პროგრამა ყოფილ მსჯავრდებულთა ფსიქოლოგიურ დახმარებაზე, სოციალური უნარების განვითარებასა და დასაქმებაზე იქნება მიმართული. იუსტიციის მინისტრი თეა წულუკიანი “გურია ნიუსთან” საუბარში ამბობს, რომ ყოფილი პატიმრების მხრიდან რეაბილიტაციის პროგრამით დაინტერესების და ჩართულობის იმედი აქვს.
“სტატისტიკა ძალიან შემაგულიანებელია. თავიდან, როდესაც გამოვაცხადეთ, რომ ყოფილ პატიმრებთან დანაშაულის პრევენციის ცენტრი იმუშავებდა, იმის გამო, რომ მათი ოფისები იუსტიციის სამინისტროშია განთავსებული, ყოფილი პატიმრები გვითვლიდნენ: მთავარი პროკურატურის შენობის წინ სამარშრუტო ტაქსითაც კი არ დავდივართ, არამც თუ იუსტიციის სამინისტროს შენობაში მოვალთო. მათ ჰქონდათ აღნიშნული ინსტიტუტების უარყოფა იმ უსამართლობიდან გამომდინარე, რაც მათ გამოიარეს. შემდეგ სიტუაცია შეიცვალა და დღეისთვის 600 ყოფილი პატიმარია ჩვენთან გასაუბრებაზე მოსული. აგრეთვე, რამდენიმე ასეული პატიმარია, რომლებსაც ჩვენს მიერ ნოემბერ-დეკემბერში და იანვარში აყვანილი სოციალური მუშაკები შეხვდნენ ციხეებში და 400-მდე პატიმარი უკვე მზად არის მიიღოს ჩვენს მიერ შეთავაზებული სერვისები.”
იუსტიციის მინისტრი ამბობს რომ არასამთავრობო სექტორის და ზოგადად საზოგადოების ჩართულობას ყოფილი პატიმარების რესოციალიზაციის პროცესში გადამწყვეტი მნიშვნელობა აქვს.
“ჩვენ არასამთავრობო სექტორის სერიოზული დახმარება გვჭირდება და ამიტომაც ვაცხადებთ გრანტებს. ხვალვე დავასახელებ კერძო სექტორიდან იმ ადამიანებს, რომლებმაც ჩვენი შუამდგომლობით ყოფილი პატიმრები დაასაქმა. ესენი არიან ტაქსის მძღოლები თუ სხვა. ამ ადამიანებთან კოორდინაციაში ვაპირებთ მუშაობას, იმიტომ, რომ სამსახურის პოვნა ჯერ კიდევ არ ნიშნავს იმას, რომ ყოფილი პატიმარი ამ სამსახურს ერთ მშვენიერ დღეს არ მიატოვებს სხვადასხვა სიძნელის გამო. ყოფილ პატიმარს ყოველთვის სჭირდება გრძლევადიანი გვერდში დგომა იმისთვის, რომ საზოგადოების სრულფასოვანი წევრი გახდეს და საზოგადოება გახდეს სრულფასოვანი ყოფილი პატიმრების მიმართ. სწორედ ამიტომ, როდესაც ვაცხადებთ არა ერთ კონკურსს იუსტიციის სამინისტროში, ყოველთვის მივუთითებთ, რომ ყოფილ პატიმრებს შეუძლიათ მონაწილეობა საჯარო სამსახურის შესახებ კანონით დადგენილი გამონაკლისის გათვალისწინებით და რომ ჩვენთვის ადრე ციხეში ნამყოფი ადამიანი სტატუსი არაფერს ნიშნავს,” _ აცხადებს იუსტიციის მინისტრი “გურია ნიუსთან”.
