და საყოველთაო ჯანდაცვის პროგრამა გააცნო, რომელიც 28 თებერვლიდან ამოქმედდა. შეხვედრას ესწრებოდნენ პარლამენტის ჯანდაცვის კომიტეტის თავმჯდომარე დიმიტრი ხუნდაძე და ჩოხატაურის მაჟორიტარი დეპუტატი თემურ ჭკუასელი. შეხვედრა კითხვა-პასუხის რეჟიმში მიმდინარეობდა. ექიმები მინისტრს მუნიციპალიტეტების სამედიცინო ცენტრებში არსებულ პრობლემებზე და იმ საჭირბოროტო საკითხებზე ესაუბრნენ, რაც მათ აწუხებთ და მათი აზრით, პირველ რიგში მოსაგვარებელია. კითხვები შეეხებოდა სადაზღვევო კომპანიებისა და სამედიცინო ცენტრების ურთიერთობას, ოჯახის ექიმის ინსტიტუტს და ა.შ. ყველაზე პრობლემატური საკითხი კი რაიონებში მთავარი საავადმყოფოების ბურუსით მოცული მომავალია _ ამ ბურუსის შემოქმედი კომპანია “ადითია”, რომელმაც ლანჩხუთსა და ჩოხატაურში საავადმყოფოები შეიძინა და თანამედროვე ტიპის სამკურნალო დაწესებულებები უნდა “წამოეჭიმა”.
“მოგესალმებით ჩემს მიწაზე!” _ ასე შეხვდა თავის დროზე კომპანიის მენეჯერი გურულ ექიმებს. “თავიანთ მიწაზე” “ადითმა” საკუთარი წესები შემოიღო: გაზარდა ფასები, შეამცირა შტატები და ხელფასები, მედპერსონალი გადაიყვანა გამომუშავებაზე და 15 ლარიდან მათთვის მხოლოდ 2,5 ლარს იმეტებდა. ამას კი საავადმყოფოებიდან პროფესიონალების გადინება, ინფრასტრუქტურის მხრივ სავალალო მდგომარეობა და საეჭვო მომავალი მოჰყვა.
“მზად ვართ ყველა საავადმყოფო მოვინახულოთ და ადგილზე გავეცნოთ არსებულ პრობლემებს. დღევანდელმა შეხვედრამ კიდევ ერთხელ ცხადჰყო, რომ მუნიციპალიტეტებში ძალიან ბევრი პრობლემა არსებობს, შევეცდებით, ყველა იმ პრობლემას, რაც ამ შეხვედრაზე დაისვა კომპლექსურად მივუდგეთ,” _ აღნიშნა მინისტრმა შეხვედრაზე.
ვინ არის “ადითი” და რატომ არ გაწყვიტა მასთან ხელშეკრულება ახალმა ხელისუფლებამ? ებრაული კომპანია დღემდე დანაპირებს არ თუ ვერ ასრულებს. გასაგებია, რომ მას “ნაციონალური მთავრობა” პასუხს არაფერზე სთხოვდა, მაგრამ ახალი ხელისუფლების მოსვლიდან რამდენიმე თვეში ვითარება მაინც უცვლელია _ “ადიტტი” განაგრძობს საავადმყოფოებთან დადებული ხელშეკრულების ცალმხრივად, სათავისოდ გამოყენებას.
ლანჩხუთისა და ჩოხატაურის სამედიცინო დაწესებულებები ებრაულმა კომპანიამ “ადითიმ” ჯერ კიდევ ორიოდ წლის წინ შეიძინა შეიძინა და ვალდებულება აიღო, რომ ორივე მუნიციპალიტეტში თანამედროვე ტიპის კლინიკებს მოაწყობდა.
“გურია ნიუსი” ჯერ კიდევ მაშინვე გამოთქვამდა ვარაუდს, რომ კომპანია კავშირში იყო ასევე ებრაულ კომპანია “აიჰოპთან”, რომელსაც სახელმწიფოსთან შეთანხმებული, მაგრამ შეუსრულებელი პროექტების გამო, დისკვალიფიკაცია მიეცა, “ადითის” “შემოყვანა” კი დისკვალიფიკაციის გადასაფარად გახდა საჭირო.
“ჩვენი კომპანია საკმაოდ წარმატებულია სამედიცინო სფეროში. ჩვენი დონორია ებრაული კომპანია, რომელიც, მთელი ქვეყნის მასშტაბით, 9 რეგიონულ სამედიცინო ცენტრს ააგებს. ბუნებრივია, ყველა რეფორმას თან ახლავს თავისი დადებითი და უარყოფითი მხარეები. როცა რეფორმა იწყება, დასაწყისში, შესაძლოა, ბევრი რამ იყოს უარყოფითი, მაგრამ შემდეგ ვითარება უმჯობესდება. ჩვენი კომპანია კერძოა და ბუნებრივია, ბიზნესის თვალით უყურებს ყველაფერს. ლანჩხუთში მომუშავე მედპერსონალს იმ დონეზე ვიცნობ უკვე, რომ გარკვეული ანალიზის გაკეთება შეიძლება. ვფიქრობ, ამ ეტაპზე შტატები შენარჩუნდება, მომავალში კი რა იქნება, წინასწარ ვერ გეტყვით. მხოლოდ ერთი რამის თქმა შემიძლია: არსებული პერსონალი აუცილებლად უნდა გადამზადდეს. საერთოდ, რეგიონებში, მედიცინის მუშაკების მენტალიტეტიც არის შესაცვლელი. ლანჩხუთში ვინც კარგი სპეციალისტია, ბუნებრივია, იმუშავებს, ვისაც სერთიფიკატი არ აქვს, მასთან თანამშრომლობა, ალბათ, არ შედგება. პირობას გაძლევთ _ ლანჩხუთში იქნება კომფორტული საავადმყოფო, რომელიც დღევანდელს ბევრად აჯობებს. კლიენტს, რომელსაც ფულს ახდევინებ, შესაბამისი პირობები უნდა შეუქმნა. გავიგე, რომ ჩვენი ფასები მაღალი იყო, რამაც უკმაყოფილება გამოიწვია. გიდასტურებთ, რომ თავდაპირველად მართლაც მაღალი ფასები იყო. შემდეგ შევისწავლეთ არსებული ბაზარი, არსებული რეალობა და გადავწყვიტეთ, მომსახურება გაგვეიაფებინა. შემიძლია გითხრათ, რომ დღეს არსებულ ფასებთან მიმართებაში ჩვენი შემოთავაზება არათუ გაზრდილი, უმეტეს შემთხვევაში, დაბალიც კია.” _ აცხადებდა კომპანია “ადიტტის” რეგიონული მენეჯერი ზურაბ დანელია.
დღეის მდგომარეობით გამოდის, რომ მენეჯერმა თავიდან ბოლომდე იცრუა _ არც დაბალი ფასებია, არც კომფორტული საავადმყოფო და რაც შეეხება შტატებსა და გადამზადებას _ საავადმყოფოდან პროფესორები გარბიან, გადამზადება კი იმაში გამოიხატება, რომ მედპერსონალს ხელფასები შეუმცირეს _ დოქტორის ხარისხის მქონე პერსონალი თვეში 100 ლარსაც კი ვერ იღებდა.
მაშინ მენეჯერი ჩვენთან საუბარში კიდევ უფრო დიდ ტყუილებს ამბობდა: “გვექნება გარკვეული სოციალური პროექტებიც. ვითანამშროლებთ ყველა სადაზღვევო კომპანიასთან და კლინიკებთანაც. ბენეფიციარს არჩევნის საშუალება უნდა ჰქონდეს და თავად წყვეტდეს, რომელ კლინიკას მიმართოს. ლანჩხუთში ჩამოვიტანთ თანამედროვე დანადგარებს. გამოკვლევები, რომლის ჩატარება ადგილზე არ იქნება შესაძლებელი, ალბათ, ქუთაისში ჩატარდება. თუ პაციენტთა რიცხვი იქნება მაღალი, ჩვენ შეგვეძლება სპეციალისტები მოვიწვიოთ თბილისიდან ან ქუთაისიდან. ამით მოსახლეობას ზედმეტი ხარჯებისგანაც დავიცავთ. მაგალითად, ჩოხატაურში არის საკმაოდ მაღალკვალიფიციური ენდოკრინოლოგი, რომელიც გარკვეულ დღეებში ლანჩხუთში ჩამოვა. ჩვენ ქსელში დასაქმებული ექიმები გარკვეულ როტაციას აუცილებლად გაივლიან. ახალი შენობა აუცილებლად აიგება. საავადმყოფო 35 საწოლზე იქნება გათვლილი და ვფიქრობთ, რომ ბენეფიციარები მომსახურებით კმაყოფილი გვეყოლება.”
აი, რა საუბარი შედგა ჩვენსა და “ადიტტის” მენეჯერს შორის მაშინ, როცა ჯერ კიდევ დასაჯერებელი შეიძლებოდა ყოფილიყო კომპანიის ტყუილები:
_ მართალია თუ არა ინფორმაცია, რომ ექიმებს ხელფასები შეუმცირდებათ?
_ ჩვენი კომპანია კერძოა და ამ შეკითხვას არ ვუპასუხებ. ვის რა ხელფასი ექნება, ეს ჩვენი შიდა საქმეა. რაც საჭირო იყო, ყველაფერი ვუთხარი კორესპონდენტს. დაინტერესების შემთხვევაში, თქვენი კონსტიტუციური ნებაა, ექიმებს ჰკითხოთ ამის შესახებ, თუ, რა თქმა უნდა, გიპასუხებენ.
_ გასაგებია, გმადლობთ.
_ ერთი რაღაც მინდა გითხრათ _ როცა კორესპონდენტი რაიმეს იკითხავს, ჯერ უნდა გაარკვიოს, რას კითხულობს. ჩვენ შესახებ არის ინფორმაცია ინტერნეტში და ვინც ინტერნეტში მუშაობა იცის, ნახავს, რომ ჩვენ ვართ კერძო კომპანია. შევთანხმდით ამაზე? რაც კითხვა გექნებათ, დამიკავშირდით და გიპასუხებთ(?!).
ჩვენმა კითხვამ “კერძო კომპანიის” მენეჯერი, რომელიც ჯერ ფასებს აწესებს და მერე სწავლობს ბაზარს, აშკარად გააღიზიანა და “ჭკუის დარიგება” დაგვიწყო _ თურმე, სანამ კითხვას დავსვამდეთ, მანამდე “ინტერნეტში მოვიძიოთ”, შეიძლება თუ არა ამ კითხვის დასმა. ამასთან, “ინტერნეტში მუშაობაც უნდა ვიცოდეთ”! ალბათ, ბატონი დანელია ფიქრობდა, რომ ჩვენისთანა “სოფლელებისთვის” ინტერნეტი საერთოდ უცხო ხილია. თუმცა, ამ შემთხვევაში მენეჯერი შეცდა _ ინტერნეტის ცოტა რაღაც გაგვეგება და ამ “ADITTI “-ს (კომპანიის სახელი სწორედ ასე ეწერა დანელიას სავიზიტო ბარათზე) შესახებ ინფორმაციის მოპოვება ბატონი ზურაბის მიერ “ნასწავლი გზით” ვცადეთ, თუმცა, უშედეგოდ: მსოფლიო ქსელმა უარი გვტკიცა, რა დაგკარგვიათ, რას ეძებთო! მერე ცნობილი საძიებო სისტემებით ვცადეთ ADITTI -ს მოძებნა _ ეს სახელი ქართულად, რუსულად, ინგლისურად, გერმანულად, ფრანგულად და თქვენ წარმოიდგინეთ, ებრაულადაც კი ავკრიფეთ, მაგრამ ისევ არაფერი გამოგვივიდა _ ინტერნეტში ორი-სამი ADITTI კი ვნახეთ, მაგრამ ჩვენ რომ გვაინტერესებდა, იმის მსგავსი არაფერი _ მაგალითად, საინფორმაციო ტექნოლოგიების და მომსახურების ფირმა ინდოეთში; ინდოელი მომღერალი; დოღის ცხენი გერმანიაში…
ჩვენი ვარაუდი, “ადიტტი” იგივე “აიჰოპი” ხომ არ არის, რომელიც “100 საავადმყოფოს” პროგრამაში მონაწილეობდა და ვალდებულებების შეუსრულებლობისთვის, საქართველოს მთავრობამ, 2010 წელს, პროგრამიდან “გამოთიშა” _ დავით სერგეენკომ დაადასტურა. მისი თქმით, აქ მთავარი არის “აიჰოპი” და არა “ადიტტი”, მაგრამ სახელებს არანაირი მნიშვნელობა არ აქვსო. მართალია, მინისტრი _ რა მნიშვნელობა აქვს _ “ადიტტი” მოგვატყუებს თუ “აიჰოპი”, მაგრამ თუ ეს “ადითი” მართლაც “აიჰოპის” “შვილობილ-ბიძაშვილ-მამიდაშვილია”, აქ იკვეთება დანაშაულებრივი სქემა, ანუ გამოდის, რომ “ვიღაცებმა” ჯერ “აიჰოპის” სახელით “დაგვაბოლეს”, შემდეგ კი _ “ადითის”.
სხვათა შორის, ჯანდაცვის მინისტრს ლანჩხუთში სტუმრობისას უთხრეს, რომ ამ ებრაული კომპანიების უკან დავით კეზერაშვილი დგას, თუმცა, მათ ამის მტკიცებულება არ აქვთ და მხოლოდ გავრცელებულ ხმებს ეყრდნობიან. რა ელის ლანჩხუთისა და ჩოხატაურის საავადმყოფოებს “ადითის” ხელში, დავით სერგეენკოს პასუხი ასეთია: “მარტის ბოლომდე აქვთ ვადა და მანამდე ჩემი მხრიდან არაკორექტული იქნება საუბარი, რა არ შეასრულა კომპანიამ. თუმცა, გპირდებით, როცა ეს ვადა ამოიწურება და დავინახავთ, რომ კომპანიამ პირობები არ შეასრულა, მასთან ხელშეკრულება გაწყდება და ეს ყველაფერი გადავა სამართლებრივი კუთხით _ სწორედ სასამართლო გაარკვევს, ამა თუ იმ კომპანიამ რა დააშავა. ჩვენის მხრივ გპირდებით, რომ ყველაფერს გავაკეთებთ, რომ სიტუაცია გამოსწორდეს”.
ვნახოთ, მარტის ბოლომდე ერთი კვირა დარჩა…
