“მინდა, ბატონმა ბიძინამ გაიგოს, ვინ დგას მის გვერდით”

მიუხედავად იმისა, რომ მან უმაღლესი ქულები მიიღო, მაინც კონკურსს მიღმა აღმოჩნდა. კონკურსის შედეგები ქალბატონმა ნანამ გაასაჩივრა.

ეს თემა “გურია ნიუსმა” უკვე გააშუქა, ამჯერად კი გვინდა გიამბოთ, თუ რა პასუხი მიიღო ნანა ბზეკალავამ საჩივარზე.

ნანა ბზეკალავა: “საზოგადოებისთვის ცნობილია, სოფლის მეურნეობის სამინისტროს მიერ გამოცხადებული კონკურსის შესახებ. ისიც ცნობილია, რომ თანამდებობაზე დაინიშნა დაბალქულიანი, ყოფილი გამგებლის, გია გოგუაძის რძალი, ქალბატონი თამარ როყვა. ეს ფაქტი გავაპროტესტე სოფლის მეურნეობის სამინისტროში. ამის საპასუხოდ თქვენ მედიასაშუალებასთან სოფლის მეურნეობისა და სურსათის დეპარტამენტის უფროსმა, ბატონმა კოტე ხურცაიძემ გააკეთა კომენტარი, რომ ამ ეტაპზე მნიშვნელობა არ მიუნიჭებია ქულებისთვის და აქ იყო სხავა მოთხოვნა: “რაც შეეხება უფროს სპეციალისტს, აქ გვქონდა ჩვენ მოთხოვნები _ ეს არის, ძირითადად ტექნიკური სამუშაოები _ ჩვენი ელექტრონული ბაზების შექმნა, ელექტრონული მონაცემების დამუშავება…”

მინდა განვაცხადო, რომ ამ მიმართულებით არც ერთი კონკურსანტი არ შემოწმებულა, ხოლო რაც შეეხება განათლებას, მე დამთავრებული მაქვს ტექნიკური უნივერსიტეტის ავტომატიკისა და გამოთვლითი ტექნიკის ფაკულტეტი და ასევე საჯარო სკოლაში ვასწავლი საინფორმაციო და საკომუნიკაციო ტექნოლოგიებს, ხოლო ქალბატონი როყვა არის უცხო ენების სპეციალისტი და ამჟამად მუშაობს ბანკში. აქედან გამომდინარე, მაინტერესებს, რაზე დაყრდნობით გამოიტანა კომისიამ შესაბამისი გადაწყვეტილება?

რაც შეეხება ოფიციალურ პასუხს, სოფლის მეურნეობის სამინისტროს მიერ გამოგზავნილ შეტყობინებაში წერია: “კომისიის გადაწყვეტილება მიიღება ღია კენჭისყრით დამსწრე კომისიის წევრთა უმრავლესობით. ხმების თანაბრად გაყოფის შემთხვევაში, გადამწყვეტია სხდომის თავმჯდომარის ხმა. ზემოთ აღნიშნულიდან გამომდინარე, საკონკურსო-საატესტაციო კომისიამ მიიღო შესაბამისი გადაწყვეტილება…”

შეტყობინებას ხელს აწერს მინისტრის პირველი მოადგილე, ბატონი დავით შერვაშიძე, რომელიც ამავე დროს იყო საკონკურსო-საატესტაციო კომისიის თავმჯდომარე. გამოდის, რომ ჩემი საპროტესტო განცხადება განიხილა იგივე კომისიამ, რომელმაც მიიღო პირველი გადაწყვეტილება.

ამ ფაქტის შესახებ კომენტარი საზოგადოებამ გააკეთოს, მე კი ვეცდები, ეს ინფორმაცია როგორმე ბატონ ბიძინა ივანიშვილამდე მივიტანო. ის ადამიანი ღირსია იცოდეს, ვინ დგას მის გვერდით,” _ გვითხრა ნანა ბზეკალავამ.

ჩვენ თამარ როყვას დავუკავშირდით, რომელმაც გვითხრა, რომ კონკურსის პირობები კომპიუტერული და უცხოენების ცოდნას ითვალისწინებდა: “ვერ ვხვდები, რა პრეტენზიები აქვთ ამ ხალხს. კონკურსი რომ გამოცხადდა, ყველას გვქონდა უფლება, მიგვეღო მასში მონაწილეობა. როცა ტესტირებაზე გავედი, იქვე ითქვა, რომ ქულებს მნიშვნელობა არ ჰქონდა და მერე უკვე გასაუბრება წყვეტდა, ვინ დაინიშნებოდა და ვინ _ არა. სამინისტროში, როგორც კი გაიგეს, რომ ინგლისური ენის სპეციალისტი ვიყავი, ძალიან ესიამოვნათ; ასევე, კარგად ვფლობ კომპიუტერულ პროგრამებს. ამასთანავე, კარგად ვიყავი მომზადებული, მოვიპოვე მასალები და ვიცოდი, რაზეც მივდიოდი. ვფიქრობ, რომ ძალიან წარმატებით გადავლახე ყველა ბარიერი. უკვე ვიყავით სოფლის მეურნეობის სამინისტროში, ჩავიტანეთ საბუთები და გვითხრეს, რომ ამ თვეში უკვე დაიწერება ბრძანება ჩვენი დანიშვნის შესახებ.”