“რაღაც გარიგებაა ციხეების უფროსებთან, მათ მოწმეებად იყენებენ”

სოზარ სუბარი ამბობს, რომ ამ ადამიანებმა გამოცდას ვერ გაუძლეს და რადგან შეუცვლელი ჩინოვნიკები არ არსებობენ, მათ ადგილს სხვები დაიკავებენ. მინისტრი მომხდარზე პასუხისმგებლობას სხვებს აკისრებს და თანამდებობიდან წასვლას არ აპირებს.

27 ნოემბერს სასჯელაღსრულების სამინისტროს საზოგადოებასთან ურთიერთობის სამსახურმა ზურაბ ვარდიძის დაკავების შესახებ გაავრცელა ინფორმაცია. ითქვა რომ მას თანამდებობრივ დანაშაულში ედებოდა ბრალი, თუმცა რამდენიმე დღის განმავლობაში ვერავინ გაიგო კონკრეტულად რაში გამოიხატა მის მიერ ჩადენილი ქმედება.

მედიით გავრცელებული ინფორმაციით 10 აგვისტოს და 11 ოქტომბერს არასრულწლოვანი პატიმრები ციხის მე-18 სამკურნალო დაწესებულებაში ე.წ. კანონიერ ქურდ ტარიელ ფოცხვერიასთან შესარიგებლად მიიყვანეს, რითაც არასრულწლოვანთა დაწესებულებაში არსებული კონფლიქტი მართლაც ამოიწურა. გაწეული სამსახურის სანაცვლოდ ეწ. კანონიერმა ქურდებმა ციხის ადმინისტაციას პატიმრის სკაიპით ქურდად მონათვლა მოსთხოვეს, რაც გავრცელებული ინფორმაციით, 17 ნოემბერს საქართველოს პრეზიდენტის ინაუგურაციის დღეს განხორციელდა. ფაქტის გახმაურების შემდეგ სამინისტროს გენინსპექციამ მოკვლევა დაიწყო მიუხედავად იმისა, რომ პატიმრების უკანონოდ გაყვანიდან თვეზე მეტი იყო გასული. არასრულწლოვნების “კანონიერ ქურდთან” შეხვედრის ორგანიზება ზურაბ ვარდიძეს დაბრალდა, თუმცა „გურია ნიუსის“ წყარო ამტკიცებს რომ ვარდიძე სოზარ სუბარის მითითებას ასრულებდა და პატიმრების გაყვანაზე მინიმუმ სასჯელაღსრულების დეპარტამენტის უფროს ღურწკაიას ბრძანება უნდა ყოფილიყო. თბილისის საქალაქო სასამართლომ ვარდიძეს წინასწარი პატიმრობა შეუფარდა. დაცვამ პატიმრობის გასაჩივრება სააპელაციო წესით სცადა, თუმცა მოსამართლემ საჩივარი დაუშვებლად სცნო. ვარდიძის ადვოკატ მამუკა ჭაბაშვილის თქმით ბრალის ფორმულირება იმდენად ბუნდოვანია, რომ მან მხოლოდ პროკურორის გამოკითხვის შემდეგ გაარკვია რაში ედებოდა ბრალი მის დაცვის ქვეშ მყოფს.

“პროცესზე გამომსვლელი პროკურორის დაკითხვის დროს გამოიკვეთა, რომ ზურაბ ვარდიძემ არასრულწლოვანი პატიმრები შეახვედრა “კანონიერ ქურდს” და ამით გაიადვილა სამუშაო. ბრალდებას ჰგონია რომ აქვს მტკიცებულებები, ჩვენ ვთვლით, რომ არ აქვს, იმიტომ რომ არც ეს შეხვედრაა დადასტურებული და არც ის, რომ ეს ვარდიძის ბრძანებით მოხდა. მათ შორის არაა დადასტურებული შედგა თუ არა საუბარი არასრულწლოვნებსა და “ქურდებს” შორის და თუ შედგა , მაინდამაინც ამ საუბრის შემდეგ დაწყნარდა თუ არა ვითარება ციხეში. არასრულწლოვნების საავადმყოფოში გაყვანა მოხდა ასე: პატიმრებმა ციხის უფროსს განუცხადეს, რომ გადაყლაპეს ბასრი საგნები და საჭირო იყო მათი საავადმყოფოში გადაყვანა. მათ ჩვეულებრივი წესით გაიარეს ყველა პროცედურა და ასე მოხვდნენ სააავადმყოფოში. ვარდიძე არ არის დირექტორების ხელმძღვანელი და ვერ უბრძანებდა ვინმეს გადაყვანას . ამას წყვეტდნენ დეპარტამენტის თავმჯდომარე და ციხეების უფროსები .ვარდიძე იყო ერთი ჩვეულებრივი სამმართველოს უფროსი და არანაირად არ წყვეტდა ვინმეს გადაყვანა-გადმოყვანის საკითხს. რომც მომხდარიყო პატიმრობის კოდექსის დარღვევა, ამას ვარდიძე ,მარტო ვერ იზამდა”,
_ ამბობს ადვოკატი ჭაბაშვილი. მისივე თქმით ბრალდების ძირითადი მოწმეები ციხების უფროსები არიან, მათ შორის არასრულწლოვანთა დაწესებულების დირექტორი, რომელიც ამტკიცებს რომ პატიმრები საავადმყოფოში ვარდიძის სატელეფონო მითითების შემდეგ გადაიყვანა.

“მათი ჩვენება არ არის სარწმუნო, რადგან ამ საქმეს სასჯელაღრსრულების სამინისტროს საგამოძიებო ნაწილი იძიებს და ეს ხალხი ისევ იმ სამსახურში მუშაობს. მათ ბრალს არ უყენებენ, რადგან მოწმეებად სჭირდებათ. ვარდიძეს რომ ებრძანებინა დახოცეთ ეს ხალხიო, უნდა დაეხოცათ?თუ უკანონო მითითება შეასრულეს, მათაც ხომ უნდა აგონ პასუხი? ვფიქრობ რაღაცა გარიგებაა ციხეების უფროსებთან , ეუბნებიან ეს თქვითო და სამაგიეროდ პასუხისმგებლობას აცილებენ”.

არასრულწლოვანთა დაწესებულების დირექტორი ამ დრომდე თანამდებობაზე რჩება, თუმცა როგორც სოზარ სუბარმა განაცხადა დღეს, ისიც მალე დატოვებს სასჯელაღსრულების სისტემას.