_ ბოლო დღეებში არაერთხელ აღინიშნა მოსამართლეზე ზემოქმედებისა და მის საქმიანობაში ჩარევის თაობაზე. საგანგაშოა, რომ ამ ფაქტების შესწავლით იუსტიციის უმაღლესი საბჭო არ დაინტერესებულა, მაშინ როდესაც, მისი უმთავრესი კანონონისმიერი ვალდებულება სასამართლოს დამოუკიდებლობის უზრუნველყოფა და სასამართლოსადმი საზოგადოების ნდობის ამაღლებაა.
“საქართველოს მოსამართლეთა ერთობა” მიიჩნევს, რომ ნებისმიერი კონკრეტული განცხადება, რომელიც მოსამართლის საქმიანობაში ჩარევაზე მიანიშნებს, დაუყოვნებლივ უნდა გახდეს იუსტიციის უმაღლესი საბჭოს განხილვის საგანი.
იუსტიციის უმაღლესმა საბჭომ, სამწუხაროდ, რეაგირების გარეშე დატოვა საქართველოს უზენაესი სასამართლოს ყოფილი მოსამართლის – ლალი ლაზარაშვილის – მიერ საჯაროდ გაცხადებული ფაქტები, კონკრეტულ პირების – უზენაესი სასამართლოს თავმჯდომარისა და მისი მოადგილეების – მხრიდან მოსამართლის საქმიანობაში ჩარევის შესახებ.
თბილისის მერის საქმესთან დაკავშირებით მოსამართლეზე განხორციელებული ზეწოლის თაობაზე საჯაროდ გაცხადებული ინფორმაციის მიმართ იუსტიციის უმაღლესი საბჭო კვლავ ინერტულობას იჩენს. სრულიად შეუსაბამოა საქართველოს უზენაესი სასამართლოს თავმჯდომარის განცხადება იმის შესახებ, რომ მხოლოდ სათანადო ორგანოების მხრიდან მოკვლევის წარმოების შემდეგ მოახდენს დადგენილ ფაქტზე რეაგირებას. ამგვარი დამოკიდებულება ხელყოფს სასამართლოს დამოუკიდებლობას, ავტორიტეტს და ამცირებს საზოგადოების ნდობას სასამართლოსადმი.
“საქართველოს მოსამართლეთა ერთობას” სურს, საზოგადოებას შეახსენოს სასამართლოს დამოუკიდებლობის ხელშემშლელი მთავარი მიზეზი. უახლოეს წარსულში ეს იყო აღმასრულებელი ხელისუფლების გავლენა სასამართლოზე, რასაც თავად სასამართლო ხელისუფლების ხელმძღვანელებიც აღიარებენ და რამაც ყველაზე მეტად დაუკარგა სასამართლოს ავტორიტეტი.
იუსტიციის უმაღლესი საბჭოს უმოქმედობა მეტყველებს ამ ორგანოს მიერ ვალდებულებებისადმი ზედაპირულ დამოკიდებულებაზე. მიუხედავად იმისა, რომ საბჭოს წევრთა უმრავლესობა მოსამართლეები არიან, მათი საქმიანობა არ არის მიმართული ინდივიდუალური მოსამართლის როლის გაძლიერებისკენ. მათ არ სურთ განვლილ პერიოდში და ამჟამად არსებული პრობლემების გაანალიზება და მათ გადასაჭრელად კონკრეტული ქმედების განხორციელება. მათ საქმიანობაში არ ჩანს მონდომება, რომ წარსულში მიღებული მწარე გაკვეთილები დღესაც არ განმეორდეს. იუსტიციის უმაღლესი საბჭო არ უნდა იყოს სისტემური პრობლემების მიმართ ინდეფერენტული, რადგან მის ქმედითობაზე დიდწილადაა დამოკიდებული მართლმსაჯულების სისტემის მდგრადობა და კომპეტენტური, დამოუკიდებელი და მიუკერძოებელი სასამართლოს აღმშენებლობა.
საქართველოში ბოლო პერიოდში მიმდინარე სასამართლო განხილვები ხშირად იწვევს პროცესის მონაწილეთა თუ საზოგადოების მხრიდან ურთიერთსაწინააღმდეგო შეფასებებს. მათი აზრით, სასამართლო ხან მოწოდების სიმაღლეზეა და უზრუნველყოფს სამართლებრივი სახელმწიფოსათვის აუცილებელი გარანტიების შექმნას, ხან მინიმალურ სტანდარტსაც ვერ აკმაყოფილებს და მართვადია.
“საქართველოს მოსამართლეთა ერთობა” მოუწოდებს იუსტიციის უმაღლეს საბჭოს, დაინტერესდეს და თავად შეისწავლოს თბილისის საქალაქო სასამართლოს თავმჯდომარესა თუ მოსამართლეზე სისტემის შიგნიდან თუ გარედან განხორციელებული შესაძლო ზეწოლის შემთხვევები და შედეგები გახადოს საჯარო. ამგვარი ქმედებით იუსტიციის უმაღლესი საბჭო შეასრულებს მის კანონისმიერ ვალდებულებას და უზრუნველყოფს სამოსამართლო საქმიანობაში ჩარევის პრევენციას. პასუხი უნდა გაეცეს საზოგადოების ლეგიტიმურ კითხვებს, რაც დაამკვიდრებს ამ ინსტიტუციისადმი ნდობას. ამასთან, თითოეული მოსამართლე მართლმსაჯულების შიგნით და საზოგადოება გარედან, მოდარაჯე თვალით უნდა დააკვირდეს სასამართლო სისტემაში მიმდინარე პროცესებს.
“საქართველოს მოსამართლეთა ერთობა” მიმართავს ხელისუფლებას, დროულად განახორციელოს ინდივიდუალური მოსამართლის გაძლიერებისკენ მიმართული საკანონმდებლო ცვლილებები, რათა მინიმუმამდე დავიდეს შესაძლებლობაც და აღმოიფხვრას საზოგადოების ეჭვიც სასამართლოზე შიდა თუ გარე ზეგავლენის არსებობის თაობაზე.
“საქართველოს მოსამართლეთა ერთობა” მიმართავს მედიას, არასამთავრობო და საერთაშორისო ორგანიზაციებს, კიდევ უფრო აქტიურად ჩაერთონ სასამართლოს ირგვლივ განვითარებული მოვლენების კვლევაში, რათა ყველა ეტაპზე უზრუნველყოფილ იქნეს იუსტიციის უმაღლესი საბჭოს თუ სხვა ორგანოების საქმიანობის გამჭვირვალობა. საზოგადოებას უნდა მიეწოდოს ობიექტური ინფორმაცია, რომელთა ანალიზს თავად უნდა ახდენდეს და არ უნდა იყოს შეზღუდული დაინტერესებულ პირთა სუბიექტური მოსაზრებებით.
“საქართველოს მოსამართლეთა ერთობა” გამოხატავს მზადყოფნას, ითანამშრომლოს სამოქალაქო საზოგადოებასთან, ხელისუფლებასთან, იუსტიციის უმაღლეს საბჭოსთან, რათა ერთობლივი ძალისხმევით ჩამოყალიბდეს დამოუკიდებელი და მიუკერძოებელი მართლმსაჯულება, _ აღნიშნულია “საქართველოს მოსამართლეთა ერთობის” მიერ გავრცელებულ განცხადებაში.
