ახლად არჩეული რექტორის მთავარი გზავნილი შემდეგია: „უნივერსიტეტი უნდა იყოს საერთაშორისო დონის და დაიბრუნოს თავისი სახელი”.
რექტორის არჩევნების პარალელურად უნივერსიტეტის ეზოში სტუდენტთა აქცია მიმდინარეობდა. აქციის ორგანიზატორის, სოციალურ და პოლიტიკურ მეცნიერებათა ფაკულტეტის მეოთხე კურსის სტუდენტის, ლევან ლორთქიფანიძის თქმით, მათი მიზანი იყო ის, რომ აკადემიურ საბჭოს მიეღო სინდისიერი გადაწყვეტილება და არ დაეჭირა მხარი რექტორობის კანდიდატ ირმა რატიანისთვის, რომლის დაწინაურება უნივერსიტეტში, როგორც ლორთქიფანიძე ამბობს, ყოველთვის პოლიტიკურ მოვლენებს უკავშირდებოდა.
ლევან ლორთქიფანიძე მიესალმება ლადო პაპავას რექტორად დანიშვნას, თუმცა მიაჩნია, რომ უნივერსიტეტის ხელმძღვანელს მარტო 12 კაცი არ უნდა ირჩევდეს: “ჩვენ, სტუდენტებს მიგვაჩნია, რომ 12 ადამიანი, რომლითაც დაკომპლექტებულია უნივერსიტეტის აკადემიური საბჭო არ არის ლეგიტიმური. საუნივერსიტეტო საზოგადოება შედგება 22- 23 ათასი ადამიანისგან და 12 კაცი არ უნდა იღებდეს უნივერსიტეტს შიგნით გადაწყვეტილებას. სანამ უნივერსიტეტის რექტორს 12 კაცი აირჩევს, მანამდე გრძელვადიანი განვითარების პერსპექტივებზე საუბარი ზედმეტია. უნივერსიტეტში რექტორი უნდა აირჩიოს ყველა პროფესორმა და სტუდენტთა კოლეგიამ.
რაც შეეხება თავად საბჭოს, მე მას ნდობას ვერასდროს გამოვუცხადებ. ამის თქმის უფლებას საბჭოს შემადგენლობა მაძლევს, რომელიც შემდეგნაირადაა დაკომპლექტებული: ფრიდონ თოდუა – ნაციონალური ფრაქციის ერთ-ერთი ლიდერი ძველ პარლამენტში, ზურაბ დავითაშვილი- ნაციონალური ფრაქციის წევრი და დღევანდელი საზოგადოებრივი მაუწყებლის ბორდის წევრი. მაია კოპალეიშვილი – იუსტიციის ყოფილი მინისტრის ზურაბ ადეიიშვილის მოადგილე. მარიკა გერსამია – განათლების სამინისტროს ყოფილი მაღალჩინოსანი“, _ აცხადებს ლორთქიფანიძე.
ლადო პაპავას რექტორად არჩევას დადებითად აფასებს სოციალურ და პოლიტიკურ მეცნიერებათა ფაკულტეტის სტუდენტი ბექა გაბადაძე. მისი თქმით, ახალი რექტორი თავის პროგრამაში, გარდა იმისა, რომ უნივერსიტეტში არსებულ აქტუალურ პრობლემებზე საუბრობს, ყურადღებას საუნივერსიტეტო ლიტერატურის თარგმნაზე ამახვილებს. რაც გაბადაძის თქმით, განათლების ხარისხის გაუმჯობესებისთვის ძალიან კარგია.
ბექა გაბადაძე ჩვენთან საუბარში სხვა კანდიდატების პროგრამასაც აფასებს: “გამოვარჩევდი 4 ძირითად კანდიდატს, რომლებიც ყველაზე პოპულარული იყო სოციალური ქსელებითაც და სტუდენტებთან შეხვედრებშიც. პირველი ვისაუბრებდი ირმა რატიანის შესახებ, რომელიც არის უფრო ლიბერალურად მოაზროვნე. პრინციპში მისი დაპირებები იყო ბაზართან ორიენტირებული. რატიანის თქმით, უმჯობესი იქნებოდა, გაგვეზარდა გაცვლით პროგრამებში სტუდენტთა რაოდენობა. ანუ ის საუბრობდა თავის პროგრამაში უცხოეთთან კავშირების უფრო მეტად გაზრდაზე. რაც შეეხება მეორე რექტორობის კანდიდატ გიორგი ქავთარაძეს, ის თავისი არჩევის შემთხვევაში გვპირდებოდა, რომ თსუ-ში იქნებოდა მაღალი ხარისხის განათლება, საინტერესო იყო მისი ხედვა, თსუ-ს რესურსების ფონზე როგორ აპირებდა ამის გაკეთებას. თუმცა ვიტყოდი, რომ ეს უფრო პოპულისტი რექტორობის კანდიდატი იყო.
მარინა მუსხელიშვილს ჰქონდა ჩემთვის ყველაზე მისაღები პროგრამა, რომელიც დაკავშირებული იყო კვლევაზე დაფუძვნებულ სწავლებაზე. ის საუბრობდა თითქმის მთელი საუნივერსიტეტო სივრცის მოდიფიცირებაზე, საუბრობდა ასევე ხარჯების გაზრდაზე უნივერისტეტის შიგნით. ამ კუთხით აპირებდა ცენტრალურ ხელისუფლებასთან საკითხის დაყენებას. ამას გარდა მნიშვნელოვანი იყო კვლევაზე დაფუძვნებული ორიენტირი, რაზეც მარინა მუსხელიშვილი ამახვილებდა ყურადღებას. მეოთხე ჩემი ფავორიტი კანდიდატი თავისი პროგრამით ლადო პაპავა იყო”.
რაც შეეხება უშუალოდ არჩევნების პროცესს, “ახალგაზრდა ადვოკატთა ასოციაციის” ხელმძღვანელის და არჩევნების დამკვირვებლის, არჩილ კაიკაციშვილის თქმით, დარღვევების გარეშე ჩაიარა. ხოლო წინა საარჩევნო პროცესის მონაცემებს, რომელიც “ახალგაზრდა ადვოკატთა ასოციაციამ” 14 რექტორობის კანდიდატის ანკეტური გამოკითხვით მოიპოვა, ხვალ წარმოადგენენ.
