორედ მაგიტომ დაიწყო გამოძიება, რომ დავადგინოთ რა ხდებოდა რეალურად.
_ ანუ ეს არის გიგი უგულავას “დასაქმების პროგრამის” გაშიფრვა, რომელიც რეგიონებშიც დაიწყო?
_ მე თქვენს ყველა კითხვას ამომწურავი პასუხი გავეცი, ვნახოთ, არაფერს დაგიმალავთ… როცა საქმეზე დამთავრდება გამოძიება და კონკრეტულ საქმეზე მივალთ, ყველაფერს გეტყვით.
_ რა ხდება ოზურგეტის ყოფილი გამგებლის ილია ვაშაყმაძის საქმეზე?
_ სისხლის სამართლის საქმეზე მიმდინარეობს გამოძიება, რომელიც ჯერ დახურული არ არის, ჯერ არ არის საბოლოო გადაწყვეტილება მიღებული.
_ ოზურგეთის მოქმედი გამგებლის კოტე შარაშენიძის ფაქტზე რა ხდება?
_ ამ საქმეზეც მიმდინარეობს სისხლის სამართლის გამოძიება, რომელზეც საბოლოო გადაწყვეტილება უახლოეს დღეებში მიიღება, სავარაუდოდ დაიხურება საქმე მტკიცებულებების არ ქონის გამო. შეიძლება შეწყდეს საქმეზე გამოძიებაც.
_ როგორც ვიცით, 2012 წელს ოზურგეთში “სოფლის მხარდამჭერი პროგრამის“ ფარგლებში განხორციელებული სამუშაოების შესწავლა დაიწყო პროკურატურამ.
_ კი ბატონო, არის კონკრეტული მოქალაქის მიერ შემოტანილი განცხადება ამის შესახებ, გამოძიება დაწყებულია და ყველაფერს მალე მოეფინება ნათელი.
_ ასევე #1 საჯარო სკოლის დირექტორის მიმართ არის კიდევ განცხადება შემოსული პროკურატურაში…
_ დიახ, ამ საქმეზეც დაიწყო გამოძიება, რომელიც ობიქტურად, სამართლიანად, სრულყოფილად ჩატარდება. ქალბატონ მარინე სუნგულიას განცხადებას ახლავს დისკებიც, მოხდება ადგილზე გასვლა, უნდა მივმართოთ შესაბამის ორგანოებს საჭირო დოკუმენტაციის შესახებ და ამის შემდეგ გვეცოდინება რეალური სურათი.
-ბატონო კახა, როგორც ვიცით, ლანჩხუთში სტადიონზე გარკვეული მატერიალური ფასეულობების დაკარგვის ფაქტზე დაწყებულია გამოძიება, გამოვლინდა ნივთების ფარულად დაუფლების ფაქტები და ამასთან დაკავშირებით დაიკითხნენ მაღალჩინოსნები.
_ ამ საქმეზეც, ქურდობის ფაქტზე მიმდინარეობს გამოძიება.
_ დაიკითხა ყოფილი გამგებელი კახა ასკურავა და მოადგილეები დავით ჩხაიძე და ნუგზარ ღლონტი, იყო თუ არა დაკითხვაზე ლანჩხუთის ყოფილი გამგებელი გიორგი გუგუაძე? ვისზე გასვლას ცდილობს გამოძიება?
_ ჯერ არ დაუკითხავთ ლანჩხუთის ყოფილი გამგებელი გიორგი გოგუაძე. ძალიან ბევრი ადამიანი დაიკითხა მოწმის სახით, როცა ამოიწურება ყველა საგამოძიებო მოქმედება მივიღებთ შესაბამის გადაწყვეტილებას. ვერ გაძლევთ ამომწურავ პასუხს, მე თვითონ შევისწავლო უნდა ეგ საქმე, იმის მიხედვით არ არის გამორიცხული, რომ ან იგივე დარჩეს ან კვალიფიკაცია შეიცვალოს საქმემ. ეს ისეთი საქმეებია, რომლებზეც საბოლოო შედეგზე ვერ ვსაუბრობ. სანამ არ ამოიწურება ყველა დეტალი და არ მოხდება კვალიფიკაციის ზუსტი განსაზღვრა.
შეიძლება თუ არა პროკურატურას კიდევ ერთი პროკურორი პეტრე სალუქვაძე შეემატოს? საუბრობენ თქვენს წასვლაზე.
_ ყველა მოქალაქეს, იურისტს, შეუძლია, მიმართოს ნებისმიერ უწყებას ვაკანსიის არსებობის შემთხვევაში დაასაქმოს კონკრეტულ უწყებაში, ალბათ ასე მოხდა პეტრე სალუქვაძის სიტუაციაში, მე ჯერჯერობით არ მსმენია ჩემი წასვლის შესახებ. მე ვარ ოზურგეთის რაიონული პროკურორი, _ ამბობს კოჩივარი.
