სტამბოლის პროცესის მეათე რაუნდში მონაწილეობის მისაღებად თურქეთში საქართველოდან და რუსეთიდან 11 მონაწილე შეიკრიბა.
ICCN–მა, სტამბოლის პროცესს, საექსპერტო დიალოგის ჭრილში, 2008 წლის აგვისტოს ომის შემდეგ ჩაუყარა საფუძველი.
სამოქალაქო სექტორისა და არასამთავრობო ორგანიზაციების წარმომადგენლებმა, სტამბოლში საქართველო–რუსეთის ურთიერთობების სამართლებრივი პერსპექტივები განიხილეს და იმსჯელეს ორივე ქვეყანაში არასამთავრობო სექტორისა და ზოგადად, სამოქალაქო საზოგადოების წარმომადგენელთა მდგომარეობასა და ქართულ–რუსულ ურთიერთობებზე საერთაშორისო კონტექსტში.
დელეგაციის ხელმძღვანელმა, ICCN–ის დირექტორმა გიორგი ხუციშვილმა ხაზგასმით აღნიშნა, რომ მიუხედავად არსებული დაძაბულობისა, 2012 წლის საპარლამენტო არჩევნების შედეგად ხელისუფლებაში მოსულმა ახალმა მთავრობამ, რუსეთთან ურთიერთობების დარეგულირების მხრივ მკაფიო კურსი აირჩია და ამ კუთხით პირველი ნაბიჯებიც გადადგა.
ქართულ–რუსული ურთიერთობის დარეგულირებისკენ მიმართული პროცესის პრაქტიკული განხორციელების მიზნით, განსაკუთრებულ მნიშვნელობას იძენს მიმდინარე პროცესებში არასამთავრობო სექტორისა და სამოქალაქო საზოგადოების აქტიურად ჩართვა. აღინიშნა, რომ სტამბოლის პროცესს ქართულ–რუსული დიალოგის განვითარებაში არსებითი წვლილი შეაქვს.
შეხვედრის მონაწილეებმა ერთობლივი რეკომენდაციები შეიმუშავეს, რომლებიც მოიცავენ როგორც საერთო მიმართულებებს ისე მომავალი მოქმედებებისთვის საჭირო ტაქტიკურ ნაბიჯებს. კერძოდ, სტამბოლში აღინიშნა, რომ ორ სახელმწიფოში მოქმედ არასამთავრობო ორგანიზაციათა ინიციატივები საქართველოსა და რუსეთს შორის დიალოგის განვითარებისთვის საჭირო ოპტიმალური გზების ძიებისკენ არის მიმართული. ორივე ქვეყნის მთავრობებმა ხელი უნდა შეუწყონ არასამთავრობო ორგანიზაციების საქმიანობას და ასოციაციების თავისუფალი უფლებების პრაქტიკაში განხორციელებისთვის ხელსაყრელი პირობების შექმნას. ამას გარდა, დიალოგისა და ურთიერთინტერესების მხარდასაჭერად, აუცილებელია ორი ქვეყნის არასამთავრობო ორგანიზაციებსა და სამოქალაქო საზოგადოების წარმომადგენელებს შორის გაცვლითი პროგრამების განხორციელება. აღინიშნა, რომ ორმხრივი პროექტების რეალიზების მიზნით, მათ შორის, პოსტკონფლიქტური ვითარების დარეგულირების ხელშესაწყობად, საჭიროა ერთობლივი მუდმივმოქმედი პლატფორმის (მათ შორის ონლაინ პლატფორმის) შექმნა. მდგრადი დიალოგის წარმოების საფუძვლად მიზანშეწონილია ჰუმანიტარული და ეკონომიკური ურთიერთობების განვითარება და მათი ყოველმხრივი მხარდაჭერა.
დასახული მიმართულებების რეალიზაციისთვის, ტაქტიკური მოქმედებების სახით, ისეთი ნაბიჯები გამოიკვეთა როგორიცაა – სავიზო რეჟიმის გამარტივება, საქართველოდან რუსეთში ღვინის, მინერალური წყლებისა და სოფლის მეურნეობის პროდუქციის მიწოდების აღდგენა, ორმხრივი ტურიზმისა და სატრანსპორტო ინფრასტრუქტურის განვითარება, ჯანდაცვის სფეროში თანამშრომლობა და ბიზნეს–ფორუმების ორგანიზება, ტერორიზმთან ბრძოლის კუთხით ინფორმაციის გაცვლა, ისტორიულ–სასულიერო კავშირების განვითარება, ერთობლივი ფესტივალების გამართვა, საქართველოში რუსული ენის სწავლებისა და რუსული სკოლების აღდგენა, სტუდენტთა გაცვლითი პროგრამების განვითარება, მედიის წარმომადგენელთა თანამშრომლობა და „მშვიდობის ინფრასტრუქტურის“ შექმნა.
მხარეები შეთანხმდნენ კოორდინირებულ მოქმედებაზე, რათა მაქსიმალურად შეუწყონ ხელი მიღებული რეკომენდაციების განხორციელებას და ორ ქვეყანას შორის თანამშრომლობის გაღრმავებას.
სტამბოლის პროცესი, შეიარაღებული კონფლიქტების პრევენციის გლობალური პარტნიორობის ქსელის (GPPAK) თანადგომით და ბელგიის საგარეო საქმეთა სამინისტროს ფინანსური მხარდაჭერით ხორციელდება.
