საქართველოდან ამ მოსმენაში მთავარ მომხსენებლად პარლამენტის საგარეო ურთიერთობათა კომიტეტის თავმჯდომარე თედო ჯაფარიძე იყო მიწვეული.
თედო ჯაფარიძემ საქართველოს საგარეო პოლიტიკის ძირითადი მიმართულებები წარმოადგინა, სადაც მან ისაუბრა საქართველოს სწრაფვზე ნატო-სა და ევროკავშირში გაერთიანებისაკენ, საქართველოს ჩართულობაზე ამ პროცესში და ვილნიუსის სამიტზე დაგეგმილი ასოცირების შეთანხმების პარაფირების მნიშვნელობაზე. ქვეყნის დემოკრატიულ განვითარებასა და სამართლებრივი სახელმწიფოს შენებას ევროპული ინტეგრაციისთვის უმთავრესი როლი ენიჭება. ამ მხრივ აღინიშნა საპარლამენტო არჩევნების გზით ხელისუფლების მშვიდობიანი შეცვლა და საპრეზიდენტო არჩევნების მაღალ დონეზე ჩატარება, რაც ერთხმად იქნა აღიარებული საერთაშორისო სადამკვირვებლო მისიაში მონაწილე ყველა სუბიექტის მიერ.
მოხსენების ერთ-ერთი უმთავრესი ნაწილი იყო საქართველო-რუსეთის ურთიერთობების პერსპექტივა და ამ ჭრილში რუსეთის სამეზობლო განვითარების პერსპექტივები, ევროპის როლი რუსეთ-საქართველოს ურთიერთობებში, ჟენევის საერთაშორისო მოლაპარაკებების მნიშვნელობა და ამ ფონზე გართულებული მდგომარეობა საქართველოში – დაძაბული ვითარება საოკუპაციო ხაზის გასწვრივ და მის მიმდებარე ტერიტორიებზე, გადაადგილების შეზღუდვა და მავთულხლართები, რაც ცალკე სადისკუსიო თემად იქნა წარმოდგენილი.
აღინიშნა, რომ ევროკავშირში საქართველოს ინტეგრაცია გახდება სტაბილურობის გარანტი მთლიანად კავკასიის რეგიონში, რაც მისაღები უნდა იყოს რუსეთისთვის. სტაბილურობა და უსაფრთხოება, რეგიონული თანამშრომლობა, სუვერენიტეტი და დამოუკიდებლობა განუყოფელია და ერთმანეთზეა დამოკიდებული. რეგიონის ვერცერთი ქვეყანა ვერ იქნება ცალკე სტაბილური და უსაფრთხო და ვერც, მაგალითად, რუსეთი ვერ იქნება ევროპელებისათვის საიმედო პარტნიორი, თუ მას არ ექნება კეთილმეზობლური და სტაბილური ურთიერთობები მის უახლოეს სამეზობლოსთან ყოფილ პოსტსაბჭოურ სივრცეში, განსაკუთრებით კი საქართველოსთან მიმართებაში, რომელიც მისი გეოგრაფიული მდებარების გამო ისტორიულად წარმოადგენს საკვანძო კომპონენტს ამ ურთულეს სტრატეგიულ განტოლებაში.
თედო ჯაფარიძის აზრით, შეუძლებელია არსებობდეს რამდენიმე “რუსეთი“ ერთი, თუმცა ხისტი, მაგრამ მაინც პარტნიორი, ევეროპელებისათვის, და სახელმწიფო, რომელიც ცდილობს თავისი ინტერესების გატარებას ძალისმიერი მეთოდებით, აღნიშნა თ.ჯაფარიძემ. დროა, მოსკოვმა გაარკვიოს, თუ რაში მდგომარეობს კავკასიაში მათი ინტერესების რეალიზების გზები – ჰქონდეს ბანკები თუ ტანკები, იყოს ჩართული რეგიონული განვითარების პროექტებში, თუ შეეცადოს ამ პროექტების ბლოკირებით საკუთარი გავლენის გაძლიერებას. “ამავე დროს საქართველოც უნდა შეეცადოს საკუთარი პოლიტიკა გახდეს უფრო პრაგმატული და რეალისტური, ტრანსპარენტული და პროგნოზირებადი და არა მხოლოდ ოპონენტებისათვის, არამედ პარტნიორებისათვისაც“ – აღნიშნა თედო ჯაფარიძემ. ეს არ არის მარტივი და ამ მხრივ დასავლეთის ქვეყნების რეალური დახმარება აუცილებელი იქნება და თვით დასავლეთიც არ უნდა შემოიფარგლებოდეს მხოლოდ “ხისტი განცხადებებით“ და შეეცადოს გამონახოს ოპტიმალური გადაწყვეტილებები საქართველოსთან მიმართებაში. დღევანდელ “გლობალიზებულ“ მსოფლიოში ვერავინ იქნება სრულყოფილად და გარანტირებულად დაცული, ვერც დიდი და პატარა ქვეყნები, ვერც ვაშინგტონი, ვერც მოსკოვი და ბრიუსელი იქნებიან დაცული ახალი, პოსტ-მოდერნისტული, ასიმეტრიული საფრთხეებისაგან თუ არ იქნება დაცული თბილისი, ბაქო და ერევანი, კიშინოვი და კიევი…
ტერიტორიული მთლიანობის აღდგენის საკითხი, საქართველო-რუსეთის ურთიერთობა, საქართველოს როლი რეგიონში და მისი სამეზობლო პოლიტიკა იყო ის თემები, რომლის ირგვლივაც დისკუსია გაიმართა. დისკუსიაში მონაწილეობა მიიღეს ავსტრიის დიპლომატიური აკადემიის ექსპერტებმა და მეცნიერებმა. საქართველოსა და ავსტრიის ურთიერთობაზე სპეციალური მოხსენება გააკეთა კრისტინე მუტონენმა, ავსტრიის პარლამენტის წევრმა, სოციალისტური პარტიის სპიკერმა ევროკავშირის და საგარეო პოლიტიკის საკითხებში.
საქართველოს საგარეო ურთიერთობების ძირითად ასპექტებზე მოხსენებით წარსდგა იოჰანეს ვეცინგერი, ვენის გამოყენებით მეცნიერებათა უნივერსიტეტის პროფესორი. მან ისაუბრა საქართველოს საგარეო პოლიტიკაში არსებულ გარემოზე, წინა ხელისუფლების დროს არსებულ წინსვლებსა და სირთულეებზე, შეცდომებზე, ასევე ახალი ხელისუფლების რესურსებსა და პერსპექტივებზე ამ მიმართულებით. საქართველო-რუსეთის ურთიერთობებში არსებულ სირთულეებზე ისაუბრა რუსეთის საერთაშორისო საბჭოს წარმომადგენელმა ალექსანდრე ელისეევმა.
მოსმენამ დიდი ინტერესი გამოიწვია დამსწრე აუდიტორიაში. საუბარი 3 საათს გაგრძელდა. დაისვა მრავალი შეკითხვა და გაიმართა საინტერესო დისკუსია. სხდომაზე სიტყვით გამოვიდა საქართველოს ელჩი ავსტრიის რესპუბლიკაში და ეუთოში, ბატონი კონსტანტინე ზალდასტანიშვილი.
თედო ჯაფარიძემ ვენის დიპლომატიურ აკადემიას მადლობა გადაუხადა ამ მოსმენის ორგანიზებისთვის და იმედი გამოთქვა რომ ინტერესი სამეცნიერო და პრაქტიკული დიპლომატიის დონეზე კიდევ უფრო გაიზრდება, რაც ხელს შეუწყობს საქართველოს საგარეო პოლიტიკაში მიმდინარე მეტად რთული პროცესების განვითარებაში წინსვლას, რომელიც უმთავრესად უკავშირდება კონფლიქტის საერთაშორისო სამართლებრივ დონეზე დარეგულირებას.
