“შსს-ს რუსთავის სამმართველოს უფროსმა მოულოდნელად თავში რაცია ჩამარტყა და ხელები ყელში წამიჭირა. შემდეგ იარაღი ამოიღო, გადატენა და პირში ჩამიდო… “ადამია ისე დამემუქრა… მე რომ ახლა სხვაგან მქონდეს სახლი, წავიდოდი და სხვა ქალაქში ვიცხოვრებდი. ისე დაიმუქრა, თუ ეგ აქ პოლიციელი იქნება, რაღაცას მაინც გამიკეთებს…” _ ამბობს “გურია ნიუსთან” საუბრისას 29 წლის ვასილ ლომსაძე, რომელიც ამ დროისთვის ტვინის შერყევის დიაგნოზით წევს.
27 ოქტომბერს საღამოს ვასილ ლომსაძეს მისმა მეგობარმა ამირან გამყრელიძემ დაურეკა და უთხრა, რომ მასთან, სახლში მისულიყო. ადგილზე მისულ ლომსაძეს ოჯახში სუფრა დახვდა გაშლილი, სადაც მასპინძელი შსს-ს რუსთავის სამმართველოს უფროსის მოადგილე ზაალ ადამიასთან ერთად სვამდა. მათ ლომსაძე სუფრასთან მიიპატიჟეს.
“დაახლოებით ნახევარი საათის შემდეგ ადამია სუფრიდან ადგა, ამირანი გვერდით გაიყვანა და ეუბნება – ეს ვინ მოათრიე, პრობაციონერთან ერთად რა მინდაო და ჩემი მისამართით შეიგინა,” _ ამბობს ლომსაძე და დასძენს, რომ ამის გამო მასსა და ადამიას შორის სიტყვიერი დაპირისპირება მოხდა, პოლიციის უფროსის მოადგილე დაემუქრა და შემდეგ წავიდა.
დაახლოებით 20 წუთის შემდეგ გამყრელიძის ბინა ლომსაძემაც დატოვა. თუმცა, რამდენიმე სადარბაზოს მოშორებით მან ადამიას მანქანა დაინახა.
“ჩაჯექი მანქანაშიო და ჩავჯექი მეც. მოულოდნელად თავში რაცია ჩამარტყა და ხელები ყელში წამიჭირა. შემდეგ იარაღი ამოიღო, გადატენა და პირში ჩამიდო. მაგინებდა და მემუქრებოდა… რამდენიმე წუთის შემდეგ კარი ამირან გამყრელიძემ გააღო და მანქანიდან გადამათრია. ადამიამ კი მანქანა დაძრა და წავიდა” _ ამბობს “გურია ნიუსთან” საუბრისას ვასილ ლომსაძე.
როგორც იგი აღნიშნავს, გამყრელიძემ და კიდევ ერთმა პიროვნებამ, რომელიც ამ ფაქტს შეესწრო, პირველივე სადარბაზოს პირველივე ბინაში შეიყვანეს, რათა მისთვის სისხლი ჩამოებანათ. დაახლოებით 15 წუთის შემდეგ, როდესაც იგი უკვე სადარბაზოდან გამოჰყავდათ, ადგილზე უკვე მობილიზებული იყო საპატრულო ეკიპაჟები.
ბრალდებულის თქმით, პოლიციელებს არ აუხსნიათ მისთვის, თუ რა მიზეზით აკავებდნენ. როგორც ლომსაძე ამბობს, პოლიციელებმა იგი ცემა-ტყეპით წაიყვანეს მანქანისკენ, რა დროსაც მან გონება დაკარგა. ამ ფაქტს, ბრალდებულის თქმით, გამყრელიძე და რამდენიმე პიროვნება შეესწრო.
“15-მდე პოლიციელი მომვარდა, ხელები გადამიგრიხა. წიხლებს მირტყამდნენ და ისე მივყავდი მანქანისკენ და ამ დროს გონება დავკარგე. შემდეგ, უკვე რუსთავის პოლიციის მე-2 განყოფილებაში მოვედი გონს. წყალი შემასხეს და…” _ ამბობს ლომსაძე.
მისივე თქმით, ადამიამ და პოლიციის სხვა თანამშრომლებმა მისი ცემა პოლიციის განყოფილებაშიც გააგრძელეს. ლომსაძე აღნიშნავს, რომ ამ ფაქტს ასევე ესწრებოდნენ რუსთავის პოლიციის უფროსი იაგო საური, მე-2 განყოფილების უფროსი, სამხარეოს უფროსის მოადგილე.
“ისინი მეორე ოთახში იყვნენ. ადამაია ოთახიდან ოთახში დამათრევდა და მათ ეუბნებოდა, რომ ჩემი ადგილი ციხეშია,” _ იხსენებს ლომსაძე.
მისივე თქმით, ბრალი ოფიციალურად განყოფილებაში მიყვანიდან მხოლოდ 3-4 საათის შემდეგ, შუაღამისას წაუყენეს, ამ დროის განმავლობაში კი ადამია სცემდა და ემუქრებოდა, რომ 15 წლით ციხეში გამოკეტავდა.
მოგვიანებით ლომსაძე გარდაბნის წინასწარი დაკავების იზოლატორში გადაიყვანეს. თუმცა, იგი ცუდად გახდა და სამედიცონო დახმარება დასჭირდა.
როგორც ბრალდებულის მეუღლე თათია ივანაური “გურია ნიუსთან” საუბრისას აცხადებს, ლომსაძეს ტვინის შერყევა აქვს. ასევე, დაზიანებები აქვს თვალის არესა და ნიკაპქვეშ, სადაც როგორც თვითონ ბრალდებული აცხადებს, რუსთავის პოლიციის უფროსის მოადგილემ ფიზიკური ანგარიშსწორებისას იარაღის კონდახი ამოარტყა.
ლომსაძეს ბრალი 353 პრიმა მუხლით აქვს წარდგენილი, რაც პოლიციის თანამშრომელზე თავდასხმასა და ფიზიკურ და სიტყვიერ შეურაცხყოფას გულისხმობს.
რუსთავის საქალაქო სასამართლომ ბრალდების მხარის მოთხოვნა აღკვეთი ღონისძიების სახით 2-თვიანი წინასწარი პატიმრობის შეფარდების თაობაზე არ დააკმაყოფილა და ლომსაძე 10 000-ლარიანი გირაოს სანაცვლოდ გაათავისუფლა, რაც ბრალდებულმა 10 დღის ვადაში უნდა გადაიხადოს. ბრალდების მხარემ განაჩენი თბილისის სააპელაციო სასამართლოში გაასაჩივრა, თუმცა, სააპელაციომ რუსთავის საქალაქო სასამართლოს გადაწყვეტილება ძალაში დატოვა.
ამასთან, როგორც ლომსაძე და მისი მეუღლე აღნიშნავენ, რუსთავის პოლიციის გამომძიებლების მხრიდან მოწმეებზე ზეწოლა ხდება. რამდენიმე საათის წინ ისინი განმეორებითი დაკითხვისთვის განყოფილებაში ისევ დაიბარეს. დაკითხვას ლომსაძის ადვოკატიც ესწრება.
“ადამია ისე დამემუქრა… მე რომ ახლა სხვაგან მქონდეს სახლი, წავიდოდი და სხვა ქალაქში ვიცხოვრებდი. ისე დაიმუქრა, თუ ეგ აქ პოლიციელი იქნება, რაღაცას მაინც გამიკეთებს…” _ ამბობს ლომსაძე.
“გურია ნიუსი” აღნიშნულ საკითხთან დაკავშირებით შინაგან საქმეთა სამინისტროს პრესსამსახურს დაუკავშირდა. სამინისტრო კატეგორიულად უარყოფს ინფორმაციას ადამიას მიერ ლომსაძის ცემის შესახებ და აღნიშნავს, რომ ამასთან დაკავშირებით სხვა კომენტარს არ გააკეთებს.
ამასთან, მათივე განცხადებით, ლომსაძე წარსულში 4-ჯერ არის ნასამართლევი.
“გურია ნიუსი” აღნიშნული ინფორმაციის გადამოწმების მიზნით ლომსაძეს და მის ადვოკატს დაუკავშირდა. ისინი სამინისტროს განცხადებას უარყოფენ და აცხადებენ, რომ ლომსაძე წარსულში მხოლოდ ერთხელ, კერძოდ, 4 თვის წინ არის ნასამართლევი. ლომსაძეს ბრალად რესტორნის დაცვის პოლიცელის ფიზიკური შეურაცხყოფა ედებოდა, რისთვისაც მას 5-წლიანი პირობითი აქვს მისჯილი.
ბრალდებულსა და მის ადვოკატთან საუბრის შემდეგ “გურია ნიუსი” კვალვ დაუკავშირდა შინაგან საქმეთა სამინისტროს და ლომსაძის ნასამართლეობების შესახებ ინფორმაცია მოითხოვა. პრესსამსახურში განგვიცხადეს, რომ ინფორმაციას მოიძიებდნენ. თუმცა, როგორც მოგვიანებით აღნიშნეს, ამის შესახებ ინფორმაცია სასამართლოდან უნდა მიგვეღო. აღსანიშნავია, რომ მოქალაქის ნასამართლეობის შესახებ ინფორმაციის ფლობა შს სამინისტროს უფლებამოსილებაა. თუმცა, სამინისტრომ “გურია ნიუსს” აღნიშნული ინფორმაცია არ მოაწოდა.
“გურია ნიუსი” ამ საკითხთან დაკავშირებით მუშაობას განაგრძობს და სხვა დეტალების შესახებ ინფორმაციას მოგვიანებით მოგაწვდით.
შენიშნვნა: წარმოდგენილი ფოტოები შემთხვევიდან 4 დღის შემდეგ არის გადაღებული.
მსგავსი თემები:
5 გახმაურებული საქმე, სადაც სამართალდამცავთა დანაშაული იკვეთება
