წერილში ნათქვამია: ” საქართველოს კათოლიკოს-პატრიარქის ლოცვა-კურთხევით შექმნილი საზოგადოებრივი მოძრაობა “ლაზარეს” პრესცენტრი სკანდალურ განცხადებას ავრცელებს და თინა ხიდაშელს “იეღოველთა კონგრესის” ორგანიზებაში ადანაშაულებს.
“ნიუპოსტი” უცვლელად გთავაზობთ “ლაზარეს” პრესცენტრის განცხადების ტექსტს, რომელიც დაახლოებით 23:00 საათზე “ლაზარეს” “ფეისბუქის” გვერდზე გავრცელდა:
“საზოგადოებრივი მოძრაობა “ლაზარეს” განცხადება!
მოძრაობა “ლაზარე” საყოველთაო სახალხო განგაშს ტეხს!
როგორც დაზუსტებული ინფორმაციით გვაცნობეს, 7 აპრილს, ხარება დღეს, უმრავლესობის დეპუტატისა და პარლამენტის თავმჯდომარის მეუღლის თინა ხიდაშელის ხელმძღვანელობით, სპორტის სასახლეში “იეღოველთა მსოფლიო კონგრესის” ჩატარება იგეგემებოდა. რამდენადაც მოძრაობა “ლაზარესთვის” ცნობილია, სპორტის სასახლის ადმინისტრაცია ეწინააღმდეგება ამ ღონისძიების ჩატარებას. ამდენად, მისი ჩატარება მარნეულში გადაწყდა.
საზოგადოებრივი მოძრაობა “ლაზარე” გამოთქვამს უკიდურეს აღშფოთებას და პროტესტს “რესპუბლიკური პარტიის” ლიდერის, თინა ხიდაშელის მიერ, ამ ინიციატივის გამო. თვლის, რომ არც ერთ პოლიტიკურ პარტიას (თუნდაც უმრავლესობით მოსულს), არ აქვს უფლება სამოციქულო მართლმადიდებლურ ეკლესიისა და ქართველ ხალხთან შეთანხმების გარეშე, მსგავსი ღონისძიების ორგანიზების დაგეგმვისა. 7 აპრილს _ ხარება დღეს, ამ ღონისძიების დაგეგმვის მცდელობა კი, სხვა არაფერია, თუ არა “რესპუბლიკური პარტიის” მხრიდან კიდევ ერთხელ, საქართველოს ისტორიული და ტრადიციული რელიგიის ხელყოფის მცდელობა; მართლმადიდებელი ქართველი ხალხის რელიგიური გრძნობების შეურაცხყოფა და ქართული საზოგადოებისთვის მიუღებელი “იეღოვას მოწმეთა სექტის” აღზევების სურვილი!
მსგავსი ღონისძიებების დასაფინანსებლად კი, უცხოელი დონორებიც ალბათ მილიონებით დოლარებს გაიღებენ, რათა მერამდენედ სცადონ საქართველოში მართლმადიდებლური ცნობიერების საფუძვლების შერყევა. ვაცხადებთ პროტესტს, რომ უმრავლესობის წევრების მხრიდან მსგავსი ქმედებები არ ნიშნავს “დემოკრატიული ფასეულობების” ერთგულებას! ეს მხოლოდამხოლოდ, ქართული სამოციქულო ეკლესიისთვის ძირგამომთხრელ საქმიანობას ემსახურება!
საზოგადოებრივი მოძრაობა “ლაზარეს” პრესცენტრი.”
“ლაზარეს” განცხადებას თინა ხიდაშელი სოციალურ ქსელ ფეისბუქში ერთი საათის წინ ასე გამოეხმაურა:
_ მგონი, ვბრაზდები. მეგონა, ასეთ ამბებზე აღარ ვრეაგირებდი. კიდევ კარგი, რომ თბილისში არ ვარ, მაგრამ დღეს ხომ ჩამოვალ, და ეს ლაშა ბერულავა (სტატიის ავტორი. ნ. გ.) მინდა გავიცნო და ვინმე არ დამეხმარებით?! ისე არა მხოლოდ ბერულავა, თავად ეს “ლაზარე” გამომეხმაუროს, ტელეფონის ნომერი და სახელი და გვარები მინდა ამ დასახელების უკან მდგომი ადამიანების. ისე საღამოობით დავფრინავ ხოლმე და მერიდეთ.
ძონძები, ძალიან ვარ გაბრაზებული. აი, ძალიან, ძალიან, ცეცხლებს რომ ყრის ისეთი სმაილიკი, _ წერს ხიდაშელი.
