_ ოთხშაბათს კლუბი წამყვანმა შვიდეულმა დატოვა და დიდი შანსია, დანარჩენებმაც იგივე გააკეთონ, თუ მათი მოთხოვნები ისევ უგულებელყოფილი იქნება.
ზაზა ურუშაძე მძიმე დღეშია _ მან და მაჟორიტარმა დეპუტატმა ჯერ კიდევ თვეების წინ დაანონსეს, რომ “გურია” მაჩანჩალა არ იქნებოდა, ახლა კი საქმე ისე წავიდა, კლუბმა შესაძლოა, ჩემპიონატი ვერც დაიწყოს. უკეთეს შემთხვევაში, გახსნით მატჩზე დუბლშემადგენლობის გაყვანა შესაძლოა მოხდეს, თუმცა, შემდეგ რა იქნება, არავინ იცის.
ყველაფრის თავი და თავი ფინანსებია. გამგებელს ბევრი მცდელობა ჰქონდა, მაგრამ ფულის მოძიება ვერ შეძლო. ალბათ, მცდელობას არ დააკლებდა მაჟორიტარი თემურ ჩხაიძეც, თუმცა, საჯაროდ “გურიას” ლეგენდარული კაპიტანი აფიქსირებს, რომ ფეხბურთში “არ ერევა” (?!). საბოლოოდ კი, ორივემ კარგად უწყიან, რომ “გურიის” პრობლემები ძირითადად მათ “დაარტყამს”.
არადა, გამგებელს ფინანსების მოძიების იმედი ნამდვილად ჰქონდა _ სხვა შემთხვევაში, ის ასეთ სარისკო გადაწყვეტილებას არ მიიღებდა. თან იმ ფონზე, როცა ის გუნდი, რომელმაც “გურია” უმაღლეს ლიგაში გადაიყვანა, ექვსეულში მოხვედრის და საწყის ორ თვეში ფეხბურთელების უხელფასოდ თამაშის გარანტიას დებდა. წესით, გამგებელს ეს შეთავაზება არ უნდა უარეყო, მაგრამ როგორც ამბობენ, საქმეში პოლიტიკა და ინტრიგები “ჩაერთო”, რამაც საბოლოოდ “გურიას” ინტერესები დააზარალა.
დღეს გამოსავალიც არ ჩანს. ჩვენ ექსკლუზიურად ვწერდით, როცა ამ რამდენიმე დღის წინ, “გურიას” გრიგოლეთის ბაზაზე ფეხბურთელებმა ბუნტი მოაწყვეს. მაშინ არ გავახმაურეთ ის მწვავე საუბარი, რომელიც ფეხბურთელებს გამგებელთან ჰქონდათ. ამით ვეცადეთ, კლუბში დაპირისპირება აგვეცილებინა, რაც აქეთ შემოგვიბრუნდა _ ლამის ჩვენ დაგვბრალდა, თითქოს არანაირი ბუნტი არ ყოფილა და გავაბუქეთ. თუმცა, ჭირმა თავი არ დამალა. მაშინ გუნდიდან ოთხეულის გაშვება იგეგმებოდა, გაფიცვის ორგანიზების ბრალდებით, თუმცა, მთელი გუნდის სოლიდარობის შემდეგ, “გურიიდან” არავინ გაუშვიათ. ახლა კი კლუბი დატოვა წამყვანმა შვიდეულმა: სევასტი თოდუამ და ახალწვეულებმა _ ედიკ საჯაიამ, ალექსანდრე ინწკირველმა, ზურაბ მენთეშაშვილმა, მიხეილ ალავიძემ, რევაზ გოცირიძემ და ზაალ ელიავამ. ალბათ, ძნელი მისახვედრი არ არის, რამხელა ძალა დააკლდა გუნდს.
როგორც ირკვევა, ფეხბურთელებს 2000-ლარიან ხელფასს დაჰპირდნენ, თუმცა, ბოლოს უთხრეს, რომ ეს იყო დარიცხული 2000 და ხელზე 1600 ლარს მიიღებდნენ. ამას გარდა, სევასტი თოდუა, “გურიის” ძველ შემადგენლობასთან ერთად, დარჩენილ დავალიანებას ითხოვდა, რაშიც მის გვერდში ახალწვეულთა ზემონახსენები ექვსეულიც დადგა.
ამჟამად “გურიაში” მაინც რჩება ფეხბურთელთა ის კონტიგენტი, რომელსაც უმაღლეს ლიგაში თამაში ძალუძს, თუმცა, პრობლემა ამ აქაცაა _ მოთამაშეები ძველი დავალიანების დაფარვის გარეშე თამაშს არ აპირებენ. თუ გავითვალისწინებთ, რომ სეზონის გახსნამდე ორიოდე დღეა დარჩენილი, დიდი ალბათობით, “გურია” “ვიტ ჯორჯიას” მცხეთაში დუბლშემადგენლობით ესტუმრება. თუ, რა თქმა უნდა, ამ ორ დღეში ძირითადის მოთამაშეები არ დაიყოლიეს ანაც ფული არ გამოჩნდა, რისი შანსიც მეტისმეტად დაბალია.
ჩვენ კომენტარისთვის “გურიას” ერთ-ერთ ლიდერს, სევასტი თოდუას დავუკავშირდით:
_ სევასტი, რა ხდება, რატომ დატოვეთ გუნდი?
_ ამდენი ხანია, რაც ფეხბურთში ვარ და ამდენი ტყუილი არსად მომისმენია. სამი თვეა, სახლში თეთრი არ გამიგზავნია. ყველამ იცის, რომ მე ფულისთვის არ ვიყავი “გურიაში”, არც ეს ბიჭები, მაგრამ ასეთ მოქცევასაც ვერ ავიტანთ. გადახედეთ, რა ხალხმა დატოვა გუნდი, რა დონეზე აქვთ ნათამაშები. ფულსაც არ ვითხოვდით უსაშველოს _ უმაღლეს ლიგაში და ასეთი დონის მოთამაშეებისთვის 2 ათასი ლარი არც არაფერია. თავიდან დაგვპირდნენ და მერე 1600 ლარიო, გვითხრეს. ექვსეულში მოხვედრის პირობას ვიძლეოდით. ამათ რა უნდათ, ვერ გავიგე!
_ ამ დაკლებულ ხელფასზეც დათანხმდით?
_ არა. ვაჭრობას ვერ დავიწყებდით, ბაზარში ხომ არ ვართ ყველის საყიდლად?! რა უბედურებაა ეს? სამ დღეში ჩემპიონატი იწყება და ასე გვექცევიან! ძველი დავალიანებაც არ გაუსტუმრებიათ, ბიუჯეტი ნული აქვთ. არ იციან, რა იქნება პრემია. თუ არ იცოდნენ და საქმეს თავს ვერ მოაბამდნენ, რა უნდოდათ, ფეხბურთში რომ მოდიოდნენ?
_ სევასტი, უთუოდ ეცდებოდით საქმეში გარკვევას და რას გეუბნებიან?
_ რა უნდა გვითხრან? ამდენი ტყუილი არ გამიგია! გამგებელი რომ კვირაში სამჯერ მოგატყუებს, იქ ყველაფერი დამთავრებულია! რაზე უნდა ილაპარაკო ამის შემდეგ?!
_ როგორც ვიცი, ფეხბურთელთა ნაწილი გამგებელს დღესაც (7 აგვისტოს. ავტ.) შეხვდა…
_ კი, შეხვდნენ. მე არ წავსულვარ. რომ წავსულიყავი, რაღაცას ვერ მოვითმენდი და, იქნებ, დავეჭირე კიდეც. ამდენი ტყუილის მოსმენა ყელში ამოვიდა, ისედაც ბევრჯერ მოვისმინე და აღარც მინდოდა. იმასაც ვფიქრობ, რომ ჩვენ არ ვუნდოდით, თუნდაც იგივე გამგებელს _ პროფესიონალი და საქმის გამკეთებელი, რომელიც სიმართლეს პირში ეტყვის, მაგათ არ უნდათ. ბაზაზე რომ შეკრება იყო, მაშინ გამგებელს პირში მივახალე ყველაფერი და როგორც ჩანს, დაიბოღმა ამაზეც. 300 თუ 500 ლარს დაგირიგებთო, ძველი დავალიანების მოცემა არ უნდოდათ. ახალმოსული ბიჭები გვერდში დაგვიდგნენ. ვინც დარჩა, მათ თქვეს, თუ ძველი დავალიანება არ ჩაირიცხება, სათამაშოდ არ გავალთო. მათი გადასაწყვეტია. “გურიას” რომ ძალიან ცუდი საქმე გაუკეთდა, ეს ფაქტია.
_ რას აპირებთ?
_ რა უნდა ვქნათ, ჩემპიონატის დაწყებამდე 3 დღეა დარჩენილი, მაგრამ არ დავიკარგებით _ ჩვენს თავს მივხედავთ. “გურიაზეც” მაგრად მწყდება გული. ამათ ხელში რა ელის გუნდს, არ ვიცი. მთელი ლანჩხუთი უმაღლესი ლიგის მოლოდინშია და ასეთ “სიურპრიზს” უწყობენ გულშემატკივრებს. მიკვირს, ასეთი ტრადიციების მქონე კლუბი ურუშაძის, ასეთი კაცის ხელში როგორ აღმოჩნდა? შეურაცხყოფილები ვართ _ ფაქტობრივად, გუნდიდან გამოგვყარეს. სიცრუეში ყოფნას ყველაფერი ჯობს. “გურიას” წარმატებას ვუსურვებ, მაგრამ ახლაც არ მჯერა, რომ მისი და ამხელა მუნიციპალიტეტის ბედი ასეთ კაცს აბარია.
