როგორც ივანიშვილი ამბობს, იგი პოლიტიკიდან საპრეზიდენტო არჩევნების შემდეგ რამდენიმე კვირაში წავა. თუმცა, მან ისიც განაცხადა, რომ თუ მარგველაშვილი არჩევნებში ვერ გაიმარჯვებს, იგი უფრო მალე დატოვებს პოლიტიკურ ცხოვრებას.
პოლიტოლოგები პრემიერის ამ განცხადებებს უარყოფითად აფასებენ და აღნიშნავენ, რომ მსგავსი მესიჯები ამომრჩეველში დაბნეულობას იწვევს, რამაც, საბოლოოდ, შესაძლოა, მარგველაშვილის არა მეორე ტურში გამარჯვება არამედ, პირველივე ტურში დამარცხებაც განაპირობოს.
პოლიტოლოგი ნინო ლაპიაშვილი “გურია ნიუსთან” საუბრისას აღნიშნავს, რომ ივანიშვილის ხშირ განცხადებებს წასვლასთან დაკავშირებით ამომრჩეველში დაბნეულობა შემოაქვს, “ნაციონალური მოძრაობა” კი, მიუხედავად არა ერთი პრობლემისა და დარტყმისა ერთიანობას ინარჩუნებს, ეს კი ამ უკანასკნელის საპრეზიდენტო კანდიდატის შანსებს ზრდის.
“ზოგადად მივეჩვიეთ, რომ ამ პოლიტიკური გუნდის მხრიდან არაადეკვატური განცხადებები კეთდება. ის ფაქტი, რომ უნდა წასულიყო, მის მიერ გაკეთებულ წერილებში თავიდანვე გაცხადებული იყო, მაგრამ ამომრჩეველში შეინიშნებოდა იმედები, რომ ეს მხოლოდ განცხადებაა, ის შემდგომ გააკეთებდა განმარტებებს, როგორც სჩვევია ხოლმე და დარჩებოდა. ცხადია, ეს იმოქმედებს ამომრჩეველზე და უკვე იმოქმედა. რადგან მათ ზუსტად იციან, რომ ხმა მისცეს ივანიშვილს და არა ბესელიას, ხიდაშელს ან უსუფაშვილს, რადგან ისინი ურეიტინგო პოლიტიკურ გაერთიანებებს წარმოადგენენ, რომლებიც ბარიერის გადალახვას ვერასდროს ახერხებდნენ.
მეორეს მხრივ, “ქართული ოცნება” ძალიან კარგად იყენებს კოჰაბიტაციის არგუმენტს და ცდილობს ამომრჩეველი დაარწმუნოს, რომ შექმნილი რეალობიდან გამომდინარე, ჩვენ გვიწევს კოჰაბიტაციაში ცხოვრება, მათ ვერ შეძლეს ქვეყნის წინ წაყვანა, დაპირებების შესრულება. ესაა კარგი არგუმენტი, რომ გულუბრყვილო ამომრჩეველი დაარწმუნონ უუნარონი კი არ არიან, არამედ მიხეილ სააკაშვილის პრეზიდენტობა უშლით ხელს და საპრეზიდენტო არჩევნების შემდგომ ყველაფერი შეიცვლება. არიან ამომრჩევლები, რომლებიც ამას არ დაიჯერებენ, მაგრამ, სამწუხაროდ, არის ამომრჩეველთა ის კატეგორიაც, რომელთაც ასეთი ტიპის არგუმენტების სჯერათ.
ხშირი განცხადებები, რომ ივანიშვილი წავა, თავისთავად ერთ-ერთი ფაქტორია იმისა, რომელსაც ამომრჩეველში დაბნეულობა შემოაქვს. ამომრჩეველი ხედავს, რომ ნაცმოძრაობა არის ნამდვილად შეკრული გუნდი, რომელმაც შეძლო, მძიმე დარტყმების მიუხედავად, არ დაეკარგა ჰომოგენურობა, ისინი დარჩნენ ერთად. რა თქმა უნდა, ეს ერთიანობა არის ძლიერების გარანტია და ამის გარდა ნაცმოძრაობას აქვს კიდევ ორი კოზირი: 1. შეცდომების მიუხედავად მათ შეძლებს ქვეყნის წინსვლა, და ახლა, როდესაც ქვეყანა ემოციებიდან გამოვიდა, ეს უფრო შესამჩნევი გახდა; 2. ქვეყნის ეკონომიკა არის ჩამოშლის პირას და არანაირი პროგრესი არ გვაქვს. აი, ამით აქვს შანსები ნაცმოძრაობის კანდიდატს და თუ ისინი სწორად გამოიყენებენ ამ თავის კოზირებს, მაშინ შეძლებენ წარმატებას მიაღწიონ,” _ ამბობს “გურია ნიუსთან” საუბრისას ლაპიაშვილი.
პოლიტოლოგი კორნელი კაკაჩიაც იზიარებს იმ აზრს, რომ პრემიერის მხრიდან პოლიტიკიდან წასვლის შესახებ ხშირი განცხადებები ამომრჩეველს აბნევს და დასძენს, რომ ივანიშვილი “თავს არ იკლავს მარგველაშვილის მხარდასაჭერად”.
“ასეთი ტიპის განცხადებები, რა თქმა უნდა, ამომრჩეველში დეზორიენტაციას იწვევს, განსაკუთრებით, “ქართული ოცნების” ამომრჩევლებში, რადგან იმ პერიოდში, როცა ივანიშვილი მიდის და ამავდროულად ლაპარაკობს, რომ დღეს თუ ხვალ უნდა გააცხადოს, ვინ იქნება ახალი პრემირ-მინისტრი, თან ყველამ იცის, რომ საკონსტიტუციო ცვლილებების მერე, პრემიერს ექნება ძირითადი უფლებები, ცოტა არ იყოს, მისი კანდიდატურა საპრეზიდენტო არჩევნებში ჩრდილში დგება. სწორედ ამიტომ არის, რომ ის არ ასახელებს კონკრეტულად, ვინ იქნება პრემიერი.
პრემიერის მხრიდან ამომრჩეველთან ცუდი ურთიერთობის კიდევ ერთი ჟესტი უნდა აღინიშნოს: ის ულტიმატუმით ესაუბრა ამომრჩეველს – თუ არ აირჩევთ, მარგველაშვილს მივდივარ. მაგრამ ის ხომ ისედაც მიდის? არ შეიძლება ამომრჩეველთან ულტიმატუმის ენით საუბარი _ მათ არჩევნის უფლება აქვთ. ასეთი მესიჯები მარგველაშვილის კამპანიას არ წაადგება.
თუ დავაკვირდებით, ივანიშვილი თავსაც არ იკლავს მარგველაშვილის მხარდასაჭერად. თუ არ იაქტიურა პირადად ივანიშვილმა, შეიძლება მას გაუჭირდეს, რადგან მისი რეიტინგი ყველამ იცის და ეს არაა საკმარისი გამარჯვებისთვის. ამით შესაძლოა არათუ მეორე ტურში, პირველ ტურშიც ვერ გავიდეს.
რატომ არ არის პრემიერი მისი კანდიდატის წინასაარჩევნო კამპანიაში აქტიურად ჩართული, ამას შეიძლება რამდენიმე მიზეზი ჰქონდეს. პირველი _ ის არა თუ საარჩევნო კამპანიაში, არამედ ზოგადად მთავრობის მუშაობაში არ იღებს მონაწილეობას; მეორე _ არც ნინო ბურჯანაძის მიმართაა ცუდად განწყობილი. თუმცა, ამ ეტაპზე ამის მყარი საფუძველი არ არსებობს. ასევე, მიზეზი შეიძლება იყოს თვითდაჯერებულობა. ანუ, იმდენად სჯერა მას თავისი გამარჯვების რომ… ” _ ამბობს “გურია ნიუსთან” საუბრისას კაკაჩია.
