ამ განცხადებით ირკვევა, რომ 2013 წლის აგვისტოს სხდომაზე ფრაქცია “თვითმმართველობა განვითარებისთვის” მიერ შეტანილ იქნა პროექტი, რომელიც ითვალისწინებს ახალი სარედაქციო განყოფილების შექმნას. პროექტს თან ერთვის ფრაქციის სხდომის ოქმი და ფრაქციის თავმჯდომარის მიმართვა, სადაც, წულაძის თქმით, გაყალბებულია ხელმოწერა. დავით წულაძე ითხოვს, მიღებულ იქნას შესაბამისი ზომები სავარაუდო სისხლის სამართლის პასუხისმგებლობის თაობაზე, რადგან პროექტის დედანზე ხელმოწერა გაყალბებულია _ ის ჩიტიძის ხელმოწერის გაყალბებაში კონკრეტულად ბრალს დებდა საკრებულოს წევრს პაატა ფირცხალაიშვილს, რომელიც ჩიტიძის ფრაქციის წევრია.
ფრაქციის თავმჯდომარემ, რევაზ ჩიტიძემ საკითხთან დაკავშირებით სხდომას გააცნო, რომ პროექტი ინიცირებულია და მომზადებულია მის მიერ; რაც შეეხება ხელმოწერას, ჩიტიძემ კიდევ ერთხელ აღნიშნა, რომ საკითხი არის მის მიერ ინიცირებული, მომზადებული და გაფორმებული. პროექტი მან ელექტრონული ფოსტით გადაუგზავნა გამგეობის იურიდიულ სამსახურს.
საკრებულოს წევრის მერაბ წილოსანის კითხვაზე, თუ რატომ მოხდა საკითხის სასწრაფო წესით _ 17 სთ. 50 წთ-ზე შეტანა საკრებულოს აპარატის უფროსთან მაშინ, როცა პროცედურულად პროექტი უნდა განეხილა საკრებულოს ბიუროს, რევაზ ჩიტიძემ განმარტა, რომ 9-დან 18-მდე არის სამუშაო საათები და არ აქვს მნიშვნელობა, ამ პერიოდში რა დროს შევა პროექტი აპარატში. ამის შემდეგ, პროექტს გაეცნობოდა საკრებულოს ყველა წევრი და მოხდებოდა მსჯელობა.
დავით წულაძის კითხვაზე, იცოდა თუ არა ფრაქციის წევრმა დალი კვერენჩხილაძემ პროექტის არსებობის შესახებ, მან უპასუხა, რომ ამის შესახებ არაფერი იცოდა.
დავით წულაძემ აღნიშნა, რომ ახალი განყოფილების შექმნა გამოიწვევდა ისედაც მწირი ბიუჯეტის კიდევ უფრო შემცირებას: _ მაქვს ინფორმაცია, რომ განყოფილება იქმნებოდა კონკრეტული პიროვნებებისთვის და მათთან ფრაქციის თავმჯდომარე შესულია კორუფციულ გარიგებაში. მე ხელთ მაქვს პროექტის დედნის ასლი, სადაც შეუიარაღებელი თვალითაც ჩანს, რომ ხელმოწერები არის გაყალბებული და რამდენადაც ჩემთვის არის ცნობილი, ეს არის კრიმინალური ფაქტი. მე მივმართე საკრებულოს აპარატის უფროსს, მოეცა ინფორმაცია, თუ მიმართა მას ფრაქციამ სხდომის ჩატარების შესახებ და გამოიკრა თუ არა საჯარო ადგილზე განცხადება ფრაქციის სხდომის ჩატარების დროის და ადგილის შესახებ, რაზეც მივიღე უარყოფითი პასუხი, _ თქვა წულაძემ.
რევაზ ჩიტიძემ განმარტა, რომ საკრებულოს რეგლამენტის 135-ე მუხლით განსაზღვრულია ის ვალდებულებები, რაც გააჩნია საკრებულოს აპარატს: _ ამ ვალდებულებებში არ არის ფრაქციის სხდომის ჩატარების შესახებ აპარატისათვის შეტყობინების აუცილებლობა. ფრაქციის სხდომა ჩატარდა ფრაქციის ოთახში, ხოლო რაც შეეხება მისი ბიუროზე განხილვის საკითხს, ეს გადაწყვეტილება უნდა მიეღო საკრებულოს თავმჯდომარეს, რომლისთვისაც საქმის არსი ცნობილი იყო.
საკრებულოს წევრმა, მერაბ წილოსანმა მოითხოვა იურიდიული სამსახურის უფროსის განმარტება აღნიშნულ საკითხთან დაკავშირებით _ თუ ხელმოწერები გაყალბებულია არის თუ არა ეს კრიმინალური ფაქტი.
გამგეობის იურიდიული სამსახურის უფროსმა შოთა ჩაგუნავამ აღნიშნა, რომ რეგლამენტის დარღვევა არ მომხდარა, რადგან საკითხზე დაიწყო ადმინისტრაციული წარმოება: _რაც შეეხება ელექტრონული ფოსტით მიღებულ წერილს, იგი არის ბეჭდისა და ხელმოწერის გარეშე. იურიდიულ სამსახურში აღნიშნული პროექტი შემოვიდა მხოლოდ მისი პრინტერზე ამობეჭდვის მიზნით.
წულაძის შეკითხვაზე არის თუ არა გაყალბებული ხელმოწერა, რეზო ჩიტიძემ უპასუხა, რომ ხელმოწერა დოკუმენტზე მისია.
სამანდატო, საპროცედურო და ეთიკის კომისიის თავმჯდომარემ, ილო გვარჯალაძემ თქვა, რომ კომისია ამზადებს რეკომენდაციებს და ის წარედგინება საკრებულოს ბიუროს, როგორც ზემდგომ ორგანოს. ხელმოწერის ნამდვილობის დადგენა შესაძლებელია მხოლოდ სპეციალისტების მიერ და კომისიას არ აქვს საკითხის გადაწყვეტის კომპეტენცია, _ თქვა გვარჯალაძემ და კენჭი უყარა გადაწყვეტილებას.
ვინაიდან კონკრეტულ დოკუმენტზე შესრულებული ხელმოწერის ნამდვილობის დადგენა სცილდება კომისიის კომპეტენციას და აღნიშნული საკითხი უნდა გამოიკვლიოს დარგის სპეციალისტებმა, კომისიამ მიიღო გადაწყვეტილება საკითხი შემდგომი რეაგირებისათვის წარედგინოს საკრებულოს ბიუროს.
