და მიიჩნევს, რომ არხის გენერალური დირექტორის, გიორგი ბარათაშვილის თანამდებობიდან გადაყენება კანონდარღვევით მოხდა.
აღნიშნულთან დაკავშირებით საია განცხადებას ავრცელებს, რომელშიც მთავარ პროკურატურას საკითხის გამოძიების მოთხოვნით მიმართავს.
“მაუწყებლობის შესახებ” საქართველოს კანონის 321 მუხლის თანახმად, სამეურვეო საბჭო უფლებამოსილია, სრული შემადგენლობის უმრავლესობით (საბჭოს თხუთმეტივე წევრის ნახევარზე მეტის ხმით) უნდობლობა გამოუცხადოს გენერალურ დირექტორს, თუმცა, როგორც საზოგადოებრივი მაუწყებლის ვებგვერდზე გამოქვეყნებული დოკუმენტებიდან ირკვევა, სამეურვეო საბჭოს სხდომას არ ესწრებოდა საბჭოს ორი წევრი, ნინო დანელია და ნატალია დვალი, რომელთაც სხდომაზე, ნოტარიულად გაცემული მინდობილობის საფუძველზე, წარმოადგენდნენ საბჭოს ყოფილი წევრი ლევან გახელაძე და მოქმედი წევრი მამუკა ფაჩუაშვილი. ვინაიდან ნინო დანელიასა და ნატალია დვალის შემთხვევაში არასწორად მოხდა ხმის მიცემა, სამეურვეო საბჭო არ იყო უფლებამოსილი, შვიდი ხმით მიეღო გენერალური დირექტორისთვის უნდობლობის გამოცხადების შესახებ გადაწყვეტილება”, _ ნათქვამია განცხადებაში.
მათივე განმარტებით, მაუწყებლობის შესახებ საქართველოს კანონმდებლობა არ ითვალისწინებს საზოგადოებრივი მაუწყებლის სამეურვეო საბჭოს სხდომაზე მონაწილეობასა და ხმის მიცემას წარმომადგენლის მეშვეობით.
“სამეურვეო საბჭო ახორციელებს საჯარო სამართლებრივ უფლებამოსილებას და, შესაბამისად, გააჩნია სპეციალური უფლებაუნარიანობა, რაც გულისხმობს იმას, რომ მას არ აქვს უფლება, განახორციელოს ისეთი საქმიანობა, რაც პირდაპირ არ არის გათვალისწინებული მისი საქმიანობის მარეგულირებელი კანონმდებლობით. საზოგადოებრივი მაუწყებლის სამეურვეო საბჭოს წევრს არც ერთი ნორმატიული აქტით არ აქვს მინიჭებული უფლებამოსილება მიიღოს გადაწყვეტილებები წარმომადგენლის მეშვეობით. აღსანიშნავია ის გარემოებაც, რომ მამუკა ფაჩუაშვილი მიღებულ გადაწყვეტილებას ხელს აწერს ორჯერ _ როგორც წარმომადგენელი და როგორც წევრი.
საბჭოს წევრები ვალდებულნი არიან პირადად განახორციელონ თავიანთი უფლებამოსილებები. ისევე როგორც, მაგალითად, დეპუტატი არ არის უფლებამოსილი საკანონმდებლო საქმიანობაში მონაწილეობის უფლება მინდობილობით სხვას გადასცეს, ასევე სამეურვეო საბჭოს წევრიც ვალდებულია პირადად განახორციელოს დაკისრებული უფლებამოსილება. მინდობილობის საფუძველზე მოქმედება დამახასიათებელია კერძო სამართლის იურიდიული და ფიზიკური პირების სამართლებრივ ურთიერთობებში,” _ აცხადებენ ორგანიზაციაში.
შეგახსენებთ, რომ საზოგადოებრივი მაუწყებლის გენერალური დირექტორი გიორგი ბარათაშვილი პირველად, 4 მარტს, არხის სამეთვალყურეო საბჭომ დაკავებული თანამდებობიდან გადააყენა. ბარათაშვილმა ბორდის გადაწყვეტილება სასამართლოში გაასაჩივრდა, მის ინტერესებს საია (ახალგაზრდა იურისტთა ასოციაცია) იცავდა. მოგებული სასამართლო პროცესის შემდეგ ბარათაშვილი თანამდებობაზე დაბრუნდა. თუმცა, 6 აგვისტოს მას ბორდმა უკვე მეორედ გამოუცხადა უნდობლობა.
