_ სტატიის გამოქვეყნების მეორე დღესვე მოძრაობის პრეზიდენტი გელა მებონია და აქტივისტები სენაკში ჩავიდნენ და გიგლა ნადარაიას ოჯახში ესტუმრნენ.
ნადარაიას ოჯახში მისი მეზობლებიც შეიკრიბნენ და საკუთარი გასაჭირი უამბეს მოძრაობის წევრებს.
გელა მებონია: “წავიკითხე თუ არა სტატია, დილით ადრე წამოვედი თბილისიდან და მივედი გიგლა ნადარაიას ოჯახში, სადაც სხვა ადამიანებიც იყვნენ შეკრებილნი. ხალხს უამრავი პრობლემა აქვს დაგროვილი, მაგრამ გამკითხავი არავინ არის. რატომ უნდა ექცეოდეს გამგებელი მასთან მისულ მოქალაქეს აგდებულად და რატომ აგრძელებენ თანამდებობებზე მოსული პირები ხალხის აბუჩად აგდებას?! აქ მითხრეს, რომ რაიონის გამგებლის დროებით მოვალეობის შემსრულებელი გოჩა დგებუაძე მოქმედი მაჟორიტარის, გურამ მისაბიშვილის კადრია. მე ხმამაღლა ვაცხადებ, რომ ამ ადამიანს გურამი კი არა, ყვარყვარე ჰქვია, რადგან ის ჯერ “მოქალაქეთა კავშირში” იყო, შემდეგ ნაციონალებიდან შევიდა პარლამენტში, ახლა “ოცნებას” ამოეფარა და ასე აგრძელებს თავის დანაშაულებრივ ქმედებებს. რატომ უნდა ჰყავდეს გამგებელს დაცვა და რატომ არ უნდა შეეძლოს მას პირდაპირ თავის ხალხთან ლაპარაკი, რატომ არ უნდა დადიოდნენ ხელისუფლების წარმომადგენლები ქუჩებში, სოფლებში და რატომ არ უნდა აგვარებდნენ იმ პრობლემებს, რომლის მოგვარებასაც ითხოვს მოსახლეობა? მე სოხუმელი კაცი ვარ, ჩემს ირგვლივ ის ადამიანები არიან, ვისაც სისხლი გვაქვს დაღვრილი საქართველოს მიწაზე და სამშობლოს სიყვარულს ვერავინ გვასწავლის.
ჩვენი მოძრაობა _ “საქართველოს არწივი” ყველაფერს გააკეთებს იმისთვის, რომ დეპუტატებმაც და გამგებლებმაც გაიგონ, რომ ისინი ხალხის სამსახურში უნდა იდგნენ და არა ხალხი უნდა იდგეს მათ სამსახურში. მე ხვალ აუცილებლად ვნახავ სენაკის გამგებელს და ვეტყვი, რომ სენაკის გამგეობა ეკუთვნის ხალხს და ყველა იქ მომუშავე ადამიანი უნდა ზრუნავდეს ხალხის კეთილდღეობაზე. გამგეობის შენობაზე გაკრულია განცხადება – “მოქალაქეთა მიღება ოთხშაბათს”, მან მარტო ოთხშაბათობით კი არ უნდა მოისმინოს სენაკელების პრობლემები, არამედ ყოველ დღე უნდა ეცნობოდეს. კარგად გვახსოვდეს, რომ ჩვენი პარტიაა საქართველო და ჩვენი პრეზიდენტია ქართველი ხალხი”.
ამის შემდეგ გელა მებონია პროკურატურაში წავიდა, სადაც მორიგესთან შეხვედრა უნდოდა, თუმცა შენობაში არავინ დახვდა, არც ერთი კაბინეტის კარზე არ იყო აბრა მიმაგრებული.
საღამოს სენაკში მოძრაობა “საქართველოს არწივის” სამეგრელო ზემო სვანეთის წარმომადგენლობის ოფისი გაიხსნა.
გიორგი საკარული, პრესსამსახურის უფროსის მიადგილე: “გამომდინარე იქიდან, რომ რაიონებში ბევრი პრობლემებია, ჩვენ ხშირად მოგვმართავენ ამ რაიონებში მცხოვრები ადამიანები, სწორედ ამიტომ მოძრაობა “საქართველოს არწივი” აფართოებს თავისი მოქმედებია არეალს. დღეს სამაგრელო-ზემო სვანეთის რეგიონული წარმომადგენლობა გაიხსნა და დიდი იმედი მაქვს, რომ შევძლებთ ხალხის გვერდით დგობას და ყველა ერთად არსებული პრობლემების მოგვარებას.”
ილია შენგელია, წარმომადგენლობის თავმჯდომარის მოადგილე: “გავეცანი მოძრაობის წესდებას, მიზნებს, ამოცანებს, გავეცანი იმ ადამიანებს, რომლებიც მოძრაობაში არიან გაერთიანებული და მათ გვერდით დავდექი, ამ ორგანიზაციის წევრი გავხდი. გვაქვს უკვე ჩამოყალიბებული მიზნები, როგორც ადგილზე, ისე, რეგიონში და ვიმედოვნებ, რომ მალე ჩვენი რიცხვი კიდევ უფრო გაიზრდება.”
როგორც მოძრაობის პრეზიდენტმა და პრესსამსახურის უფროსის მოადგილემ აღნიშნეს, სულ მალე ასეთი წარმომადგენლობები საქართველოს სხვადასხვა რეგიონში ამოქმედდება.
(R)
