ამ უკანასკნელმა, წინა დღეს მიღებული გადაწყვეტილება დუმილის უფლების გამოყენების შესახებ შეცვალა და ნაფიც მსაჯულებს დაახლოებით 1 საათის განმავლობაში უმტკიცებდა საკუთარ უდანაშაულობას. კობა ყურუამ სამეგრელოში ჩადენილი განზრახ მკვლელობის გამო, 15-წლიანი სასჯელი მოიხადა და ციხიდან 2010 წლის გაზაფხულზე გათავისუფლდა. ის აცხადებს, რომ პოლიციამ საქართველოში ცხოვრების უფლება არ მისცა, რის გამოც მოსკოვში გაემგზავრა და მეუღლესთან ერთად ყვავილების ბიზნესით იყო დაკავებული: “იქ გამიჭირდა გარემოსთან შეგუება. საქართველოში ჩამოვედი და ანტონ მარტყოფელის მონასტერში 42 დღე დავყავი. შემდეგ ისევ დავბრუნდი მოსკოვში, მაგრამ რადგან წამალზე წამიცდა ხელი, მეუღლემ საქართველოში გამომიშვა მეთადონის პროგრამაში სამკურნალოდ.”
გამოძიების მასალებით მკვლელობის უშუალო შემსრულებელი ვლადიმერ ქარჩავა მეთადონის პროგრამაში სამკურნალოდ საფრანგეთიდან ჩამოვიდა და სწორედ ამ დროს გაიცნო ყურუა.
2012 წლის 19 ნოემბერს კობა ყურუა, ვლადიმერ ქარჩავა, მურთაზ გერგაია და გელა უბილავა თბილისში იმყოფებიან, თუმცა როგორც ყურუა ამტკიცებს არა ადუაშვილის მოსაკლავად, არამედ ქარჩავას ჯანმრთელობის მდგომარეობის გამო.
“ქარჩავამ მითხრა, ოპერაცია მაქვს გასაკეთებელი, საჭეზე მჭირდება კაცი, მე დიდხანს ვერ ვჯდები და თბილისში გამომყევიო. ჩამოვედით 19 ნოემბერს გერგაიას მანქანით”.
ამის შემდეგ, ყურუა და ქარჩავა კვლავ სამეგრელოში ბრუნდებიან, რადგან გერგაია მათ წითელი “ნისანის” თხოვებას დაპირდა. 23 ნოემბერს, ადუაშვილის მკვლელობის დღეს, ისინი კვლავ თბილისში არიან. ყურუა ირწმუნება, რომ იმ დღეს სამების მოსალოცად და სულიერი მოძღვრის სანახავად იყო წასული. საღამოს კი შეხვდა ვლადიმერ ქარჩავას, რომელმაც ამჯერად თურქეთში წაყოლა შესთავაზა. რამდენიმე დღეში თურქეთში მათ გერგაიაც შეუერთდათ. კობა ყურუა თურქეთში 2 დეკემბრამდე იმყოფებოდა. 8 დეკემბერს ის მოსკოვში გაფრენას აპირებდა, როდესაც ხობში, საკუთარ სახლთან დააკავეს. ჩხრეკისას მას “ჰეროინი” აღმოაჩნდა, თუმცა ყურუა ამტკიცებს რომ ნარკოტიკი მას პოლიციელებმა ჩაუდეს. ბრალდებულის მტკიცებით, ხობის პოლიციის უფროსმა ნარკოტიკული დანაშაულის ნაცვლად, თბილისში მომხდარ მკვლელობაზე დაუწყო ლაპარაკი. რამდენიმე დღეში ყურუა გირაოს სანაცვლოდ გაათავისუფლეს, თუმცა იმავე დღეს დაიბარეს პოლიციაში და ხელახლა დააკავეს.
“სასამართლომ გირაოთი გამათავისუფლა. თუ მკვლელობაზე ვიყავი დაკავებული, რატომ გამიშვეს? თუ კაცი მყავდა მოკლული, გირაოს შემდეგ რატომ არ გავიქეცი? რამდენიმე საათის შემდეგ მოდის ორი თანამშრომელი, გირაოს საბუთზეა ხელი მოსაწერი და პოლიციაში ჩამოდიო. მე, ჩემი სიძე და დედაჩემი ჩავედით ზუგდიდის სამხარეოში, გირაოს საბუთის ნაცვლად მომიტანეს რაღაც საბუთი, ჩამაგდეს თეთრი ფერის “შკოდაში”, მთელი გზა თბილისამდე მიდის ჩემი ცემა. პოლიციის მთავარ სამმართველოში ვინმე ლადომ თმა ამახია საფეთქლიდან, მერე წიგნი ჩამარტყა თავში, ბოლოს ფეხსაცმელი გამხადეს და სადღაც წაიღეს. მეუბნებიან, ჩაიხადე შარვალიო, ჩავიხადე, დავდექი ოთხზე და ვუთხარი, რაც გინდათ მიქენით, ხელს არ ვაწერ-თქო.”
კობა ყურუას, რომელსაც გამოძიება მკვლელობის უშუალო შემსრულებლად მიიჩნევს, პატიმრობის ცხრათვიანი ვადა 7 სექტემბერს ეწურებოდა, თუმცა ახალი დანაშაულისთვის დღეს კვლავ შეუფარდეს პატიმრობა. “გურია ნიუსის” ინფორმაციით, გუშინ, პროცესის დასრულების შემდეგ, ყურუას ე.წ. “ბრიტვა” აღმოაჩნდა; როგორც მოკლული ბიზნესმენის ოჯახის ახლობლები ვარაუდობენ, ყურუა თვითდაზიანების მიყენებას აპირებდა, რათა საქმის განხილვა 7 სექტემბრამდე გაეჭიანურებინა.
დღესვე სასამართლოში დაიკითხა მკვლელობის დამკვეთად მიჩნეული ვახტანგ ჩხაპელია, რომელმაც ასევე განაცხადა, რომ უდანაშაულოა. მისი თქმით, მოკლულ ადუაშვილს და მომღერალ სოსო პავლიაშვილს ახლო მეგობრული ურთიერთობა ჰქონდათ. მათ შორის დავა და უკმაყოფილება არასოდეს ყოფილა; პირიქით, სოსო ბავშვობის მეგობარს კრედიტის გადახდაში ეხმარებოდა და ყოველთვიურად 7 ათას ევროს ჩუქნიდა.
“სოსოს და ავთოს კარგი ურთიერთობა ჰქონდათ ბავშვობიდან, მათ ურთიერთობაზე კარგის მეტს მართლა ვერაფერს ვიტყვი. არანაირი კონფლიქტური ურთიერთობა არ შემინიშნავს ავთოს და სოსოს ურთიერთობაში.”
ჩხაპელიას თქმით, სოსო პავლიაშვილს და ავთო ადუაშვილს თბილისში საერთო ბიზნესი ჰქონდათ; კერძოდ, “შანხაიზე” გასართობ ცენტრს აშენებდნენ, რისთვისაც პავლიაშვილს 200 ათასი დოლარი ჰქონდა გადახდილი.
24 ნოემბერს, ჩხაპელია და ადუაშვილი ერთად აპირებდნენ ერევანში სოსო პავლიაშვილთან ჩასვლას, თუმცა წინა დღეს ადუაშვილი მოკლეს. მოკლულის ოჯახში ფიქრობენ, რომ სოსო პავლიაშვილმა სწორედ ამ შეხვედრის ჩასაშლელად მოიშორა თავიდან დუაშვილი, რომელთანაც ბოლო დროს დაძაბული ურთიერთობა ჰქონდა. 24 ნოემბერს, ადუაშვილი ერევანში საკუთარი ბიზნესწილის ოფიციალურად გადაფორმებას აპირებდა. ჩხაპელია აცხადებს, რომ 23 ნოემბერს რესტორანში ქეიფის დროს, მეუღლემ _ მაკა პავლიაშვილმა დაურეკა და ავთო ადუაშვილის მკვლელობის შესახებ აცნობა. ის უარყოფს მკვლელების დაქირავებას და მათთვის ფულის გადახდას , თუმცა გამოძიებას მან აღიარებითი ჩვენება მისცა, სადაც მკვლელობის დამკვეთად სოსო პავლიაშვილი დაასახელა.
ადუაშვილების ნათესავი ზაზა მესხი ამტკიცებს, რომ ჩხაპელიას ადვოკატი და და მეგობარი მასთან საპროცესო შეთანხმების თხოვნით მივიდნენ.
“ჩემთან მოვიდნენ პავლიაშვილისა და ჩხაპელიას მეგობარი და ადვოკატი ლევან ჯავახაძე, რომლებმაც მთხოვეს, შუამდგომლობა გამეწია დაზარალებულის მშობლებთან და შვილთან, რათა მომხდარიყო ჩხაპელიასთან საპროცესო გარიგება. ჩემს თხოვნაზე, კი ბატონო, ვიშუამდგომლებდი, ოღონდ ჩხაპელიას ეთქვა სრული სიმართლე, ადვოკატმა ლევან ჯავახაძემ მითხრა: მეტი რა სიმართლე უნდა თქვას, დაწვრილებითი აღიარებითი ჩვენება მისცაო და მეტი დასამატებელი არ აქვსო.”
“გურია ნიუსს” სოსო პავლიაშვილის დის _ მაკა პავლიაშვილისა და დისშვილის „სკაიპით” საუბრის ჩანაწერი მიაწოდეს, სადაც ისინი ვახტანგ ჩხაპელიას მიერ ჩადენილ “უმძიმეს ცოდვაზე” საუბრობენ. მათი საუბრიდან ირკვევა, რომ მომხდარში ოჯახი სოსო პავლიაშვილს ადანაშაულებს.
იმის გამო, რომ აღნიშნული ჩანაწერი ფარულია და არ გვაქვს ინფორმაცია მისი ავთენტურობის შესახებ, ამავე დროს ყოველი ადამიანის პირადი ცხოვრება, პირადი საქმიანობის ადგილი, პირადი ჩანაწერი, მიმოწერა, საუბარი სატელეფონო და სხვა სახის ტექნიკური საშუალებით, აგრეთვე ტექნიკური საშუალებებით მიღებული შეტყობინებანი ხელშეუხებელია, “გურია ნიუსმა” უარი თქვა ამ ჩანაწერის მიღებასა და გამოქვეყნებაზე.
ტელეკომპანია “იმედის” ფოტო: სასამართლოზე
