“სამწლიანი პროფესიული განათლება არ არის უმაღლესი განათლება” – “უდიპლომო მოსამართლეების “საქმე”

იუსტიციის საბჭოს 25 თებერვლის სხდომაზე ორი მოსამართლის _ ბესარიონ ალავიძისა და მაია გიგაურის კვალიფიკაციის შესახებ მედიით გავრცელებულ ინფორმაციაზეც (ინფორმაცია ვებპორტალ “გურია ნიუსზე” გამოქვეყნდა პირველად) იმსჯელეს. სხდომის  დაწყების წინ, საბჭოს წევრებს საბჭოს თავმჯდომარემ კოტე კუბლაშვილმა მიმართა და განუმარტა, რომ ზემოხსენებულ მოსამართლეებს  უმაღლესი იურიდიული განათლების დამადასტურებელი დოკუმენტები გააჩნიათ.

იუსტიციის უმაღლესი საბჭოს მდივანი ვალერი ცერცვაძე ამბობს, რომ პროკურატურამ   იუსტიციის უმაღლესი საბჭოს აპარატის წევრები დაკითხვაზე არასამუშაო დღეს დაიბარა, თუმცა ისინი  მოსამართლის  საკვალიფიკაციო გამოცდების ჩატარებით  იყვნენ დაკავებულები და მისვლა ვერ მოახერხეს. ცერცვაძე ამბობს, რომ ალავიძე და გიგაური კანონის და კონსტიტუციის სრული დაცვით დაინიშნენ მოსამართლის თანამდებობაზე.

“საქმე მიმდინარეობს არა მოსამართლეების, არამედ იუსტიციის უმაღლესი საბჭოს აპარატის თანამშრომელთა მიმართ სამსახურეობრივ დანაშაულთან  დაკავშირებით. გეტყვით, რომ აქ არ არის არათუ დანაშაულის ნიშნები, არამედ სამსახურეობრივ გადაცდომაზეც არ არის საუბარი, რადგან არსებობს რეგულაციები, მათ შორის იუსტიციის უმაღლესი საბჭოს გადაწყვეტილება, რომ ეს დიპლომი ითვლება უმაღლესი განათლების  დამადასტურებელ დოკუმენტად. კანონი უმაღლესი განათლების შესახებ ამბობს, რომ დიპლომი არის დოკუმენტი, რომელიც ადასტურებს  დიპლომის მფლობელის კვალიფიკაციას ან  შესაბამის ხარისხს. გარდა ამისა, ისმის კითხვა:  თუკი ამ ადამიანებს აქვთ დიპლომი, რაც კანონის თანახმად  ხარისხსა და კვალიფიკაციას ადასტურებს, მაშინ სად ვეძებთ დამნაშავეს? ძალიან დიდი სიფრთხილეა საჭირო როდესაც ვსაუბრობთ მოსამართლეების კვალიფიკაციაზე, მით უმეტეს როდესაც ამ მოსამართლეებს მიღებული აქვთ ძალიან ბევრი გადაწყვეტილება და იმ შემთხვევაში, თუ თეორიულად დავუშვებთ, რომ ამ მოსამართლეების კვალიფიკაცია დადგება კითხვის ნიშნის ქვეშ, ყველა ეს საქმე დადგება კითხვის ნიშნის ქვეშ, რაც  დაუშვებელია.” _ განაცხადა ვალერი ცერცვაძემ.

იმის გასარკვევად, სადავო დიპლომის მიღების შემდეგ ითვლება თუ არა პირი უმაღლესი განათლების მქონედ, “გურია ნიუსი” ივანე ჯავახიშვილის სახელობის თბილისის სახელმწიფო უნივერსიტეტის სასწავლო დეპარტამენტის უფროსის მოადგილე რუსუდან სანადირაძეს დაუკავშირდა:

“2005 წელს, მინისტრის ბრძანებით, დიპლომი და დიპლომის დანართი გახდა მკაცრი აღრიცხვის დოკუმენტები. მანამდე კი ნებისმიერი სასწავლო კურსის დამთავრების ბოლოს აძლევდნენ დიპლომებს. იმის გამო, რომ ასეთ ადამიანებს პრეტენზია არ ჰქონოდათ უმაღლეს განათლებაზე, ამ ტიპის დიპლომებს დაერქვა სერთიფიკატები. სამწლიანი პროფესიული განათლება არც ერთ შემთხვევაში არ არის უმაღლესი განათლება, უბრალოდ იმ მოწმობას სახელად დაარქვეს დიპლომი. თუ კი დიპლომში წერია სიტყვა _ “სპეციალობით” და არ წერია _ “მიენიჭოს ბაკალავრის ხარისხი”, ეს ნიშნავს იმას, რომ აქ საუბარი არ არის უმაღლეს განათლებაზე. 2002 წელს იურიდიული ფაკულტეტი გასცემდა დიპლომს, სადაც ეწერა “მიენიჭოს იურისტის კვალიფიკაცია” და ეს ნამდვილად არის უმაღლესი განათლების დამადასტურებელი დოკუმენტი. უფრო დეტალური ინფორმაციისთვის შეგიძლიათ წერილობით მოგვმართოთ და ნამდვილობის დასადგენად მაია გიგაურის დიპლომს შევისწავლით,” _ გვითხრა რუსუდან სანადირაძემ.