“გურია ნიუსს” პატიმრები დაუკავშირდნენ, რომლებიც ამბობენ, რომ არც სასჯელაღსრულების სამინისტროს და არც უფლებადამცველების მხრიდან ამ ფაქტს რეაგირება არ მოყოლია: “ზურაბ ინაშვილი, მეოცე დღეა შიმშილობს და საერთოდ არავის აინტერესებს ეს ამბავი. ჩვენ ვითხოვთ დროულად მოხდეს მისი საქმის გადახედვა და, ასევე, პროკურატურამ დროულად დაასრულოს გამოძიება ინაშვილის წამების ფაქტებზე,” _ აცხადებენ პატიმრები.
ქსნის N15 დაწესებულების პატიმრებმა შიმშილობის აქცია რამდენიმე დღის წინ დაიწყეს და მალევე შეწყვიტეს ეკა ბესელიასთან და სახალხო დამცველთან შეხვედრის შემდეგ. პატიმრები ამბობენ, რომ დაპირება დაპირებად დარჩა და რეალურად მათ დასახმარებლად არავინ არაფერს აკეთებს.
პატიმრებთან შეხვედრის შემდეგ ეკა ბესელიამ ფეისბუქით გავრცელებულ განცხადებაში აღნიშნა, რომ შეძრულია ნაწამები პატიმრების ისტორიებით და ყველაფერს გააკეთებს მათთვის მდგომარეობის შესამსუბუქებლად: “გუშინ ქსნისა და რუსთავის ციხეში ასობით პატიმარს შევხვდი და ვესაუბრე. 15 წელია ციხე, პატიმარი, სასამართლო _ ჩემი ყოველდღიური საზრუნავი იყო და კარგად ვიცი რა ხდებოდა წლების განმავლობაში, მაგრამ არ შემიძლია იმის გადმოცემა რაც ხდებოდა 7 საათიანი შეხვედრების დროს გუშინ…. საშინლად ნაწამები პატიმრები და წლების განმავლობაში მიღებული ტრავმების აშკარა კვალი, საშინელი განცდა უსამართლობის, მოლოდინი და უმძიმესი ჯანმრთელობის მდგომარეობა… მშრალ შიმშილობაზე მყოფთ საუბრის თავიც არ ჰქონდათ, ვთხოვე და წყლის მიღება დაიწყეს… უმეტესობამ შეწყვიტა შიმშილობა რუსთავში, ქსანში სრულად. საოცრად მადლიერები იყვნენ ამნისტიის კანონით, მაგრამ ითხოვენ უკანონო განაჩენების გადახედვას… დიდი ხანი ვისაუბრეთ… ძალიან გამიჭირდა ემოციურად… ახალგაზრდა, ასაკოვანი, უხელო, ეტლით …. მძიმე მძიმეა მათი ემოცია… რა შედარებაა პირობების თვალსაზრისით, მაგრამ მათ გადატანილი უსამართლობა აწუხებთ… უამრავი წერილი გამომატანეს, ვკითხულობ და ვფიქრობ, ვინმე არ დაგვრჩეს ყურადღების მიღმა… მათ ყველაზე მეტი გადაიტანეს… ძალიან მძიმე იყო ემოციურად ამ ისტორიების მოსმენა”.
