გორის რაიონის სოფელ ქვემო ნიქოზის საჯარო სკოლის შენობა 2008 წლის საომარი მოქმედებების შედეგად დაინგრა. საქართველოს განათლებისა და მეცნიერების სამინისტროს ძალისხმევით, სწავლის პროცესი არ შეფერხებულა და სოფელ ზემო ნიქოზის საჯარო სკოლის შენობაში, მეორე ცვლაში მიმდინარეობდა. მიუხედავად ამისა, იყო სასწავლო პროცესთან და გადაადგილებასთან დაკავშირებული პრობლემები, აუცილებელი იყო სოფელ ქვემო ნიქოზში სკოლის ახალი შენობის აგება.
არსებული პრობლემით ამერიკის შეერთებული შტატების საელჩო დაინტერესდა. თავდაცვის სფეროში ამერიკის ინჟინერთა კორპუსის მიერ შემუშავდა და დაფინანსდა ახალი სკოლის შენობის პროექტი. მშენებლობა 2012 წელს დაიწყო და 2013 წელს დასრულდა. სკოლის შენობასთან ერთად, ამერიკის საელჩომ სკოლას საჩუქრად სასკოლო ინვენტარიც გადასცა და საქართველოს განათლებისა და მეცნიერების სამინისტროსთან ერთად თანამედროვედ აღჭურვა იგი.
ლია გიგაურმა მადლობა გადაუხადა ამერიკის საელჩოს, აშშ-ის თავდაცვის სამინისტროს და განაცხადა, რომ „სამინისტრო თავის მხრივ სკოლას უწყვეტი ინტერნეტით უზრუნველყოფს და ამისთვის გამაძლიერებელ აპარატურას დავამონტაჟებთ, გარდა ამისა მოსწავლეები უზრუნველყოფილნი იქნებიან სახელმძღვანელოებით, მოთხოვნის შესაბამისი ლიტერატურით აღიჭურვება ბიბლიოთეკა, თქვენს სკოლაზე აისახება ყველა ის სიახლე და რეფორმა, რასაც განათლების სამინისტრო ახორციელებს, რასაც სწავლების ხარისხის უზრუნველყოფისთვის გავაკეთებთ“.
